Barambeda kusayo, abazogo zegino, aboro-birĩ-inohe, gbiati agu aboro du na birĩ mbakadaahe ima fura tipa wai du agu ahe aboro ambakadaha na ome kurii aboro. Wa i navura ka ino gu wenepai du ti ni, i gu duadu na bakabangirise tipa gu kerepai rengbe ka manga mbiko pa zanga mangasunge na ni wenengai.

•   “Agi ahe aboro ambakadaha re na bakere rengbanapai ti ni, si na rengba ka mbakada ga aboro raka . . . Ti kina gu bangisa regbo re, agi au birĩ-ino-mangaahe re nakiiso pa zanga du aboro ni bandabanda yo kina kumbatayo, si nadia agu apai be aboro rengbe yo ka mangaha na kini saha ni mbumbuhe tipa ani du na kido kuti gu zogarago i afu ga aboro rengo rogoho.”—Kamala Harris, du fuo bazogo nga ga Amerika, Marekoko 4, 2023.

•   “Wa vura duhe nga agi ahe aboro ambakadaha re ima rengba ka fu undo fu boro kaza ngba kura gene, si ima rengba a ka imisa rani ti kpotorani watadu berãrani yo ngba gu kura agene,” gere nga fugo badona agu amunganga du gayo bangbembatayo nga Dr. Frederik Federspiel, i apehe rogo gu kekepai nakuru rogo Merekoko 9, 2023, rogo gu basunge nabipa kpotose nga BMJ Global Health. a

•   “Agi ahe i ambakadaha re ima rengba kadu ni ũsunge tipa gbaraga ziree apai. Barambeda, si ima rengba ka dia agu asunge be aboro i mangaha. Bete agu aboro namangasunge na agi au birĩ-ino-mangaahe re nabaka bangiriyo nga kumbatayo agi ahe re ima rengba kaye na ka kerepai kuti aboro.”—The New York Times, Merekoko 1, 2023.

 Wa regbo nikaa susa, si nika ye ka yugo tihe ziazia singia aboro nika mangasunge na agi ahe i mbakadaha re tipa si undo aboro watadu ka imisa yo. Ginipai Baibiri Ayugoho?

 Baibiri nayugo gu ndupai aboro arengbanga kadu ti ni na gu kido nga gu vovo ahe aboro ambakadaha nika du sa nipa undo fu aboro ya.

1.  1. Ka aboro vura du na kina wene bipai, i arengbanga ka bi gupai nga gayo mangapai nika du adu na gbegberẽ sangbanaha kumbatayo te.

   •   “Pai ho du ni ruru he bangiri boro, ono digida ha nga agu apai nga kina ga kpio.”—Asanza 14:12.

2.  2. Boro arengbanga kadu namaapai kurii wai gu kura aboro narengbe ka mangasunge—watadu ka inga mangasunge—na gu he ni nambakadihe te.

   •   “Mi ki sogo gu gi sunge mi amangi tii uru no, wa du he ya mi ambù he fu gu boro nikadu fuo re. Da ini he watadu ni adú ni iratatamana watadu ni irangbaangbaa? Ono ni azóga agu ahe dunduko mi amangi he na agu apai mi ayugu gi tatamana rogo tii uru no.”—Batungusipai 2:18, 19.

 Ngbatunga akapa wa gere nayugo ndu gupai ani aida na rugaapai ti ni be Bakusirani.

 Bakusirani kidohe nga ko ambunga gene fu aboro watadu agu ahe aboro akusaha si gberesi kpotosende watadu aboro te.

•   “Kpotosende nye anye kindi.”—Batungusipai 1:4.

•   “Ruru aboro adía kumbo ringara, ki nye anye kindi.”—Atambuahe 37:29.

 Rogo Baibiri yo, Bakusirani nafu agu arugapai nga gu nika undu na ani kurogo zezeredi raka kumbatayo. Tipa ka wirika gu kura apai tipa gupai Baibiri agumbaha, mo gedi gu kekeapai nga “Ginipai Rengbe ka Undo Rani Ani Gbia Wene Raka Kumbatayo?” na“A Real Hope for a Better Tomorrow.”