ONI NGÉRE TIE!
2022: Garã Nga ga Fudifudiapai—Ginipai Baibiri Ayugoho?
Rogo gu garã nangia 2022, avura, kere zingo marã na gu gberãngo naye be ome zegino ima maapai rogo apangbanga. Kina Baibiri sa nasaka gu ndikidi ndupai agi apai re amanga ti ni.
Ndu Agu Apai Namangi Rogo 2022
Agu apai namangi rogo gu garã nasusi nayugo gu gopai nga ani naraka ti gu regbo Baibiri ayambaha nga “kusa rago.” (2 Timoteo 3:1) Gu regbo re atona rogo gu garã nangia 1914. Mo bingo wai agu apai mangi barambeda kusayo andu sa na gupai Baibiri agumbapaha kumbatayo tipa gi gaani regbo re:
“Avura.”—Matayo 24:6.
“2022 Angia gu Garã Ringara Putu Agbiatihe na gu Gbegberẽ Sangbanapai Vura Aye na Ni.” a
Mo bi gu kekeapai nga “Russia Zubo Ukraine na Vura.”
“Angbongi.”—Matayo 24:7.
“2022: Gu Garã Nga ga Kere Zingo Riahe.” b
Mo bi gu kekeapai nga “Gu Vura Namanga Ukraine yo Naye na Zingo Riahe Rogo Zegino dũ Kina Kumbatayo.”
“Gberãngbi, watadu “kere ririakaza.”—Ruka 21:11.
“Gu kaza nga Polio atona berewe, gu kaza nga monkeypox ki da ni kerepai, na gu kaza nga Korona kini ndu kindi kumbatayo kaa ye na bakere rungo. Agi apai re ima yugo wai nzunzu du riri akaza ni kerepai gbiati wai adunga aboro ni bandabanda yo ya.” c
Mo bi gu kekeapai nga “Aboro du Bange yo Nga Amirioni Sita Ima Kpi be gu Kaza Nga Korona—Ginipai Baibiri Ayugoho?.”
“Baiiriwo apai.”—Ruka 21:11.
“Faarago, ugure, gbitiko arago, na hihi ime. Gu kitö nangia ga 2022 aima ye na gbarasahe nga gu sa kutu aboro i kpiki na ki sa amirioni aboro rogo zegino dunduko i zanga akpuyo.” d
Mo bi gu kekeapai nga “Rogo Zegino Dũ, Rago Nafaa Nikerehe Susi gu Nidu Mbata.”
“Woro ahe [watadu vunduvunduapai].”—Ruka 21:9.
“Mbiko wa du aboro ni zingizingi yo mbiko gu kpakarapai nga ga zingo marã, gu susi gbe nga pa wai geno marã adakpa kuari, dungu aboro ima yugo gayo gberãrago fu gayo airangbii rogo 2022.” e
Mo bi gu kekeapai nga “Sona Geno Ahe Kina Kumbatayo Rogo Zegino Dũ.”
Ginipai nika manga rogo gu garã naye re?
Boro ho ini gupai nzunzu nika manga rogo 2023 te. Gupai ani nainihe nga barambeda, ga Mbori Kindo, watadu gu zogarago du ngbangbaturũ yo, nika ye na bakere ariapai ku auru kpotosende. (Daniere 2:44) Gu zogarago re nika dia gupai kusayo naye na rungo kuti wiri aboro na ki sa gupai Mbori akpinyemuhe si mangi auru kpotosende.—Matayo 6:9, 10.
Ani nangarasa ro mo pekefuo ga Yesu Kristo rugute na kini “ngére angera” tipa wai agu apai namanga rogo zegino adigiso gu sangbaanebi nga ga Baibiri. (Marako 13:37) Mo sanahe tipa ka ino gu kura dungu apai tipa wai rengbe Baibiri ka undo ro awere na wai rengbe he ka fu ndikidi maabangirise foro kumbatayo gbiati gamo aboro kporo.
a AP News, “2022 Angia gu Garã Ringara Putu Agbiatihe na gu Gbegberẽ Sangbanapai Vura Aye na Ni,” fugo Jill Lawless, Banduru 8, 2022.
b World Food Programme, “Gu Garã Nga ga Kere Zingo Riahe.”
c JAMA Health Forum, “Raka ti Regbo Riri Kaza—Tona ti gu Kaza nga Korona kida ti Monkeypox, Polio, na Disease X,” fugo Lawrence O. Gostin, JD, Mbirinvuo 22, 2022.
d Earth.Org, “Gupai Naasa Bakere Faarago rogo gu Kitö nga ga 2022?” fugo Martina Igini, Tanvuo 24, 2022.
e Carnegie Endowment for International Peace, “Yugo Gberãrago Mbiko Zingo Marã Moipai Rogo 2022,” fugo Thomas Carothers na Benjamin Feldman, Bamburu 8, 2022.
Gere Ima Rengba a ka Ngba Tiro
NGBAÕBAMBU SINZIRI
Mbori Nika Digiso Arungo Dunduko Barambeda
Wai gu Mbori nika mangapai barambeda tipa ka digiso arungo gbiati iraira mangaapai?
ESSENTIAL BIBLE TEACHINGS
Ga Mbori Kindo Nga Gine?
Ti regbo ga Yesu tungusapai auru kpotosende ane, ko ayugupai tipa ga Mbori Kindo kisusi gu kuraapai dunduko. Tipa dungu kama agarã, aboro aima digo ni kpari tipa gu Kindo re ye.
AGU APAI DU TIPA RANI
Mo Sanahe Tipa Wirika Baibiri
Mo gbia gu wirikapai nga ga Baibiri ti gu regbo na rogo gu ba ngba tiro.
