I nasakapai tipa gu boro nga bakure nga, ni nga gu boro “nazio ti ni kuti kura boro mbiko nyemuse watadu kaa bi gu kura boro na nyanyakipa ni.” Ni kpiapai, Yonatana gbiati Davide atona gayo pa bakure tifuo Davide imi Goriata. (1Sam 18:1) Agi akumba re ni basasa ayugu agu asino nasayo i kpinyemu tiyo gbe. Sidu tie, gu pabakure du ni nyanyakihe naru rii inohe. Si nadia regbo adia tipa ka ino kura boro. Ono tie, si taata fu aboro tipa i da ni “abakure” rogo Internet. Mbiko wa duhe nga si taata fu boro rogo Internet tipa ni sa kura aboro i naabi ni ngba gu gene ni aidaha, si taata fu aboro tipa i oko gini ngbatunga aboro nga yo. Si ni wenepai tipa ka diaberã tipa gini ngbatunga aboro mo nika sia ka zio bakure na yo. Ka si du nga gu boro mo ainongo ni nzunzu ya kedi pa zio bakure foro rogo internet, ka mo gundenga ti ká gani pabakure mbiko gupai nga mo nika ba gberãrago ti ni ya. Nibi pa gu kerepai rengbe ka ye mbiko gipai re, kura aboro ima sia ka zanga mangasunge na agu aũfugo dagbase du rogo Internet. Ono tie, ka mo sia ka mangasunge na agi ahe re, ginipai si aida mo moihe ku berãro yo?

ONI MOI GU VIDIO NGA MO DU NA TATAMANA HO MO AMANGASUNGE NI NA INTERNET, NA ONI KI SANA AGI SANAHE RE:

• Ginipai si aida mo berẽkuriihe mbata fu mo kepai watadu ka maa sura rogo Internet?

• Tipagine si aida mo sia agu abakureamo du rogo Internet ti ni na tatamana?

• Tipagine si aida mo sia gu bakio regbo ti ni mo nikaa diaha kuti mangasunge na agu aũfugo dagbase du rogo Internet?​—Ef 5:15, 16