Yekova Mbori naida aboro dunduko, zanga bipa agu apai du tipa yo wirikipai tipa ko na gu gako Kindo du ngbangbaturũ yo. (1 Timoteo 2:3, 4) Tipa gi ndupai re, aDezire Yekova nakusa aBaibiri na agu awaraga du mburuhe rii Baibiri tipa dungu aboro wa rengbe omeyo na ni, kodihe na airangbiängä. Ka pe rengo, gaani riigbu ima kusa dungu kutu awaraga nga ga fugo nibee rogo avidio tipa airangbiängä, a nga gu du awere rogo afugo ni bee naima susa 100! Waigu du ani akusa agi awaraga re na kini kparakaha? Na gini sonakumbatayo ani namangihe vuru agu aregbo yo susi re?

 Agu awaraga nga ga fugo nibee dungu abasafugo rogo zegino dunduko nasaha. Agu awirina nasa agu awaraga nga ga fugo nibee re na wisigopa agu awaraga wenengai si aida i saha. Fuo gure, i nadiaberã tipa wai ka kusa gu memepai du rogo gupai re rogo fugo nibee. Fuo mangayo gipai re, i nade agu apai du rogo waraga kurogo vidio yo. Wa du rago re, badona abasafugo 60 i na sigiraha nasa abuku dedede nga gu naundo rani ani gi rogo sangba Ziazia Kekeapai yo kurogo fugo nibee, na gu kura badona 40 namangaha ti kura aregbo.

 Mbata kusayo, kusa agu avidio nga ga fugo nibee anaadia bakere marã. Gino agu akamera i aarogoda avidio na ni gbiati kura ahe aima du ni bakerehe. Berewe a, i anaade avidio kina rogo agu aba nga ga de avidio nga gu si anaida kina rani mehe, ti kura aregbo, ani anibungia kina gu bambu i aima duaha. Bakio gu marã si anaaidaha dunduko tipa mbakada gu ba safugo nga ga bee sa aniidu nga adorari 30,000 b.

 Tipa ka mangasunge wenengai na gu marã awirina afuhe, gaani riigbu ima mangasunge nyanyaki tipa ka mbakada gu ba safugo nga ga bee na ki sa sunge safugo nibee si du ni taataha. Rogo gi gene re, ani namangasunge na agu aũsunge du awere nga gu du namangasunge ni wenehe na ka ginoho akiongo ya. Kuba gupai nga ka mangasunge na ba de avidio, abasafugo ima rengba ka maa gu kperoko du wa kpe giirago yo kina vuru gayo makatabu yo na kini de vidio. Ho duhe ni nga si naida dungu aboro rogo bangisa vidio sa nga ga fugo nibee, awirina ima rengba ka de gu paparaha du yo rogoyo kina rogo gayo amakatabu watadu kpuyo yo; si aidanga i ndu andu kuba de vidio yo te.

 Ani ima kusa gu mbakadapai nga ga kompiuta tipa si undo abasafugo nibee na gayo sunge. Agu ariapai re ima undo ka zogosa bakio gu regbo kusende abasafugo nibee anaadiaha tipa ka kusa awaraga kurogo fugo nibee. Awirina ima du na tambuahe tipa agi asona kumbatayo re. Wirina du rimoko nga Alexander aya: “I nakusa agu avidio nga ga fugo nibee dedede susi gu nadu mbata. Mi na bakere ngbarago tipa gupai re. Mi nabi agu avidio re na auru dunduko.”

 Awere, si nadia adorari ada nga ti 5,000 ya tipa ka gbia agu ahe si aidaha fu gu badona abasafugo re. Ni sangbana gipai re, ani na rengba ka kusa avidio nga ga fugo nibee rogo dungu afugo yo.

 Barasa kindi badona abasafugo anyasa de fugo nibee, si naida agu avidio re gbia agu aboro si aidaha tipa yo. Mbata kusayo, ani anaakusa akasete nga ga vidio na DVD, ono si anaadia bakere marã, kini di bakere regbo, na bakere sunge. I anaakeda gu dede afugo re kurogo kura abasunge tipa i kusihe ni dunguhe. Ni yangaraha, i anaakeda akasete nga ga avidio gbiati aDVD kurogo kura adungurati. Rogo 2013 nisaha, ani amangisunge na marã nga adorari naima susa 2,000,000 tipa ka kusa aDVD rogo fugo nibee.

