Gu buku nga Teach Us na gu nga Ziazia Kekeapai Ayugoho ima wira tihe. (I ata sanga gi buku re ku rogo pa-Zande te.) Agi aũsunge ti baraha ue re dunduko kina dagba agu ahe ani amangasunge na ni, na si nayugo kina bangisa rengo ngba bangisa gene a. Ono tie, gi nga Teach Us re namangasunge na taata afugo gbiati aakpura sakarogopai yo. I ambakadihe tipa si undo agu aboro du na kpakarapai ka gia rogo gu buku yo nga Ziazia Kekeapai Ayugoho. Kuba mangasunge na kura apai du rogo gu buku nga Ziazia Kekeapai Ayugoho, gi buku nga Teach Us re na rukutu kekeapai ti digidoho nga gu du na bete sakarogo agu apai du rogo gu wirikapai re. Asanahe watadu sanduki rogo gaha akapita te. Kuba gure, si na gurusigurusi agu arengo nga ga Ziazia Kekeapai nga gu oni awirikihe rogo gu riipai re. Wakina gupai du tipa Ziazia Kekeapai Ayugoho, ani ima rengba ka kparaka gi buku nga Teach Us re ti aregbo dunduko, ka si vura du nga si ani akparakaha rogo gu diwi re te. Wai rengbe ani ka mangasunge na papara gi buku nga Teach Us re ho ani awisigo Ziazia Kekeapai ni na boro?

GURUSIGURUSIPAI: Tipa dungu aboro, gu gaani gene wisigopai nga ki ta geda genewaraga rogo gaani buku nga Ziazia Kekeapai Ayugoho kini fu asanahe ima du ni wenehe gbe. Ono tie, si rengbe ka du nga, bawiriki ziazia kekeapai aruganga tini wenengai na gu fugo re te, watadu ni ainongo wai ka gedapai wenengai te. Rogo gi bangiriba re, mo rengbe na sia ka mangasunge na gu buku nga Teach Us. Fuoho, oni rengbe ka mangasunge na gurusigurusi kapita ni mburu wirikapai na ki ngarasi bawirikipai tipa ni gedi agu apai du rogoho ni ti ni. Saka gu rengo nga ga Ziazia Kekeapai naida si di regbo nga aminiti 15. Wadu he nga, gu gurusigurusi akapita re na agu apai rogoho dunduko du rogo gu riipai re te, si naida bayugupai ima mbakadaha wenengai na pa ga ni bawirikipai ri ni yo. Ka si du nga bayugupai namangasunge na agene waraga rogo gu buku nga Teach Us ka wisigopai na gani bawiriki Ziazia Kekeapai, ni rengbe na mangasunge na gurusigurusipai tipa fugöpai.

GU RUKUTU KEKEAPAI DU TI DIGIDO KEKEAPAI: Agu apai na afugo du rogo gu rukutu kekeapai du ti digido kekeapai yo ti genehe kina kuti wai duhe rogo agene waraga. Bayugupai rengbe ka sia singia ka sakapai tipa gupai du ti gu rukutu kekeapai du ti digido kekeapai yo rogo gu buku nga Teach Us ti regbo wirikapai.