“Mo Kíisi Gaani Idapase”
“Mo únda re wa mi aida nga pase ya!”—MK. 9:24.
ABIA: 54, 24
1. Wai du nyakipa idapase? (Oni bi gu sura duti tonatonaha.)
YA MO mo aberẽnga gupai nga, ‘Ya mo mi nga gu ngbatunga boro Yekova nika ida ka batasa ni ti regbo bakere gberãngbi ki rimisi ni ku rogo vovo zegino?’ Rengo ngaha nga, bata nakoda badungu apai, ono gu mokedi nangia Pauro anyakasipa nyanyakipa pai sa nga: “Zanga idapase ga boro pai arengba nga na ngba bangiri Mbori te.” (Eb. 11:6) Boro rengbe ka gia gipai re ni taataha, ono gu rengo duho nga, “aboro . . . na idapase dunduko te.” (2 Tesa. 3:2) Gi kekeapai re naundo rani ani inipa wai nyaki gupai nga ka sonosa nyanyaki idapase.
2, 3. (a) Ginipai ani awirikaha be Petero tipa nyakapa idapase? (b) Gini asanahe ani nika wisigoho awere?
2 Gu mokedi nangia Petero ayugupa nyaka idapase ho ko afura ni tipa gu “idapase” i na asadihe ya “i ki bi he ni tambuatambua ha, ni irisiirisi he, ni taasitaasi he rago kusa yo Yesu Kristo gbayaga.” (Oni gedi 1 Petero 1:7.) Wa duhe nga bakere gberãngbi nambeda niʹipo, ya mo ani aidanga kadu na gu ngbatunga idapase rengbe ka maa rani dagba agu aboro gaani bakere Bakindo nika taasa yo ho ko nika ye ni te? Nirengo, ani naida kadu “dagba agu yo yo du na idapase ti yo tipa batasa mbisimo” rani. (Eb. 10:39) Na gi sasa re rirani yo, ani rengbe ka zungodihe wa gu kumba naaya: “Mo únda re wa mi aida nga pase ya!” (Mk. 9:24) Watadu si rengbe ka fõngbaduraniyo wakina ga Yesu amokedi naaya: “Mo kíisi gaani idapase.”—Rk. 17:5.
3 Gu zingo du ani na ni tipa i kiisi gaani idapase nakusa kura asanahe. Wai du rengbe ani ka sonosa gi sino re? Wai du rengbe ani ka yugoho nga gaani idapase ni ungaha? Gini kido du ani na ni nga ani nika gbia karagapai agbia kuti gaani sanahe nga i kiisi gaani idapase?
SONOSA GU IDAPASE NASA NGBARAGO TI MBORI
4. Ga ada kpiapai rengbe ka fõngbaduraniyo ani nyakasi gaani idapase?
4 Wa duhe nga, “agu apai i ake mbata rogo Ziazia Kekeapai i ake he tipa gaani wirikapai,” ani ima rengba ka wirikapai ti gu badungu akpiapai nga ga idapase du rogo Ziazia Kekeapai yo. (Rom. 15:4) Ho ani agedapai ni tipa ngbatunga aboro wa Abarayama, Sara, Yisaka, Yakobo, Moize, Raba, Gidiona, Baraka na gu kura badungu aboro, agi apangbanga re rengbe ka fõngbaduraniyo ani wisigi gaani idapase. (Eb. 11:32-35) Kurigure, ho ani ageda agu apangbanga ni nga ga idapase du tipa awirina ti gi gaani regbo re, si rengbe ka fõngbaduraniyo ani mangi bakere ome ka nyakasa gaani idapase. *
5. Wai du Eriya ayuguhe nga ko adu na nyanyaki idapase kuti Yekova, na gine gi kpiapai re afõ rani ani berẽkuriihe?
5 Kpiapai sa dagba agu akpiapai du rogo Ziazia Kekeapai nga ga gu nebi nangia Eriya. Oni berẽnga pa agu apai namangi nayugopa gako kido kuti Yekova. Ho Eriya ape gupai ni fu Bakindo Aba nga Yekova nika ye na ugure, ko atakipande he gbayaga nga: “A wa du Yekova ni ungako, . . . ndomo ati nga na mai rogo agi agarã te re, kina kuti sangbare.” (1 Aba. 17:1) Eriya aidi kuti gupai nga Yekova nika fu agu ahe afu si aaidaha tipa tiko na gu kura aboro ti regbo gu ugure re. (1 Aba. 17:4, 5, 13, 14) Ko ayugu gako kido nga Yekova rengbe arengba ka zingisa gude be kpio. (1 Aba. 17:21) Ko aakapa nga kuti gupai nga Yekova nika keda we si riti gako motumo ri Bagangara Karumera yo te. (1 Aba. 18:24, 37) Ho regbo ada ni be Yekova ko rugusi gu ugure re, si du mbata fu he duho naayugoho nga mai nika naa, Eriya aya fu Aba: “Mo gúari, ki ri riahe ki mbiri he; bambiko bamai napuma.” (1 Aba. 18:41) Ya mo ngbatunga apangbanga wa gure asanga rani ani wisigi tirani ka bihe singia gaani idapase ni nyanyakihe wa gure te?