 Airangbiängä aima du na bakere tambuahe tipa agu avidio re. Ono tie, si anaadunga taata ti aregbo dunduko ka mangasunge na agu avidio re te, gbe, wa bange akasete nga ga avidio gbiati aDVD aakio kina kumbatayo. Ti kura aregbo, si anaida na dungu aDVD tipa ka defugo kitabu sa nga ga Ziazia Kekeapai. Wirina du Braziri yo du rimoko nga Gilnei aya: “Ai gu regbo ani anaaida ka geda Ziazia Kekeapai, si anaaida ani gbata gu kasete vidio re na tifuoho ani ki gbata gu veresi re. Si aima kpakara ni kerehe.” Wirina du rimori nga Rafayane, nga gu ri namangisunge na aDVD nga ga fugo nibee aya: “Si aima du ni pa mbugo ka manga wisigopai nisase. Ani anaadia bakere regbo tipa ka gbata averesi watadu ka wetekaapai.” Na ho awirina anaandu ni gene tungusapai yo, i anaadia aDVD watadu akasete nga ga avidio na yo, nga gu i anirengbe ka maaha fu gu boro nanidu na nyemupai rogo gani terevizioni. Zavura kura awirina anadia kina boro gayo DVD nitiyo kaa maaha rogoho. Ono tie, fuo ho aturongo te, i ki mbakadi gu DVD nadu taata tipa ka tindaha nadu na kpakpuhe tini, na dungu awirina amangisunge na ni. Bobby, nga guko naraka Amerika yo aya: “Ka si dunga tifuo manga mo sunge na veresi sa mo naida ka mangasunge na gu kuraha, dedede si anaida mo ndu kurogo kura DVD berewe kia. Gipai re anadia regbo na si anaasa ha ni kpakarakpakaraha gbe tipa ani mangisunge na Baibiri.”

 Rogo 2013, ga Yekova riigbu akusi JW Library Sign Language app, nga gu nasa awirina i naazoga avidio nga ga fugo nibee na kini moihe rogo aterefuni na ataburet. I akusi gu bangiriba ni bambataha nga ga Fugo Nibee nga ga Amerikani. Fuo gure, rogo 2017, i ambakadihe berewe tipa gu kura afugo nga ga bee du dunduko rogoyo. Awirina rogo zegino dunduko naadu na bakere ngbarago. Juscelino, nga wirina du Braziri yo aya: “Kina ngbare nazere! Mi aaberã kindi tipa wai Riigbu Bipasunge ayugo nyemuse furani nga airangbiängä na wai i aida ani mangi sonakumbatayo rogo rengo yo wakina agu aboro nafura afura tigayo. Mi adu na bakere ngbarago gbe, na gu bangiriba re asa re mi wisigi Baibiri ni bakerehe.”

 Areme, ani nakusa avidio dunduko nga ga fugo nibee rogo Internet na kini kparakaha kurogo gaani bangiriba na rogo JW Library Sign Language app. Ni sangbana gipai re, i ima rengba ka sa agu awaraga nga ga fugo nibee ki de fugoho na ki kparakaha vuru bete auru yo angianga tipa adiwi watadu agarã aya. Nirengo, dungu agu awaraga nga ga fugo nibee i akusaha sa na agu nga ga agu aboro nafura afura.

 Oni bingo agu apai kura agu awirinarani nga airangbiängä agumbaha. Wirina du rimori nga Klízia aya: “Gini kura riigbu duho nangerafuo airangbiängä ni bakerehe na ki du na nyemu ka fu agu ariahe nga ga toro fuyo ngba gu gene du ni taataha? Pai ho rogo zegino rengbe ani ka ringbisaha kuti gupai ga Yekova riigbu amangaha furani te.” Vladimir aya: “Avidio nayugo gupai fere nga Yekova nangerafuo airangbiängä ni bakerehe kina wai ko angerafuo agu aboro nagiapai agia.”

 Dedede, gaani avidio nga ga fugo nibee na gupai rogoho du kusende re nga: “I akusi gi waraga re tipa si undo gu sunge yugo Ziazia Kekeapai namanga rogo zegino dunduko, nga gu sunge nandu kumbatayo mbiko agu agamahe aboro afuhe.” Ani na bakere tambuahe tipa agu agamahe oni afuhe, dunguhe oni afuhe rogo donate.pr418.com. Agu agamahe re sa gupai nga ani kusi Baibiri na agu abuku naundo aboro dunduko i giarogo Ziazia Kekeapai yo, kodihe na agu aboro namangasunge na fugo nibee.