Si ni pa gberãrago nga, dakuti Marungu 29, 2022, kura awirina saba nga akumba na adee rogo gu gbata nga Mariupol kpiki. Bange awirina nga akumba na adee nga 17 Ukraine yo zanga gayo raka.

Gu Rondo du Tipa fu Undo ti Regbo Gberãngo (DRCs) nga gu du Ukraine yo namangasunge nyanyaki tipa ka fu undo, zavura kaa maya gayo raka ngbapai yo tipa kaa gbata awirinayo rogo agu aba vura naima manga rogoho ni kerehe.

Ni kpiapai, agu awirina namangasunge na gu Rondo du Tipa fu Undo ti Regbo Gberãngo ima du na rengba ka ndu na riahe, adawa, na kura nyanyakipa ahe kurogo agu agbata vura naima manga rogoho ni kerehe wa gu nga Kharkiv, Kramatorsk, na Mariupol. Boro sa dagba agu aboro yo namangasunge na gu Rondo du Tipa fu Undo ti Regbo Gberãngo naandu nunguro dedede nga akirometere naima susa 500 (310 mi), kini susi rogo dungu agu abataya nga ga abanzengere nga gu du tipa wisigo agu aboro nasusa ti gene, kaa ndu na riahe na adawa fu abatungusipai du bangeyo wa 2,700.

Gu Rondo du Tipa fu Undo ti Regbo Gberãngo namanga mbakadapai a tipa ka undo awirinarani i oro kusayo rogo agu aba vura amanga rogoho ni kerehe. Kura wirina sa rogo gu Rondo du Tipa fu Undo ti Regbo Gberãngo Chernihiv yo aya: “Ho abanzengere atona bafa kikindigi abundu ni kurii aboro ringara, si aima du ziazia nga si ni kerepai kisusi ka nye vuru gbata. Wa si adu nga karaba (électricité) na Internet aamanganga sunge te, ti gu regbo i aabafa kikindigi abundu, abaakumba aotoko niipo vuru gbata ka tingida agu abatungusipai nagbuku ti abambu sende yo na gupai nga aũnduge kinaho tipa ka ora kusayo vuru gbata.”

Baira gu basunge nga ga tinda aboro aidipa mangasunge na gako atorombiri, na ko andu anunguro ribua kaa kusa awirina nga 254 vuru Chernihiv. Zavura ti kura regbo sa, ko ambakadi gene na gako masini nga ga mbakada gene tipa gupai nga gako torombiri du na rengba ka susa ngba gu gere re. Awirinarani adu na tambuahe tipa gu undo re.

Ani narungo wa sa na agu aboro zanga gu gayo aboro i akpinyemuyo ti regbo gi vura nandu kindi kumbatayo re. Ani dunduko nangera kumbatayo ka bi gu maabangirise du rogo Fugo Mbori yo nga Baibiri si nada ti rengo, ho kpio na akpe nika dunga ni berewe ya.—Yugoti 21:3, 4.

Dakuti Marungu 29, 2022, agi atingidapai du kusende re ani nagbia ha Ukraine yo. Agi anamba re mburuhe rii agu atingidapai ani nagihe ngba agu awirina du rogo gu dagbarago re. Ono tie, ndikidi agi anamba re ima rengba ka susa gure, mbiko si ni kpakarakpakaraha tipa kaa fura na awirina rogo agu arago dunduko nga gu ringara re.

• Abatungusipai 17 ima kpiko

• Abatungusipai 35 ima õka

• Abatungusipai 36,313 ima ora kusayo rogo akpuyo kurogo agu aba du zezeredi

• Akporo 114 paha nagberẽ

• Akporo 144 abarapaha nakuadi ni bakerehe

• Akporo 612 abarapaha nakuadi tooni

• Bambu Kindo 1 paha nagberẽ

• ABambu Kindo 7 abarapaha nakuadi ni bakerehe

• ABambu Kindo 23 abarapaha nakuadi tooni

• Bange agu ARondo du Tipa fu Undo ti Regbo Gberãngo (DRCs) 27 namangasunge Ukraine yo

• Abatungusipai 34,739 gbia undo vurube gu Rondo du Tipa fu Undo ti Regbo Gberãngo ka ora kurogo agu aba du zezeredi

• Abatungusipai 16,175 zubo kurogo kura aringara na i nagbia undo be akurayo airisimbori