Rogo gu garã nga ga sunge nga 2021, a zegino aandu kumbatayo kaa mbu be gu kaza nga Korona. A wa i asakipai tipaha rogo gu kekeapai nga, “Global Relief for a Global Pandemic” (Fu Undo Rogo Zegino Dũ Tipa gu Ririkaza Namanga Rogo Zegino Dũ), ani ima mangasunge na amirioni adorari b tipa ka fu undo na ani ima kusa Agu Arondo Du Tipa fu Undo ti Regbo Gberãngo bangehe naima susa 950.

 Nirengo, wa Korona aandu kina kumbatayo ni kerehe, gu kura agberãngo nga gu naye be ome zegino na agu wiri aboro aye na ni aima du na maapai kurii awirinarani rogo apapara zegino. Tipa ka mangapai kuti gu ngbatunga agberãngo re nga gu bangehe aima susa 200, gu Rondo Nga ga Abangerekurii Sunge Nga ga Riigbu Bipasunge aidipa adorari nga amirioni muambe kupati gu undo i afuhe tipa Korona. Oni bingo wai i amangisunge na gaoni agamahe tipa ka undo agu aboro ngbatunga agu agberãngo re afudiyo bambeda kusayo.

 Rogo Merekoko 22, 2021, Gangara Nyiragongo, nga gu gangara ninaafuko kini zaraga Congo yo atona ka zaraga. Gu zaragazaraga fofõi-ime-mbia naakura agbarasi akporo, asukuru, gbiati gege aime. Ono anga kina zaragazaraga fofõi-ime-mbia sa nangia gu yangara kerepai te. Arame kusa, tingbafuo zaraga gu gangara re, nvutuhe nga gu du na simi ti ni atitiwi kurii gu gbata nga Goma na dungu rukutu abazigizo ki mangi. Na i aya fu aboro bangeyo naima susa bebere agu aboro naraka rogo gu gbata re i guari kusayo. Akama akutu aboro azubo, na agu akurayo ki ima ndu ku Rwanda yo.

 ADezire Yekova wa 5,000 adu dagba agu aboro nazubo rogo akpuyo. Gu ime mbia re aima gbarasa ga agu akurayo akporo; na agu akurayo adu kinaho i aima dĩ gayo ahe rogo akpuyo fuo zubo yo. Agu arondo du tipa fu undo ti regbo gberãngo Rwanda yo na Congo yo amangisunge sa tipa ka fu undo. Nibipa kura gu rondo sa du tipa fu undo, gu be-basunge nga ga Congo (Kinshasa) aya: “Wa si avura du nga apai adu ni vunduvunduhe vuru gbata na zavura mbata fu i fu gu rugapai nga aboro guari kusayo, gu rondo re aima tona gama riahe, ime, aba rame, gbiati aroko.” Rogo kura gbata sa nga gu awirinarani bangeyo naima susa 2,000 adunguratiyo ku rogoho, gu rondo du tipa fu undo ambakadi abamburoko, ki fu aroko dada ngba, na ki sakipa wai rengbe yo ka banda tiyo be Korona na korera.

 Vuru adiwi yo biata nga ga gu gberãngo re, awirinarani akparaka dungu asuari mapunga, dungu asuari ngungo ngbaya, nzeme manga riahe ni bakerehe gbiati mbirimbiri ime ni bakerehe. Tipa ka banda marã, be-basunge amangi mbakadapai tipa ka ngbe riahe kina rogo gu ringara re ni bakerehe kuba gupai nga ka ngbehe na kiki genoho rogo kura ringara kia.

 Kura wirina sa gari vovo kporo agberẽ be gu zaragazaraga gangara re aya: “Ani adu rogo bakere gberãrago na rogo imisiri.” Ono fuo gure, gari riikporo kini gbia undo nga ga borose na gu nga ga toro. Ri nape gupai awere nga: “Na ga Yekova undo, ani kindi na agu ahe berani ani aidaha. Ani ima bi gupai nga Yekova natinda gaani atindiro na kini saha taata furani ani tindihe.”

 Venezuela ima mbu be bakere zingo mosoro tipa dungu agarã. Agu awirinarani du yo nahi kere sino raka, zingo riahe, gbiati bakere gbegberẽ apai. Ono tie, ga Yekova riigbu ambunga yo te.

 Rogo gu garã nga ga sunge nasusi, i amangisunge na marã naima susa mirioni sa na beberehe tipa ngbeka ariahe na asabuni (savon) na tipa kedaha fu rungorungo ariikporo. Gu be-basunge nga ga Venezuela aya: “Taatapai ngaha ka tinda riahe ni bakere he ku rogo apapara ringara dunduko na adiwi dũ na kini fukuhe fu agu awirina du rogo zingo te.” Tipa gupai nga ka riahe gberẽnga ya, awirina ninaakeda agu ahe dedede agberãnga ni ipo ya. Gu be-basunge re ape gupai berewe nga: “Badungu ariahe ani naangbehe ni bakerehe na ti regboho na ho du agenoho ni kusende. Fuo gure, ani kini tindihe na agu aũnduge adianga bakere marã ya.”

 Leonel, nga guko du rogo gu Rondo Du Tipa fu Undo ti Regbo Gberãngo Venezuela yo, ima kpinyemu gako sunge. Ko aya: “Sunge fu undo ima du ni kparakparaha. Gi kparakpara sunge re ima ngarasa re nirengo, naatona ti gu regbo diare akpi be Korona. Mi nafu tire ti aregbo dunduko tipa sunge na mi nabi tire nga mi na nyanyakipa re fu agu awirina du rogo zingo. Mi ima bi wai nitire Yekova akakuti gu gako kidohe du tipa zanga mbu gako aboro.”

 Kura wirina sa naagbia undo aima mangasunge mbata rogo gu rondo du tipa fu undo ti regbo gberãngo. Ko aya: “Gure angia regbo fere tipa mi idi na undo tigimi. Ani aagbianga kina gu undo sa nga ga borose te. Awirina aima undo re a na diare tipa ani du zezeredi. I angerefuo rani, ki fu wasa furani, na ki ngarasi rani.”

 Kura agberãngo kinaho namanga ka bakere zahe adunga mbata tipaha ya watadu ka zahe adunga kandara tooni ya. Ono tie, dedede, ga Yekova riigbu nidu na rengba ka gbia agu ahe nafu undo kini fuhe ni kina boro ipo, gipai re namanga mbiko agu agamahe oni afuhe tipa si undo na gu sunge namanga rogo zegino dunduko. I sakipai tipa gu kura agene du tipa fu gamahe rogo donate.pr418.com. Ani na tambuahe tipa gaoni sino nga ga gamahe.