GINIPAI RENGBE ANI KA MANGAHA KA SONOSA IDAPASE?
6. Ginihe ani aidaha be Yekova tipa ka sonosa idapase?
6 Ani arengbanga ka sonosa idapase ngba gaani ome te. Idapase nga papara zuzu ga Mbori ziazia toro. Rogo gi gene re, si ni patatamana furani ka pekafuo ga Yesu arugute du tipa ka kpara fu Mbori ko fu gu toro re furani ni bakerehe, mbiko Yesu akido rani nga Barani “na gama Ziazia Toro fu agu yo nasana ko.”—Rk. 11:13.
7. Oni funga kpiapai ka yugo wai rengbe ani ka banda gaani idapase si nye ni nyanyakihe.
7 Bara sa ani nasigira gaani idapase, ani duwa ka ani angerafuoho kindi. I rengbe ka ringbisa gaani idapase kuti nyake. Ho i aziga we ni, si naki nga ngariangaria. Ono tie, ka i amanganga kurapai kuti gu we re ya, si nabiso kina kingiriwe ki nye na ni yangadaha si ki da nga kuke. Ono ka mo amaa nyake amaa kindi ku we yo, si nikaa ki aki kindi. Wakina gure a, gaani idapase rengbe ka nye ni ungaha ka ani arigaha dedede na Fugo Mbori. Ka ani awisigo Ziazia Kekeapai yeeye, ani nika sonosa dudunguro nyemuse tipa Baenge kehe, na gure nika ngia mburu nyakasa gaani idapase.
8. Ginipai nika undo rani ani sonosi gaani idapase na ki bandaha ni nyanyakihe?
8 Gini kurapai rengbe mo ka mangaha ka sonosa gamo idapase na ka bandaha ni Eb. 6:1, 2) Mo gbe berãro kuti agu asangbaanebi du rogo Ziazia Kekeapai yo naima digiso tihe mbiko si rengbe ka fu nyanyaki ndupai foro tipa mo du na idapase. Mo ima rengba ka mangasunge a na Fugo Mbori ka bihe singia gamo idapase nandu sa na ga agu aboro du na nyanyaki idapase.—Oni gedi Yakoba 1:25; 2:24, 26.
nyanyakihe? Ka mo rengbe nga kina be gupai mo awirikihe ki da ti gu regbo mo azi bapatiza ya. (9, 10. Wai du agi apai re aundo rani ani sonosi idapase: (a) wene kpamiatise? (b) dunguratise? (d) sunge tungusapai?
9 Gu mokedi nangia Pauro ape gupai fu akurako aKristano nga i rengbe arengba ka ‘wasa dagbatiyo, be ga akurayo idapase.’ (Rom. 1:12) Wa ani kaa kodatirani na akuarani aidipase, ani ima rengba ka sonosa gaani idapase dagba tirani, gbe ho du ani ni na agu aboro du na nyanyaki “idapase.” (Yak. 1:3) Gbegberẽ kpamiatise nagbarasa idapase, ono wene kpamiatise na sonosa ha. (1 Kor. 15:33) Gure nga ndupai sa i anyakasa rani ti ni ka ani he nga “dungura tirani na akuarani” ya, ono ani ‘rugu akuarani aruga’ kindi watadu ka ngarasa yo. (Oni gedi AEbere 10:24, 25.) Kura ndupai berewe nga, agu apai du ba adunguratise yo nakoda agu arugute nasonosa gaani idapase. Gipai re na ngbanya dagbaha na gu fugo Pauro nga: “Idapase aye be giapai.” (Rom. 10:17) Ya mo ani sa agu adunguratise nga ga aKristano ni papara gaani raka?
