Rogo Merekoko 24, 2022, kere gbegberẽpai amangi rogo gu wiri tooni gbata nga Uvalde, Texas, du Amerika yo. Ringbisihe kuti gu waraga apangbanga nga The New York Times, “kumba naadu na bundu anofo agude 19 nangia akumbagude na adegude gbiati anayugupai ue . . . rogo gu sukuru i ayambaha nga Robb Elementary School.”

 Si nipa gberãrago nga, ngbatunga gi kere gbegberẽ apai re namanga dedede. Gu waraga apangbanga nga USA Today atingidi gupai nga Amerika yo nitihe, “rogo gu garã nasusi i azumudi bundu nga 249 rogo asukuru—nga gu naima nge kisusi ti agu agarã natona rogo 1970.”

 Tipagine gi kere gbegberẽ apai re amanga ti ni? Waigu rengbe ani ka mangapai kuti ngbatunga gi kere gbegberẽ mangapai re? Ya mo wiri maabangirise ho nga zuu adigo? Baibiri nafu akaragapai.

•    Baibiri nayamba gi regbo ani araka ti ni re nga ‘kusa rago’ nga gu regbo badungu aboro nika du ni ‘airasakparakpa’ na ni ‘airaerã,’ nayugo gupai nga i ima rengba ka manga kere gbegberẽpai ni zuu. Agu aboro nika du na agi asino tiyo re nika ‘gberã agberã kisusi.’ (2 Timoteo 3:1-5, 13) Tipa ka wirika dungu apai, mo gedi gu kekeapai nga “Did the Bible Predict the Way People Think and Act Today?”

 Badungu aboro nabakabangiriyo nga, ‘Tipagine Mbori arugusanga kere gbegberẽ apai wa gu nga nofa agude sukuru yo ti manga ti ni ya?’ Tipa ka bi gu karagapai nga ga Baibiri, mo gedi ku kekeapai nga “Tipagine Gbegberẽ Apai Amanga Wene Aboro Ti Ni?”

•    “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.”—ARomo 15:4.

 Agu arugute nga ga Baibiri ima rengba ka undo ro mo mangipai kuti gu zuu du rogo gi zegino re. Tipa ka ino kura dungu apai mo bi gu magazini nga Awake! du riihe nga “Will Violence Ever End?”

 Tipa ka gbia agu aberãpai rengbe ka undo avunguagude i undo awiriyo tipa wai ka mangapai kuti agu apai i abihe na kini gihe rogo apangbanga, mo gedi gu kekeapai nga “Disturbing News Reports and Your Children.”

•    “Ko natumo ungayo be bau pai na zuu.”—Atambuahe 72:14.

•    “I atáka gayo abasape ni marã sopabino, na gayo abaso ni marã kuya ngua; rikaaboro amó nga basape kuti gu rikaaboro te, i awírika nga pa sovura berewe a te.”—Mika 4:3.

 Mbori nika manga gupai aboro arengbanga ka mangaha ya. Gako Kindo du ngbangbaturũ yo nika gbarasa aũvura dũ na ki digisi zuu nabaha dunduko. Tipa ka wirika dungu apai tipa gupai ga Mbori Kindo nika mangaha, mo gedi gu kekepai nga “Under God’s Kingdom ‘Peace Will Abound.’”