ONI NGÉRE TIE!
Nduapai Tipa du na Maabangirise Rogo 2023—Ginipai Baibiri Ayugoho?
A wa gu garã nga 2023 atona, ani dunduko namaabangirani tipa weneapai tipa tirani gbiati gaani aborokporo. Tipagine rengbe ani kadu ti ni na gu maabangirise re?
Baibiri Nafu Maabangirise
Baibiri nape gu wene pangbanga furani nga, agu akpakarapai ani agbiatirani na ni awere, si tipa bete regbo na si nika digo barambeda. Gu rengo du ho nga i ‘ake Ziazia Kekeapai tipa gaani wirikapai, ani moi bangirani mbiko gu zera nga ga kekeapai na wasa.’—ARomo 15:4.
Tipa ka ino kura apai tipa gu maabangirise Baibiri afuhe, mo gedi gu kekeapai nga “A Real Hope for a Better Tomorrow.”
Gu Maabangirise Rengbe ka Undoro Awere
Gu maabangirise nga ga Baibiri rengbe kadu “wa ũzada mbisimo.” (ARomo 15:4) Gu maabangirise re ima rengba ka banda rani. Si rengbe ka undo rani ani dibe agu akpakarapai ani agbiatirani na ni awere, ki du na ruru bipai, na ki gbia gu ngbarago adigongo ya. Ni kpiapai:
Mo bingo wai gu maabangirise nga ga Baibiri aundo kura kumba sa ko dibe gu mangapai naima zio baha tiko. Mo bi gu vidio nga ‘Rago Aangbanga Tire na Gimi Gene Raka Te’.
Mo bi wai gu maabangirise nga ga Baibiri narengbe ka undo rani ho ani na zanga gaani boro ni rogo kpio yo. Mo bi gu vidio nga Wasa fu Agu Aboro Zanga Gayo Aboro Rogo Kpio Yo.
Mo Nyakasi ga Maabangirise
Dungu aboro namaabangiriyo tipa weneapai, ono i arengba nga kadu na gu kido nga agu akidohe re nika digiso tihe adigiso te. Agu akidohe nga ga Baibiri kia. Tipagine? Bambiko agu akidohe nga ga Baibiri re naye be Yekova Mbori a nitiko, “nga gu Mbori, arengba nga na re zire ya.” (Tito 1:2) Kina Yekova sa du na ome beko tipa ka digiso gako akidohe dunduko; mbiko “gu ngba ti Yekova, kina ha mangi ko ho.”—Atambuahe 135:5, 6.
Ani nahõpai bero mo gbia undo ti gu ndikidi maabangirise nga ga Baibiri. Mo rengbe ka nyakasa gamo kido kuti ni ni ‘niwisigo mo Ziazia Kekeapai.’ (Amokedi 17:11) Mo bi gipai re ni tiro ni asada mo gu gaani gene wirika Baibiri du gbua. Mo tona gu garã nga 2023 na wene maabangirise tipa kumbatayo!
a Yekova nga ndikidi rimo Mbori.—Atambuahe 83:18.