Rogo Bamburu 2022, kere mangapai nizuu na bundu amangi rogo zegino dunduko:

•   “Pa imo gu boro birĩ-zogarago nga ga Japan ko aboro aima ino ko wenengai [kuru Bazogo nangia Shinzo Abe] ima ba bakere gberãrago ti aboro Japan na iriwo gipai re ima zio aboro rogo zegino dunduko, gu susi gbe nga kiingo gu mangapai nga ga zuu rogo gu ringara re te na nyanyaki andiko kinaho du tipa mangasunge na bundu rogo gu ringara re.”—Bamburu 10, 2022, The Japan Times.

•   “Kina iriwo rago zi aboro Denmark yo mbiko gu kumba imi aboro biata na bundu rogo gu bambu ngbeahe du Copenhagen yo.”—Bamburu 4, 2022, Reuters.

•   “South Africa: Aboro 15 kpiki tifuo kumba na bundu zumudi aboro rogo gu bambira buda du rogo gu gbata nga Soweto.”—Bamburu 10, 2022, The Guardian.

•   “Aboro bangeyo naima susa 220 i anofo yo ki imi yo ni gu mangapai nga ga zuu Amerika yo ti regbo gu ongoda naadu ti gu digido poso nga ga Bamburu 4.”—Bamburu 5, 2022, CBS News.

 Ya mo maabangirise ho nga ngbatunga gi zuu re adigo? Ginipai Baibiri ayugoho?

 Baibiri nayamba gi gaani regbo re nga “kusa rago” watadu yangara arame, nga gu regbo aboro nika du ni airaerã, na kini mangipai ni kere zuu. (2 Timoteo 3:1, 3) Ngbatunga gi mangaapai nizuu re nasa aboro i niraki na gunde. (Ruka 21:11) Ono tie, Baibiri nakido pa gu regbo zuu nika digo ti ni na “aboro asúnga rogo zezeredi kporo, na rogo ndikidi abaraka, na rogo zezeredi abaongoda.” (Yesaya 32:18) Waigu zuu nika digo?

 Mbori nika dia gbegberẽ aboro kusayo na ki gbarasi aũvura dunduko.

•   “Ono i aróga gbegberẽ aboro ku sa yo zegino.”—Asanza 2:22.

•   “[Mbori] namanga pai, vura nyasi digida kpotosende yo; ko nakua mboto, ki kuadi baso rukutu, ko nazo angbagidavura ku we yo.”—Atambuahe 46:9.

 Mbori nika dia agu apai kusayo nasa zuu si nimangi niyugo ko pai fu aboro i raki rogo zereda.

•   “I aimisa nga aboro watadu gbarasa yo ri gi kparakpara ziazia gangara wa sa te; bambiko kpotosende ahi be ina pa Yekova wa aime nahisa gango baime.”—Yesaya 11:9.

•   Zavura kina awere, Mbori nayugopai fu aboro rogo zegino dunduko i mbu zuu na mangasunge na aũvura, ki ‘táki gayo abasape ni marã sopabino, na gayo abaso ni marã kuya ngua.’—Mika 4:3.

 Tipa ka wirika kura apai tipa ga Baibiri kidohe tipa gu zegino aboro nikaa dunga na gunde rogo ya, mo gedi gu kekeapai nga “Freedom From Fear—Is It Possible?”

 Tipa ka wirika kura apai tipa gupai nika nyasa riipa zuu nyeanye kindi, mo gedi gu kekeapai nga “Peace on Earth at Last!”