10 Ho ani atungusapai ni, ani asonosa nga kina ga kura aboro idapase sa te, ono ani nasonosa gaani idapase a. Wakina agu aKristano naadu mbata, ani nawirika wai ka maa gaani idapase dũ kuti Yekova na kini tungusipai zaaza rogo akpakarapai yo dunduko.—Amo. 4:17-20; 13:46.
11. Tipagine du Kareba na Yosua adu ti ni na nyanyaki idapase, na wai du rengbe ani kadu wa yo?
11 A wa ani kaa bi wai Yekova aundo rani rogo raka yo na wai ko akaragapai kuti gaani akparakpee, gaani idapase nikaa sona. Gere nga gupai namangi tipa Kareba na Yosua. I ayugu idapase kuti Yekova ho i andu ni ni abamoirago ku Ringara Mokido yo. Ono tie, a wa i aabi wai Yekova aaruga apai rogo gayo raka yo, gayo idapase aasona kina ku mbatayo. Si airiwongo te nga Yosua afura nyanyaki fu aYisaraere nga: “A nga wenepai nakpa sa dagba agu apai dunduko Yekova gaoni Mbori akido pa ha fu roni te.” Ko ape kurapai kusa nga: “Awere tie, oni gúnde ti Yekova, ki nimangi pako ni ndikidi rengo na rurupai. . . . Mi ni tire na gimi aborokporo, ani amánga kina pa Yekova.” (Yos. 23:14; 24:14, 15) A wa ani kaa hia gu wene asino nga ga Yekova, ani ima rengba ka sonosa gu ngbatunga kido re a.—Tam. 34:8.
WAI ANI AYUGO GAANI IDAPASE
12. Gini he du Yakoba aya tipaha si ni nyanyakipa tipa idapase?
12 Wai du ani ayugoho nga gaani idapase ni ungaha? Gu bawiriki nangia Yakoba akaragapai kuti gu sanahe re niya: ‘Mi ayugo gi idapase foro rogo gi mangaapai yo.’ (Yak. 2:18) Gaani mangaapai nika yugoho nga ani na ndikidi idapase. Ani bingo bete akpiapai.
Agu aboro namangasunge tungusapai nayugo gupai nga i na nyanyaki idapase (Oni bi genewaraga 13)
13. Ngba gini agene du tungusapai ayugopa idapase?
13 Mangasunge tungusapai nga wene gene ka yugo gaani idapase. Tipagine duhe ti ni wo? Mbiko gi sunge re naida na gupai nga ani du na idapase kuti gu regbo Mbori nika ye na digido gi sinoraka re, na ki idi kuti gupai nga “si aíma nga te.” (Abak. 2:3) Gene sa rengbe ani ka wisigo gaani idapase ngbaha nga ka bi bakio gu regbo du ani na nyemu ka diaha kutingba sunge tungusapai. Ya mo ani natungusapai na omerani dunduko, isoke wagu nga ka kiiso gu regbo ani adiaha kutingba sunge tungusapai? (2 Kor. 13:5) Nirengo, ‘kusa pase ni ngbase sa bata’ nga gu nyanyakipa gene ani ayugo na ni nga ani na idapase ngbaduraniyo.—Oni gedi ARomo 10:10.
Ani nayugo idapase wa ani asota na agu akpakarapai ani agbiatirani na ni na aʹuru dunduko (Oni bi genewaraga 14)
14, 15. (a) Wai du rengbe ani ka yugo idapase rogo gaani raka yo na aʹuru dũ? (b) Oni penga gu kpiapai nayugo nyanyaki idapase rogo mangaapai yo.
14 Ani ima rengba ka yugo idapase a wa ani asota na agu akpakarapai nga ga raka na aʹuru dũ. Singia ani na akaza, gberãrago, zerakpotoseyo, rungo, watadu gu kura aʹasada, ani nakido nga Yekova na Wiriko nika “unda rani rogo rago zingo.” (Eb. 4:16) Ani nayugo gu ngbatunga kido re ho ani akparanga ni kina tipa gu undo nga ga toro sa ya. Yesu aya ani ima rengba ka kpara tipa agu ahe nga ga borose, kodihe na “gaani riahe fu rani na uru” dunduko. (Rk. 11:3) Agu apangbanga du rogo Ziazia Kekeapai yo nayugoho furani nga Yekova ima rengba ka ngerafuo rani. Ti gu regbo kere ugure ati ku ringara aYisaraere yo, Yekova afu riahe na ime fu Eriya. “Azire du wa anzagu ki niye na riahe fu ko na pasio na wiso, riahe na pasio na nyemu a; ko ki nimbiri kina gu wiridi re” kina wai Yekova aruguhe. (1 Aba. 17:3-6) Ani na idapase nga Yekova ima rengba ka mangapai tipa ani gbia guhe du ani nazingo ho.
