Si nipa gberãrago nga badungu awirinarani ima kpi ni sangbana gu vura namanga Ukraine yo re. Bange agu aDezire Yekova kpi nga 28.

A wa aba apangbanga rogo zegino dunduko apehe, rogo gu bambata aposo nangia ga gu vura re, vura aima manga ni kerehe rogo agu agbata du mbembedi na Kyiv. Bange abatungusipai du wa 4,900 naraka rogo gu ba re, aguyo niima susa 3,500 ima ora awere kurogo agu aba du ni zezeredihe.

Agi akpiapai du kusende re nayugo wai awirinarani rogo agi aba re abanda gayo idapase rogo gu kere aʹasada i agbia tiyo na ni re.

Oleksandr, nga bakumba du rogo gu gbata nga Makariv, aoro kurogo gu ba du ni zezeredihe bebere Ukraine yo. Ono tie, mbiko wa ko aabaka bangiriko tipa agu abatungusipai biama du rogo gako badona nga ga tungusapai, nga aguyo si aima kpakara tipa ka inopai tipa yo, ko akaraga tiko kurogo gu ba nadu na vura rogoho re tipa ka gbatayo. Ko aya: “Mi aima ino gupai nga ga Yekova amoyambu na nyanyakipa yo fuko gbe. . . . Ho mi ada ni barangba kua kura batungusipai sa, mi abi gupai nga bombu aima ti ku kpuko. Ngbadimo gu bambu i agehe kusende yo ka banda aboro be vura adu ni kisikisihe, na boro ho nakaragapai fere ho mi aayambahe ni te. Gipai re aima gundesi re.” Oleksandr akuo ngbadimo gu bambu re na ko abi badona aboro yo nga aguyo naabiko. Ko abi abatungusipai yo gbiati gu gayo amurakporo naangianga aDezire Yekova ya i agbu na yo.

Gu kura batungusipai sa rogo gu bambu re nga, Yaroslav, aya wẽ i aima gbu rogo gu bambu re tipa arame muambe. Ko aya: “Boro aniri kina wiri biskuiti ki mbiri ime rogo uru sa. Ono ani anaageda Baibiri na kini gedi gaani awaraga, kini mangi kparakpee, na kini ngarasi akuarani. Ho mi agi Oleksandr ni ko nayambu rimo re, mi aberẽ gupai nga abanzengere ima ye ka zio re. Mi aberẽ gupai nga mi nandu ka kpi. . . . [Kuba gure,] ko abatasi rani dunduko. Ani na tambuahe fu Yekova bambiko ko fu awirina furani nga aguyo nakpinyemu rani, namanga kparakpee tipa rani na zavura moi gayo raka ngbapai tipa ka batasa rani.”

Pylyp na kura wirina adiberã ka ye na riahe fu agu aboro nadu rogo gu gbata nga Borodianka. Rogo Marungu 17, ho Pylyp aakama tarambiri ni ka ndu ku gbata yo, abanzengere adi gako tarambiri na ki di riahe. Fuo gure, abanzengere azi agu awirina re dunduko ue, ki vo abeyo gbiati bangiriyo, na ki ndu na yo kurogo tooni bambu sende yo gbiati kura akumba saba. Fuo auru ue kusa, ababandarago adi yo ki ndu na yo kurogo kura tooni bambukiso na ki ta yo yo. Pylyp aya: “Mi ainongo singia mi abata te. Mi amangi kparakpee tipa ka nye niruru re.”

Ti gu kura regbo i aata Pylyp, ko atona ka manga kparakpee kuari tipa sosono awirina nga adee nga aguyo riahe aadunga beyo ya, na tipa gu du wenengai nga ga gako aborokporo, na ko atambuahe Yekova tipa gu wene agarã ko nadihe kuti ngba iriso Ko. Babandarago akaraga ko berewe kurogo gako tooni bambukiso, yo du ko aandu ni kindi kaa manga kparakpee tipa abanzengere rugutiyo na gupai nga awirina nga kere aboro te. Agi awirina ue re atona ka manga dezirepai fu ababandarago. Tipa arame ue, i aima tungusapai fu agu ababandarago re dunduko. Kurii gure, boro sa dagba zizi aboro yo ayugu nyemupai tipa gu pangbanga nga ga Baibiri. Ko atambua awirina. Rogo Marungu 27, i akusi awirina gbiati gu kumba nayugu nyemupai re.

Svitlana, nga nakuparanga du Bucha yo, aarengbanga ka kura kusayo rogo gu ba naadu na vura rogoyo te tipa aposo ue. Ri aya: “Mi arugu tire na nyakapa gu zereda Yekova afuhe ni bakerehe susi gu nidu mbata. Ho ani agbia gu zereda ni nga ga Mbori, si ayugongo gupai nga ani naino agu apai ti aregbo dunduko si aida ani mangihe te. Ono ho adunga gupai ka ani mangihe tipa gaani akpakarapai ya, ani namaa gaani kido naabaha kuti Yekova.”

Ho Svitlana aandu ni kurogo gu ba naadu ni zezeredihe Ukraine yo, ri amangi dezirepai fu dee gbiati wiri gumeri. I dunduko ada rogo gu ba naadu ni zezeredihe na agu aborokporo nangia aDezire Yekova ki di yo kugume. Agi aborokporo re aidihe Svitlana gbiati gu dee na wiri gumeri re ra kpuyo rogo gu yuru re. Gu uru naagbe fuo gure, gu dee re asanahe tipa ka ndu tipa dunguratise na ki sanahe tipa Baibiri gbiati gaani awaraga. Svitlana aandu kindi kumbatayo tipa kaa fura na ri.

Dakuti Zerekpe 12, 2022, agi atingidapai du kusende re ani nagbia ha Ukraine yo. Agi anamba re mburuhe rii agu atingidapai ani nagihe ngba agu awirina du rogo gu dagbarago re. Ono tie, ndikidi agi anamba re ima rengba ka susa gure, mbiko si ni kpakarakpakaraha tipa kaa fura na awirina rogo agu arago dunduko nga ga gu ringara re.

• Abatungusipai 28 ima kpiko

• Abatungusipai 48 ima õka

• Abatungusipai 40,778 ima ora kusayo rogo akpuyo kurogo agu aba du zezeredi

• Akporo 278 paha nagberẽ

• Akporo 268 abarapaha nakuadi ni bakerehe

• Akporo 746 abarapaha nakuadi tooni

• Bambu Kindo 1 paha nagberẽ

• ABambu Kindo 9 abarapaha nakuadi ni bakerehe

• ABambu Kindo 26 abarapaha nakuadi tooni

• Bange agu ARondo du Tipa fu Undo ti Regbo Gberãngo (DRCs) 27 namangasunge Ukraine yo

• Abatungusipai 41,974 gbia undo vurube gu Rondo du Tipa fu Undo ti Regbo Gberãngo ka ora kurogo agu aba du zezeredi

• Abatungusipai 18,097 zubo kurogo kura aringara na i nagbia undo be akurayo airisimbori