Rogo Wegebe 24, 2022 vura atona Ukraine yo. Akutu aDezire Yekova kindi rogo agu aba i asovura rogoho nikerehe. Awirina du bangeyo nga 21 rogo agu agbata nga Kremenchuk na Poltava du Ukrainian yo, nayugo ndikidi nyemuse fu awirinayo. I na nyemu ka ndu ku rogo gu ba du na vura rogoho tipa ka batasa akurayo airisimbori na ka kparaka ahe nga ga undo fuyo.

Agu awirina re ima ndu nunguro ko yo wa bara 80 rogo aposo sita. Sidu, i ima ndu tipa kirometere 50,000 kurogo agu aba du vura rogoho nikerehe, wa gu nga Kharkiv, ki batasi awirina yo niima mbeda kuti 400.

Ka da ku awere, i ima ndu na ariahe kiroho naima du nga 23,000, kodihe na adawa, agu ahe i amanga riahe ngbaha gbiati kura ahe. Mbata fu agi awirina re tona gayo nunguro, i naasada ka bi gu gene rengbe yo ka ndu ngbaha i kidu ni bandabanda yo na ki ne agu aba vura amanga rogoho. Nunguro sa ima rengba ka dia asaa 19 bambiko awirina naru rogo agu aba du tipa weteka ahe tipa i weteke gayo atorombiri.

Ho i andu gi nunguro re ni, atiyara vura nagu ba riyo. Agi awirina re nabi agu abambu bombu agberesipaha na kpatakpata atarambiri vura na gu kura atarambiri. Ti kura aregbo, awirina naabi gupai nga kpotosende nawo ho i aba bombu ni mbembedi na yo.

Rogo Zerekpe 2, 2022, Roman aambakada tiko tipa ka ndu na ahe fu awirina ku Kharkiv yo, ho i atona ka zumudo kikindigi abundu ni ku bangiri agene. Ko andu ka gbu rogo gu bambu nadu mbembedi na ko. Tingbafuo aminiti 30 kusa, ko abi gupai nga gu gene ko aaida ka ndu ngbaha re i ima ba bombu ku ngbaha.

Volodymyr, nga guko naafu tiko dagba abakama tarambiri tipa kaa ndu, apepa wai rago adu ni kerehe, ko aya: “Ani naamanga kparakpee fu Yekova bara dunguhe tipa kaa manga agu adiaberã du na tatamana.”

Oleksandr na diako nga Valentyna, aaraka Kharkiv na gbinza avunguyo. Ho vura aamanga ni, i aabi abombu si ni tiwi patiyo baturoho kidu wa ametere 100 pati gayo bangiri bambu. Tarambiri aadunga beyo te, sidu, gene adunga wa ka i zubo te.

Sidu tie, awirina ada tipa ka batasa yo. Oleksandr aya, “Ani akpari fu Yekova, kini tambuako tipa agu awirina naaundo rani re.”

Vasyl, na diako nga Natalia, gbiati awiriyo biata agbu tipa dungu auru rogo bagbuko sende yo kpuyo yo. Rogo Wegebe 29, 2022, bombu ati mbembedi na gu kporo i andu ka gbu rogoyo. Gu bombu re agberesipa kpuyo. Vasyl natingida pa wai woro gu bombu re adu na kini bi wai awe dunduko aabiso rogo gu bagbuko i adu rogoyo.

Ho bete vura azeredi ni tooni, agu aborokporo re aoro kurogo gu kura bambu bagbuko nangia ga gayo amurakporo. Rogo Marungu 3, 2022, awirina agbia agu aborokporo re na ki ndu na yo ku rogo gu ba naadu ni zezeredihe.

Vasyl nasakapa wai ko adu ho i abatasi agu aborokporo ni re na i ki da rogo gu ba nadu ni zezeredihe: “Ani adu na bakere tambuahe fu Yekova. Ti bambata regbo, tingbafuo poso, ani adu na rengba ka ri riahe rogo zereda yo, zanga bakabangirise tipa awirani.”

Oleksandr, nga bakama tarambiri, nasakapa wai gu sunge batasa aboro re ayugopa gu kodatise du dagba ga Yekova aboro. Ko aya, “Gipai re ima undo re mi ini wai Yekova angerafuo gako aboro. Mi na bakere ngbarago ho mi abi wai ni du awirina na tambuahe.”

Ani na bakere tambuahe tipa gu wingbaduse nga ga awirinarani, na ani nakpara nga Yekova fu maku fuyo tipa gayo nyemuse na wingbaduse.—ARomo 12:10