Rogo Bamburu kuti Buza 2020, gere nika ngia bambata regbo fu awirina rogo zegino dunduko i gi bangisa agumbapai nga ga bakere dunguratise ti bangisa regbo sa. Tipa ka sa gipai re si mangi, si aaida i sa agumbapai ku rogo afugo naima susa 500. Dedede, si naadia garã sa watadu agarã tipa ka manga mbakadapai tipa gi sunge re, na ka sa agi agumbapai re na ka de woro ho gbiati ka de avidio. Ono bambiko gu riri kaza nga coronavirus, si aaida awirina sa agu agumbapai nga ga gu Bakere Dunguratise Nga ga 2020 du riihe nga, ‘Oni Ningí Dedede’! vuru adiwi yo biama.

Gu Basunge Nga ga Sapai na gu Basunge Nga ga Ngbeka Ahe Rogo Zegino Dũ du Rii-basunge yo nga ga aDezire Yekova, aundo gi bakere sunge re. Gu Basunge Nga ga Sapai abi gupai nga, badungu abasa-fugo naida na amakorofoni tipa ka manga gi sunge re, gbe, agu amakorofoni du ni wenehe. Gu Basunge Nga ga Ngbeka Ahe Rogo Zegino Dũ angbeke amakorofoni nga 1,000 na ki kekedihe ku rogo aba wa 200.

Tipa ka banda marã, gu Basunge Nga ga Ngbeka Ahe Rogo Zegino Dũ angbeke badungu amakorofoni. Na i adungura agu amakorofoni re ku rogo ba sa na fuoho, i ki kekedihe fu abasa-fugo. Bambiko gupai nga ani angbe badungu amakorofoni, makorofoni sa aadia marã nga 170 adorari, kodihe na gu marã i akedihe na ni. Gu marã re ima du kusende ti gu ka si adu nga ani aangbekaha nibasasa.

Si aaida Gu Basunge Nga ga Ngbeka Ahe Rogo Zegino Dũ ngbeke agi ahe re na ki mangi mbakadapai tipa kedaha rogo Zerekpe na Merekoko 2020. Gu regbo re, badungu ababagaahe aamanganga sunge wa gu nidu mbata te mbiko ririkaza. Wa si avura duwo, bara ti digido Merekoko, badungu agu aba safugo du tuturũ, abe-basunge, gbiati gu kura abasa fugo, aima gbia gi ũsunge re.

Jay Swinney, nangerakurii gu Basunge Nga ga Ngbeka Ahe Rogo Zegino Dũ aya, “wene giatise naadu bangbanda agu abasunge du Betere yo na ababagiahe ni basasa nga aguyo naadu rogo gi mbakadapai re da kuti digidoho. Ani adu na rengba ka manga gipai re ni wiri ipo na ka mangasunge ngba wene gene na gu gamahe aboro afuhe tipa ka undo awirinarani mbiko kina gu undo nga ga ga Yekova toro.”

Nicholas Ahladis, namanga sunge rogo Gu Basunge Nga ga Sapai aya: “Agu abasafugo naadu ni kisikisi yo ku rogo basa ti gu regbo re aima gbia ngarasaro ni bakerehe ho i agbia agi ahe re ni. Wa i avura du ni kparakpara yo ti agu akurayo i naamangasunge nayo, i aima du na rengba ka mangasunge kina sa tipa ka defugo agumbapai, adrama gbiati abia rogo afugo niima susa 500.”

Gi sunge re du du dagba agu sunge yo i mangihe tipa ka kusa gu bakere dunguratise nga ga 2020 du riihe nga, ‘Oni Ningí Dedede’! Gu Bakere Dunguratise du tipa awirina rogo zegino dunduko. Gaoni agamahe rogo gu bangiriba nga donate.pr418.com na kura agene asaha taata i ngbeke agi ahe re.