AGU APAI NANDU NA GUPAI DU TI KPOTOHO | WAI KA GBIA UNDO TI GEDA ZIAZIA KEKEAPAI
Ginipai Rengbe ka Saha si du ni Wenehe?
Gamo geda Ziazia Kekeapai nidu wai? Si nidu ni pa wasa watadu mo naagbianga ngbarago ti ni te? Si naru gbe kina kurii wai mo naagedaha. Ani bingo gupai rengbe mo ka mangaha tipa ka kiiso gamo ngbarago ti regbo gamo gedapai.
Mo sia gu sasa fugo Ziazia Kekeapai du ni ruruhe, na kidu rogo gu fugo aboro apehe awere. Ka mo ageda gu Ziazia Kekeapai du na badungu afugoho ni kpakarakpakaraha watadu agu afugo aboro agumbanga ha berewe ya, mo arengbanga ka gbia ngbarago te. Si du, mo gbata gu Ziazia Kekeapai du na taata afugoho tipa si zi ngbaduro yo. Wa vura duhe wo, si naida gu sasa fugo re du ni ruruhe. *
Mo mangisunge na gu vovo ahe na kura awere. Ziazia Kekeapai areme sa kina rogo kpakuto buku te, ono si a kina rogo kura ahe. Mo ima rengba ka geda Ziazia Kekeapai rogo Internet watadu ka kusaha ku rogo computer, tablet, watadu ku rogo terefuni. Kura ngbatunga agi ahe re kinaho du na kura aũsunge rogoho nasa ro mo bi kura averesi ni ipo rogo kura Ziazia Kekeapai nga gu nafura tipa kina gu bangisapai mo agedaha, watadu mo wisigihe na kura sasa afugo Ziazia Kekeapai. Dede fugo Ziazia Kekeapai kinaho, ka si du nga gia kina dede fugoho ngba tiro kuba gedaha. Dungu aboro ni naagbia ngbarago ti ni ho du yo ni rogo tarambiri, ho i azunda aroko ni, watadu ho i amanga gu sunge ni rengbe arengba ka sayo i ni gi manzigo. Ya mo mo rengbe ka asada gu ngba tiro dagba agi apai re?
Mo mangisunge na agu aũsunge nga ga wisigo Ziazia Kekeapai. Agu aũsunge nga ga wisigo Ziazia Bible Teachings” ima rengba ka undo ro mo gi rogo dungu papara Ziazia Kekeapai yo.
Kekeapai ima rengbe ka undoro mo gbia undo ti gamo gedapai. Gbakigbaki kpiarago nga ga agu arago du paha rogo Ziazia Kekeapai, nga gu rengbe ka undo ro mo inipa agu arago mo nagedi paha. Kekeapai du wa gu du rogo gi magazini re watadu gu du rogo gaani bangiriba nga ga Internet nga ga jw.org tii “Mo gedihe ni bakiakia. Ka si du nga geda Ziazia Kekeapai tona ti tonatonaha dati ti digidoho ni ba mbumbuhe foro, mo ima rengba ka tonaha na gu papara Ziazia Kekeapai ngba tiro gbe. Ka si du nga mo naida ka ino pai tipa agu abaworimo du payo rogo Ziazia Kekeapai yo, mo ima rengba ka gbata gu kekeapai du tipa yo. Kpia wai ka mangaha gu du rogo gi sanduki du fuo gi kekeapai re nga, “ Mo weteke Ziazia Kekeapai ni wisigo mo pai tipa agu aboro du rogoho.” Mo ima rengba a ka geda Ziazia Kekeapai kuti riiapai watadu kuti wai apai amangi ti genehe. Ya mo mo rengbe ka asada gu sa dagba agi apai re?
^ genewaraga 4 Badungu aboro bi gupai nga New World Translation of the Holy Scriptures du ni ruruhe na kidu taata tipa ka gedaha. ADezire Yekova nakusa gi Ziazia Kekeapai re na si awere rogo afugo naima susa 130. Mo ima rengba ka kusaha rogo pa-Ngirsi rogo gaani bangiriba nga ga Internet nga jw.org watadu rogo JW Library app. Ka si ngbatiro, aDezire Yekova ima rengbe ka ye na gi Ziazia Kekeapai re foro ku kpuro yo.