Barambeda, gu zerangbaduse du Yekova na ni koyo du gi zegino re ni nika digo. I nika gbarasa zire pambori, gu badona nga ga rikaaboro re nika zubo ga Mbori aboro, na Yekova nika nyasa riipa gbegberẽ aboro ti regbo Aramegido. AKristano nangera kumbatayo tipa gu regbo agi apai nikaa manga ti ni re.

Rengo ngaha nga, ani ainongo gu futufutu apai dunduko duho tipa bakere gberãngbi te. Ni kpiapai, ani ainongo gu regbo nzunzu si nika tona ti ni te. Ani ainongo gu nduapai abazogo nga ga zegino yo nika fuhe tipa zubo pambori te. Ani ainongo bagizo regbo wai gu zubohe nga ga rikaaboro kuti ga Mbori aboro nika diaha watadu agu apai si nikaa kodaha te. Ani ainongo gu gene nzunzu Yekova nika mangapai a ngbaha tipa ka gbarasa gbegberẽ aboro ti regbo Aramegido te.

Wa vura duhe wo, Ziazia Kekeapai nayugo agu apai furani dunduko si aida ani inihe tipa ka mangapai kuti agu apai du kumbatayo re na ngarã gbiati wingbaduse. Ni kpiapai, ani ima ino gupai nga ani naraka ti digido “kusa rago.” (2Tim 3:1) Ani ima ino gupai nga, i nika “gúrusa” gu zubohe nika du kuti pambori tipa gupai nga ka i gberesinga ndikidi pambori ya. (Mt 24:22) Ani ima ino gupai nga Yekova nika batasa gako aboro abatasa. (2Pet 2:9) Na ani ima ino gupai a nga gu Boro Yekova nasia ni tipa ni gberesi gbegberẽ aboro na ki batasi bakere rimbasa aboro ti regbo Aramegido ni ruruko na kidu na ome.—Yugo 19:11, 15, 16.

Agu apai nika manga kumbatayo nirengo nika sa aboro ‘omeyo ru aru be gunde.’ Ono tie, ka ani aageda pa gu ga Yekova mangapai nga ga batasahe naadu kusayo na kini berẽkuriihe, gbiati agu apai ko nayuguhe tipa agu apai du kumbatayo, ani ima rengba ka ngera ‘ku ari yo na ki tumba rirani’ kidu na gu kido nga gaani bata ima mbeda.—Rk 21:26, 28.