“Riigbu Bipasunge ima manga diaberã nga i nangarasa adungurati dunduko i tona nduge tipa adunguratise ku Bambu Kindo yo rogo gu poso nga ga Zerekpe 1, kina gu ka si dunga rengba ho tipa ka manga adunguratise Bambu Kindo yo te mbiko irangbii ima maa andiko tipa ka aboro dungura nga tiyo ku rogo ba sa ya.” Gu tingidapai i amoi he rogo jw.org ti tonatona gu diwi nga Marungu 2022 aima sa aDezire Yekova rogo zegino dunduko i du na bakere ngbarago. Ono gu kaza nga Korona aanyasanga kindi te. a Gini apai na gini ahe si aaidaha tipa ka banda agu aboro nikaa ndu tipa adunguratise tipa ka i dinga gu gbiro kaza nga Korona ya? Tifuo agarã wa ue zanga ani naakoda tirani ku rogo basa tipa adunguratise, ya mo gaani aBambu Kindo adu ni wenehe tipa kaa manga adunguratise rogoho?

 Ni rengo, awirinarani aima digo ni mbakaditiyo tipa dungu adiwi tipa ka tona nduge tipa adunguratise ku rogo gayo aBambu Kindo.

 Tifuo diwi sa fuo mbu ani dungura tirani ku rogo ba sa kaa manga adunguratise rogo 2020, gu basunge nangerafuo meka arago nga Worldwide Design/Construction Department (WDC), du Warwick yo, New York yo, atona ka berãkurii pa wai gu kaza nga Korona nika du na sangbanaha kurii gu gene ani amangasunge na gaani aBambu Kindo ngbaha na agu apai si aida i mangihe tipa ka sa gaani aba adunguratise si du ni bandabandaha.

 Dedede, gupai si aaidaha rogo gu kura papara zegino adu kia tigu si aaidaha rogo gu kura aba. Gu wirina du rimoko nga Matthew De Sanctis, nga gu ko namangasunge na Worldwide Design/Construction Department aya: “Rogo kura arago, gu kpakarapai duho nga, si ima kpakara kadu na ba tipa zunda bese. Ho adunga ime ni Bambu Kindo yo ya, si naida i ngbe ime angbe watadu ka tu he rogo gu di du rogo gu dagbarago re. Rogo kura aringara, airangbii aima manga kura aʹariapai nibipa guhe nakusa zezere wege, na gu kekeapai si aida i moihe nibipa banda kpotose na giro.”

 Waigu awirinarani amangipai kuti gi kpakarapai re? Matthew aya, i abi gupai nga tipa badungu aBambu Kindo, “mangasunge na agu ahe adianga bakere marã ya aima undo ni bakerehe.” Ni kpiapai, rogo gu ringara nga Papua New Guinea, i amangisunge na akandi bakioho adu nga aritere 20 na aime rogoho tipa aboro naazunda beyo na ni. Awirinarani aima du na rengba ka ngbe agu ahe si aaidaha tipa zunda bese rogo agu aBambu Kindo du rogo agu arago du gbaria yo na adorari gbua nga 40. Tipa agu aBambu Kindo du Afirika yo, wene aũbazunda bee bangehe naima susa 6,000 i angbehe be ababagiahe Asia yo.

 Gu kura aʹariapai berewe aakoda maa agu ahe nafu zezere wege tipa gupai nga aBambu Kindo du na wene wege rogoho. Badungu adungurati angbe guhe du ni gbangaha tipa kaa maa gayo makorofoni tini tipa gupai nga ka dunga aboro ninazadanga ha ya. I aima manga bakere asadatise tipa kaa giriso agu aba aboro ninaazada ha dedede, wa be angbadimo na angoro auzunda bee, nga agu aba boro narengbe ka dia gbiro Korona ti ni niipo. Rogo gayo abambu ageno, gu kura adungurati amoi gu ũzunda bee nazaka nisaha na kini kisi. Rogo gu ringara nga Chile, manga agu aʹariapai si aaidaha adi marã nga adorari 1,400 tipa aBambu Kindo ni basasa.

 Wa i amaaberãyo tipa ka sa aBambu Kindo si du ni bandabandaha, awirinarani aasadi ka mangasunge na agu agamahe awirinarani aafuhe ngba wene gene. Ni kpiapai, rogo gu kura arago, i amangisunge na gu undo airangbii afuhe tipa ka tumo tipa aũzunda bee. Be-basunge amangisunge wa sa na awirina tipa ka banda agamahe ningbe yo aũzunda bee ni bakerehe kisusi wai si nidu mbata. Abe-basunge gbiati Gu Basunge Nga ga Ngbeka Ahe Rogo Zegino Dũ ninaamanga mbakadapai tipa ka ngbeka ahe be kina agu aboro nambakadaha, si kini sa gupai nga geno agu ahe re du kusende na agu ahe re ki da rogo gu ba si andu ku rogoho niipo.

 Gu mbakadapai nga ka sa aBambu Kindo si du ni bandabandaha be Korona ima banda agu aboro natona nduge tipa adunguratise ku rogo ba sa. Dulcine nga wirina ni dee rogo gu ringara nga Peru ape gupai nga, ri “adu adu na bete gunde” rogo ri yo ho ri aini gupai ni nga ani nika karagatirani kaa manga adunguratise Bambu Kindo yo. Ri aya, “Gu kaza nga Korona azi re ngbutuko fuo tona gu ririkaza re. Sidu, mi aagunde agunde ka tona nduge ku Bambu Kindo yo mbiko mi aabihe nga mi ima rengba ka dia gu gbiro kaza re berewe. Ono ho mi ada ni Bambu Kindo yo, mi abi gupai nga, abaakumba ima manga badungu apai tipa ka banda rani, ngbatunga apai wa mangasunge na agu he na imo agbiro kaza, aũzunda bee, na mbakadapai tipa kaa giriso vuro Bambu Kindo mbata fu adunguratise na tifuoho. Agi apai re dunduko adu fere ni gu ngbatunga bandahe mi aaidaha.” b

 Sara, nga wirina Zambia yo agbia tiri na kura kpakarapai kia. Ri aya: “Dungu adiwi kusayo, kumbami akpi be Korona. Mi aabaka kina bangire tipa wai mi nika du ho mi nika ndu ni ku pati adunguratise ti bambata regbo zanga ko.” Waigu apai aʹariatihe furi? Ri aya: “Nduge tipa adunguratise ku rogo ba sa ima yugo gupai fere nga Yekova na kina rani rogo gi yangara arame re. Mi nabi tire awere susi gu ni du mbata nga, mi nagbia gu ngarasaro agbia na nyemuse gbiati undo mi aidaha be abaakumba gbiati awirinina.”

 Awirinarani airisimbori rogo zegino dunduko na ngbarago tipa gu momu nga ga karagatise kaa manga adunguratise Bambu Kindo yo. Tambuahe furoni tipa gaoni agamahe, i aafu badungu agu agamahe re rogo donate.jw.org. Agi agamahe re aundo rani tipa ka sa aba ziazia irisombori si du ni agu aba du wenengai na ni aba bandahe fu awirinarani i naadunguratiyo ku rogoho.