Rogo Mbirinvuo, ani nika manga ome nyanyaki ka tona wisigo Baibiri na aboro rogo akporo dunduko, ni manga ani sunge na gu burosua nga Mo Raki Nyeanye Kindi na Ngbarago! Abatungusipai nika du na rengba ka sia ka manga sunge ni moundo abazakigene tipa asaa 30. Waigu ani nika manga gi kparakpara tua re?

• Ti Regbo Ndu Fuo Boro Ti Bambata Regbo: Mo mangisunge na gu kekeapai du gii burosua yo tipa ka ba nyemupai ti ni, na ki asadi ka yugo wai ani naanungusa wisigo Ziazia Kekeapai. Ka bangiro gonga ti agu aboro nayugu nyemupai gbiati aguyo si aida mo karaga tiro fuoyo ya. Ka si vura du nga i aima ká wisigo Baibiri mbata kusayo, i ima rengba kadu na nyemu gaani vovo gene wirikapai gbiati burosua. Si aidanga ani mbu gu burosua re rogo agu akporo adunga aboro rogoho ya watadu ka kedaha na waraga fu agu aboro naayugonga nyemupai mbata ya te. Rondo Sunge Tungusapai Rogo Dungurati ima rengba ka manga mbakadapai tipa gu kura aˈuru dunguratise nga ga tungusapai rogo gu diwi re.

• Gu Kura Amomu: Ka si du nga gaoni dungurati namangasunge na ũtura awaraga, oni moi sura gu burosua nga Mo Raki Nyeanye Kindi na Ngbarago! Oni gumba pa gu gaani wisigo Baibiri du gbua fu agu aboro nayugo nyemupai. Ni wiri guruhe, mo yugu wai funi ani namanga wisigo Baibiri na boro ti gu regbo oni afura na ni, na ki mangi mbakadapai tipa ka wirikapai na ni kusa. Gu babiapai nangerafuo sunge tungusapai ima rengba ka manga mbakadapai tipa agu awirina naima ino tungusapai wenengai ndu ka tungusapai rogo ba sunge-bagaahe na ki tona wisigo Baibiri na aboro. Mo ima rengba ka gumba pa wisigo Baibiri fu gamo abadiasunge watadu agu aboro mo amangi dezirepai fuyo angianga kuti asinoho ya.

Yesu afu gu zinahe furani nga ani sa ‘arikaaboro ni abawiriki,’ “ki nirugu yo.” (Mt 28:19, 20) Gi kparakpara tua re undongo rani aundo ani mangi gipai re ni manga ani sunge na gu burosua nga Mo Raki Nyeanye Kindi na Ngbarago!