NDU GUPAI DUHE TI NI NA NYANYAKIPAHA: Gu buku nga ga 1 AKorindo nga buku sa dagba agu awaraga yo 14 gu mokedi nangia Pauro akekehe tipa ka ngarasa awirinako ni aKristano. Ho boro ake waraga ni, ni na regbo beni ka siaka gani afugo na rubangirise, na gu boro nika gbia gu waraga re ima rengba ka gedaha bara dunguhe. Keka awaraga nga wene gene ka tungusapai fu agumerani na agu aboro ani akodatirani nayo. Keka awaraga a nga wene gene ka tungusapai fu gu boro adunga ani na rengba ka fura na ni ya. Ni kpiapai, si rengbe kadu nga boro yugu nyemupai ono si kidu ni mbumbuhe ka gbia ni tii kporo. Si ima rengba kadu ni mbumbuhe ka tungusapai fu kura aboro rogo gaani dagbarago mbiko gupai nga i naraka rogo agu abambu i abandaha abanda, agu adagbarago du na ndugu ti ni, watadu agu arago duhe ni mbumbuhe kada rogoho. Gini apai si aida ani moihe ku berãrani yo, gbe, ho ani ake waraga ni fu gu boro ani ainongo ni ya?

WAI RENGBE BORO KA MANGAHA:

• Mo gumba kina gupai ka mo ni gumbaha ka si nidu nga mo nafura kina boro kungba ni. Mo yugupa tiro ti tonatona gu waraga re, na ki gumba ndu gupai ziazia mo ake gu waraga re ti ni. Mo fu sanahe fu gu boro re tipa ni berẽkuriihe, na ki yugu bara gaani bangiriba nga ga Internet funi. Fuoho, mo gumbapa gu Wisigo Ziazia Kekeapai funi du rogo Internet, mo sakipai funi tipa gaani mbakadapai nga ga wisigo Ziazia Kekeapai na boro kporo, watadu ki keke bete gu riiapai nga ga kapita du rogo buku sa dagba gu gaani abuku na naundo rani rogo giarogo sangba Ziazia Kekeapai. Mo ima rengba ka maa gu karte nayugo bara jw.org, waraga yambahe, watadu trakte ku rogo gu waraga re.

• Mo kepai ni guruhe. Ka gamo waraga dunga ni bagbangaha ya, gu boro re andu kambu be gedaha.​—Mo bi kpia wai ka ke waraga ti kpe. 8

• Mo gedihe wenengai tipa ka si dunga na ingahe ya na si du ni gigirihe. Si du taata tipa ka gedaha, na si du na wene afugo rogoho, rogo birĩ yo, na ni gupai nafõngbaduseyo. Si naida mo du na rubangirise nga i ima diko agu ahe ti ni nayugo gupai nga i ima tumo marã ha.