Birĩ-zogarago ima kparaka aringara rogo zegino dunduko. Ringbisihe kuti gu wisigopai namangi rogo 2022 nga ga Pew Research Center, “65% nga ga kuru aboro rogo ringara 19 nga gu i amangi gu wisigopai re rogoho ape gupai nga bakere zanga giatise gu du ho rogo gayo ringara dagba agu aboro nasongoda agu ariigbu nga ga birĩ-zogarago du ni bakiakia.”

 Ya mo mo bingo kparakaro si ni kii kina kumbatayo dagba aboro rogo gu rago mo araka rogoho mbiko birĩ-zogarago? Tipagine duhe ti ni wo? Ya mo ziga ho tipaha? Mo bingo gupai Baibiri apehe.

 Baibiri aima gumba gupai nga ti gi gaani regbo i ayambaha nga “kusa arago” re, badungu aboro nika du na gu sino tiyo nika sa gupai nga ka aboro dunga ni kodikodi yo ya.

•   “Mo ini gere a, ya rogo kusa rago gbegberẽ rago aye. Bambiko aboro akpi kina nyemu tiyo, . . . aguaurundika.”—2 Timoteo 3:1-3.

 Wa vura duhe nga badungu aboro namanga ome tipa ka sa azogarago si du na diabese, gipai re amanganga te. Agu aboro du na bipai kia kuti agu akurayo nabihe ni mbumbuhe tipa ka mangapai kina sa tipa ka ye na zereda. Gipai re nayugo gu rengopai Baibiri aima fura tipaha bakuru kusayo nga.

•   “Boro nidu ni ni gbia ku ri kura ni ka imisa ni.”—Batungusipai 8:9.

 Ono tie, Baibiri nayugo pa gu ziga du kuti gipai re—si nga gu zogarago du bazogoho na rengba ka dia agu apai kusayo naye na arungo areme kuti aboro.

 Baibiri nayugo gu bazogo naima rẽ: Ko nga Yesu Kristo. Yesu na ome, rengbanapai, gbiati nyemu ka ye na kodatise na zereda fu aboro dunduko.

•   “Rurupai zuga ti ragoko, zereda ki du kpaima.”—Atambuahe 72:7.

•   ‘Arikaaboro dunduko ará fu ko!’—Atambuahe 72:11.

 Yesu nga gu bazogo naima re mbiko ko naberãpa aboro na ko na nyemu ka undo yo, gbe agu aboro i namangi fuyo gbegberẽ.

•   “Ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya. Nunga rurungbura boro du ti ko na irazingo ahe a, ko nabanda unga airazingo ahe. Ko natumo ungayo be bau pai na zuu.”—Atambuahe 72:12-14.

 Mo wiriki gu kura apai tipa ga Mbori Kindo, nga gu zogarago du ngbangbaturũ yo du Yesu ni gaha bazogo. Mo wiriki wai rengbe mo ka gbia undo ti ni na ki songodi gaha zogarago.

•   Mo bi gu vidio nga Ga Mbori Kindo Nga Gine?

•   Mo gedi gu kekeapai nga “Ga Mbori Kindo—Nga gu Zogarago Nika Dunga na Biriki Ya.”