Ziazia kekeapai nga kungbo buku gbua te. Si na arugute rogoho be Bakusirani. (2 Timoteo 3:16) Gu pangbanga du rogoho ima rengba ka du na maapai kurirani ni bakerehe. Nirengo, Ziazia Kekeapai naya: “Gu pai nga ga Mbori du na unga, ki du na tandu.” (AEbere 4:12) Si na ome ti ni tipa ka mbakada gaani raka rogo agene ue—nga ka fu arugute furani rogo gaani raka yo na aʹuru dunduko gbiati ka undo rani ani ini Mbori wenengai gbiati gako akidohe.—1 Timoteo 4:8; Yakoba 4:8.

Mbakada gaani raka awere. Ziazia kekeapai rengbe ka undo rogo agu apai dunduko du tipa rani. Si nafu wene arugute tipa agi apai du kusende re

•   Pagume dagbarani na gaani aborokporo gbiati kura aboro.—AEfeso 4:31, 32; 5:22, 25, 28, 33.

• Du wenengai berãseyo na ti kpotose.—Atambuahe 37:8; Asanza 17:22.

• Iriiri mangaapai—1 AKorindo 6:9, 10.

• Ka du na bete marã.—Asanza 10:4; 28:19; AEfeso 4:28. *

Paranga arogotise rogo gu ringara nga Asia adu na bakere tambuahe tipa agu arugute nga ga Ziazia Kekeapai. Wa kina kura vovo arogotise, i aasota na gayo asino gbiati wai ka fura dagbase wenengai. Ono i atona mangapai kuti agu arugute i aagedaha rogo Ziazia Kekeapai. Si aye na gini sangbaha? Kumbari nga Vicent aya: “Agu apai mi aagedaha rogo Ziazia Kekeapai yo aundo re mi dibe akpakarapai rogo rogatise yo ngba gu gene nga ga nyemuse. Raka kuti agu apai du rogo Ziazia Kekeapai ima ye na ngbarago furani.” Diako nga Annalou aidi kuti gupai nga: “Geda agu akpiapai du rogo Ziazia Kekeapai aima undo rani. Mi awere na ngbarago rogo gaani rogatise yo na gaani asásá rogo raka.”

Pa ino Mbori. Kpara kusayo ti gupai Vicent agumbaha tipa rogatise, ko aya berewe we: “Geda mi Ziazia Kekeapai nasa re mi naambeda na Mbori susi wai mi adu mbata.” Gupai Vicent abihe re nayugo nyanyakipa pai—Ziazia Kekeapai ima rengba ka undo ro mo rugutiro na dungu apai tipa Mbori. Ni manga mo ho wo, mo agbianga undo gbua ti kina gako arugute te, ono mo nika inoko ni bakurea mo. Na mo nika bi gupai nga ko nayugo futufutuapai tipa wene raka kumbatayo, nga gu regbo mo nika gbia ngbarago ti “gu unga nga ndikidi unga”—nga gu nika nye anye kindi. (1 Timoteo 6:19) Nga gupai ka mo abingo ho rogo kura buku ya.

Ka mo diberã tipa kaa geda Ziazia Kekeapai, mo ima rengba ka gbia agi aundo re a, na si nika mbakada gamo raka awere na mo ki rengbe ka ino Mbori wenengai gbe. Ono tie, wa mo nikaa geda Ziazia Kekeapai, si nawiraha wa mo nika berã aberã tipa badungu asanahe. Ho mo nikaa berãha ni, mo moi gu kpiapai kuriro yo nga ga gu banyaki nangia boro Etiopia na raki agarã kusa yo 2,000. Badungu asanahe aima du ngbako tipa Ziazia Kekeapai. Ho i asanako ni singia ko gi rogo gupai yo ko aagedaha, ko akaraga pai ki ya: “Ka mi wiri pa ina ha wãi? kina boro ka yugu he fere” * Ko aima du na nyemu ka wirikapai be gu bayugupai naima ino Ziazia Kekeapai wenengai, nangia Firipo, ga Yesu bawiriki. (Amokedi 8:30, 31, 34) Wa kina gure a, ka mo aida ka ino kura apai tipa Ziazia Kekeapai, ani nayamba ro mo kedi gamo sanahe furani rogo gaani bangiriba nga www.pr418.com/zne watadu mo ke waraga ku rogo adresi sa dagba agu du rogo gi magazini re. Mo ima rengba ka sana agu aDezire Yekova du rogo gamo dagbarago a. Si angba gbe ka mo di Ziazia Kekeapai areme ki mbuhe si ngbe foro ku mbatayo tipa wene raka