Agu avidio du ba gaani bakere adunguratise yo nazio ngbadurani yo na kini undo rani ani girogo agu ayugopai yo nga ga Ziazia Kekeapai wenengai. Avidio adu dunduko nga 114 rogo gu Bakere Dunguratise nangia ga 2020, ‘Oni Ningí Dedede’! kodihe na agu agumbapai 43 Riigbu Bipasunge gbiati gayo amoundo amangihe. Ya mo mo aberẽnga pa bakio gu sunge namangi na bakio marã wai si aaidaha tipa agu avidio re kuru?

 Awirina rogo zegino kirikiri bangeyo niima mbeda kuti 900 nafu tiyo ka mangasunge na gayo regbo gbiati gayo birĩ tipa ka undo ka kusa gi mbakadapai re. Bange agu asaa i adihe ima mbeda kuti 100,000 nga gu nadi agarã niima susa ue tipa gi sunge re. Si nakoda agu asaa du bangehe nga 70,000 si aaidaha tipa ka nyasa gu drama du mburuhe rii Ziazia Kekeapai naadu tipa aminiti 76 nga Nemaya: “Ga Yekova Ngbarago Nga Gaoni Ome.”

 Ni rengo, si nadia bakere marã tipa ka ngerafuo agu abaundosunge nafu tiyo re na ka fu kura aundo fuyo, agu ahe si aidaha tipa ka kusa vidio, gbiati gu ba si aidaha tipa i nyasi gu sunge re rogoho.

 Jared Gossman, nga gu ko namangasunge rogo gu basunge nangera kurii sunge de fugo gbiati avidio i ayambaha nga Audio/Video Services aya, “Gu Rondo Nabipa Sunge Yugopai nga ga Riigbu Bipasunge nzunzu na nyemu ka koda sino mangapai nga ga aboro gbiati aba ku rogo gaani avidio. Si wo mbiko ani nga awirina du na kodatise rogo zegino dunduko na ani naida avidio yugu gipai re. Tipa ka da ti gi sasa re, aboro du bangeyo 24 namangasunge rogo aringara ni bakiakia du bangehe nga 11 amangisunge kina sa tipa ka manga gi sunge re. Ani aaida na bakere marã, manga mbakadapai, gbiati ka gbata aboro i mangisunge kina sa rogo zegino dunduko.”

 Tipa ka kusa badungu gaani avidio, ani naida na aũ avidio gbiati aba tipa ka rẽka ha. Ni kpiapai, i arẽkepa wai ka kusa gu vidio nangia Nemaya: “Ga Yekova Ngbarago Nga Gaoni Ome” vuru gu ba de afugo na avidio du Mt. Ebo yo du mbembedi na Patterson, New York, Amerika yo. Tipa ka mangasunge wenengai na agu agamahe aboro afuhe tipa ka kusa gu vidio du ni ruruhe wa gu si adu mbata kusayo, awirina ambakadi rago si naangera wakina agu angapa nadu rogo gu Yerusarema nadu mbata. Agu angua i ambakadihe rogoho bagizoho adu wa ametere sita (dagbandue 20) i akpe kpotoho si naangera wa ambia. I aima rengba kaa gbisa agi “angapa” re tipa agu apai nadu rogo gu vidio re ni bakiakia, gipai re azogosi pa bange agu ahe ka i arẽke he. Wa si avura du wo, adorari niima mbeda kuti 100,000 si aaidaha tipa ka rẽkapa drama ni tihe. a

 Pa ino ani gu futufutuapai re nakiiso gaani tambuahe tipa gu mbakadapai nga ga bakere dunguratise nangia ga gu garã re. Ani na gu kido nga sangbanaha gu ome dunduko si adihe tipa ka manga gi mbakadapai re nika ngia aboro dunduko rogo zegino nika ngbiko na ngbarago ka sambuo Yekova. Tambuahe tipa gu wene toro du tironi nga ga fu agamahe tipa gu sunge namanga rogo zegino dunduko vurube donate.pr418.com na gu oni afuhe ngba kura agene.