Rogo 2022, azogarago rogo zegino dũ agbarasi adorari nga 224 atiririoni kuti gayo abanzengere. Gipai re amangi mbiko gupai nga Russia azubo Ukraine na vura. Gere ringbisihe kuti gu tingidapai i akusihe rogo Zerekpe 2023 rogo gu ba wetekaapai nga Stockholm International Peace Research Institute (SIPRI), naadu rogo 2022:

•   Gu marã gu zogarago nga ga Putu amangisunge na ni “asono kuari na 13 rii kama rogo gu garã re, nga gu bakere marã gu zogarago nga ga Putu namangisunge na ni rogo garã sa nga gupai naamangi sa kina rogo gu garã nangia 1991.”

•   “Russia…akiisi gu marã i naamangasunge na ni na 92 rii kama, nga gu nadiyo ti namba bisue kuti namba biata dagba agu aringara namangasunge na bakere marã tipa vura.”

•   Amerika nye kindi ni namba sa rogo pa gbarasa marã mbiko i “a mangisunge na 39 rii kama nga ga gayo marã tipa ka ngerafuo gayo abanzengere rogo zegino dunduko.”

 “Pa wai azogarago andu kindi kumbatayo kaa kiiso gu marã i amangasunge na ni tipa gayo abanzengere nga gu gopai nayugo gupai nga ani naraka rogo gu zegino pa du ani ni bandabanda rani agberã kina kumbatayo,” gere nga afugo Dr. Nan Tian, nga boro sa dagba abakeke apangbanga nga ga SIPRI.

 Baibiri aima fura kumbatayo nga agu azogarago du na ome nika du na bakere zangagiatise gbiati akpakarapai na agu akuraha, na si nagumba pa gu yangara pai rengbe ka ye na ndikidi zereda.

•   Baibiri nafura tipa gu regbo ani araka rogoho ya si nga “digido” regbo—Daniere 8:19.

•   Gu buku nga Daniere agumba gupai kumbatayo nga ti gi regbo re, azogarago ue du na ome nikaa sovura dagbatiyo. Agi azogarago du na ome ti ni re nikaa “zubo” tiyo watadu ka sovura tipa dia pagbia. Mbiko gi gayo vura re, i nikaa mangasunge na dungu “ahe,” watadu marã.—Daniere 11:40, 42, 43.

 Tipa ka ino dungu apai tipa gi wene sangbanebi re, mo bi gu vidio nga Digisidigisi Sangbanebi—Daniere Kapita 11.

•   Baibiri nagumba gupai nga Mbori nika ye na kura zogarago kuba ga wiri aboro. Ko “amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.”—Daniere 2:44.

•   Yekova a Mbori nika manga gupai ka wiri aboro amanganga ha ya nga ka ye na nyenye zereda. Waigu ko nika mangaha? Gako Kindo nazogarago ngbangbaturũ yo nika dia aũvura dunduko kusayo na ki digisi avura dunduko.—Atambuahe 46:8, 9.

 Tipa ka wirika gu kura apai tipa gupai ga Mbori Kindo nika mangaha, mo gedi gu kekepai nga “Under God’s Kingdom ‘Peace Will Abound.’”