15 Ani nakido nga mangapai kuti agu abangua arugute nga ga Ziazia Kekeapai ima rengba ka undo rani ani gbia riahe. Wirinarani nga Rebecca nga diakumba du Asia yo abi rengo agi apai re tipa gari aborokporo. I ima mangasunge kuti gupai du rogo Matayo 6:33 na Asanza 10:4 rogo gayo raka yo ni maa yo agu apai nga ga Kindo mbatayo na kaa mangasunge nyanyaki. Rebecca ape gupai nga ti gu kura regbo sa, kumbari abi gupai nga gu sunge marã ko aamangaha, si aima rengba ka maa ko ngbapai yo rogo toro yo, na ko ki mbu gu sunge re. Wa si avura duwo, si aida i ngerefuo awiriyo biama. Rebecca ape gupai namangi ki ya: “Ani atona ka mbakada gu rukutu wiri ahe aboro arihe, na kini bagihe. Rogo agu agarã dunduko ani aamanga gi sunge re kaa raka, ani abihe nga Yekova aambunga rani te. Uru aadunga ho sa ani ara na gomoro te.” Ya mo mo yugu gamo kido a nga Ziazia Kekeapai na wene arugapai fu aboro areme?
16. Kangia ani nakido kuti Mbori, sangbanaha nika ngia gine?
Gara. 3:11; Abak. 2:4) Sidu tie, si ni nyanyakipa pai ani du na idapase kuti gu Boro rengbe ka undo rani nzunzu. Pauro atingidi rani na gupai nga Mbori du nga “gu ko ka mangi pai amanga bakere gbe si ki moi pai susi gu ani aõ na gu ani aberã dunduko, ku sangba gu tandu yo namanga pai kpotorani yo.” (Ef. 3:20) Ga Yekova amoyambu namanga gako pai na omeyo dunduko, ono wa duhe nga kura apai kinaho ka i amanganga ya, i nakido kuti Yekova ko fu maku kurii gu sunge re. Ya mo ani na ngbarago nga Mbori na kina rani te?
16 Si aidanga ani kapa gupai nga ka ani apekafuo ga Mbori arugute, si tipa kina gaani undo te. Pauro adi gupai ga Mbori toro adu kugii Abakuka ko kehe ki ya: “Ruru boro nara mbiko idapase.” (KO NAFU IDAPASE FURANI
17. (a) Wai du i akaragapai kuti gu kparakpee nga ga amokedi? (b) Tipagine rengbe ani kadu na kido ti ni nga ani nika gbia karagapai agbia kuti gaani sanahe tipa i kiisi gaani idapase?
17 Tingbafuo agi apai ani nasakihe re, ani rengbe kadu kina wai amokedi adu ho i ayani fu Gbia wẽ: “Mo kíisi gaani idapase.” (Rk. 17:5) I aima gbia karagapai kuti gayo sanahe, gbe ti rago Pendekote rogo gu garã nangia 33 ho ziazia toro azoro ni kuriyo na i ki gbia bakere inohe tipa ga Mbori ringbisapai. Gipai re aima nyakasa gayo idapase. Ni sangbanaha, i atona ka manga gu bakere tua nga ga tungusapai ti gu regbo re. (Koro. 1:23) Ya mo ani rengbe ka gbia karagapai kuti gaani sanahe tipa i kiisi gaani idapase? Ziazia Kekeapai nakido rani nga ani ima rengba ka gbia karagapai ka “ani ho gu he ku sangba [ga Mbori] nyemuhe yo.”—1 Yo. 5:14.
18. Wai du Yekova afu maku fu agu aboro nasonosa idapase?
18 Si tie ziazia nga, Yekova na ngbarago na agu aboro nakido kutiko rogo apai yo dũ. Yekova nika karagapai akaraga kuti gaani sanahe tipa i kiisi gaani idapase, na gaani idapase nika sona asona ni bakerehe si ki sa gupai nga ‘i bi rani ya ani rẽ na ga Mbori ngbi.”—2 Tesa. 1:3, 5.
^ genewaraga 4 Ka oni aida ka bi kura akpiapai, oni bi gu pangbanga du tipa Lillian Gobitas (Bamburu 22, 1993, Awake!), Feliks Borys (Wegebe 22, 1994, Awake!), na Josephine Elias (Mbirinvuo 2009 Awake!).