MEREKOKO 3, 2022
APANGBANGA NGA GA ZEGINO
“Oni Banda Gaoni Pagume na Yekova Nyanyaki”
Kparakpara Mbakadapai ka Nyakasa Agu Awirina du Ukraine yo na Poland yo
Rogo Zerekpe 26, 2022, Wiriba Mark Sanderson, nga boro Riigbu Bipasunge nga ga aDezire Yekova, andu ku Poland yo ka ngarasa agu awirina nambu be gu vura namanga Ukraine yo.
Awirina Poland yo rogo Bambu Bakere Dunguratise naundo tipa gu kura aboro bi gu mbakadapai re rogo kura aba
I ayambu agu adungurati dunduko du Poland yo na Ukraine yo tipa gu kparakpara mbakadapai i amangihe rogo Zerekpe 30, 2022. Agu awirina nazubo Ukraine yo ku Poland yo be vura kodihe na agu awirina namangasunge fu undo fu aboro ti regbo gberãngo, adu dagba agu aboro i ayambu yo i ye kadu pati gu mbakadapai re rogo gu Bambu Bakere Dunguratise du Warsaw yo. Agu aboro naadu pati gi mbakadapai re na aguyo naabihe rogo vidio bangeyo aima susa 250,000 Poland yo na Ukraine yo.
Wiriba Sanderson aya: “Awirina rogo zegino dunduko naberãpa roni aberã na kini kpari tipa roni. Rogo riibasunge nga ga zegino awirina namanga kparakpee tipa agu awirina du Russia yo na Ukraine yo, kodihe na agu akparakpee i amangaha ti regbo agu adunguratise nga ga Riigbu Bipasunge.” Ko akido yo na gupai nga “agu akpakarapai oni agbiatironi na ni ayugongo gupai nga Yekova aidanga na oni te te. Ko nabironi abi, ko nakpinyemu roni akpi, na ko mbembedi gbe na agu aboro nasusa rogo kpakarapai yo.”
Badona nga ga agu awirina naazubo Mariupol, Ukraine yo, nabi gu kparakpara mbakadapai re
Wiriba Sanderson ape kurapai nga: “Oni moi berãroni tipa gaoni pagume na Yekova. Gaani sasa nga ka bata gbua rogo gi kpakarapai re te, ono ani naida kadu na nyanyaki idapase na kidu mbembedi na Yekova. Gere nga gupai Yekova ayugoho furani.”
Serhiy, nga bakumba Odessa yo, Ukraine yo, aya: “Vuru gu bete aposo susi kusayo re, mi aranga wenengai te bambiko bakere bakabangirise, gberãrago na gunde. Ono tie, [gi kparakpara mbakadapai re] ima nyakasa gimi idapase nga Yekova nangera angerafuo gako aboro na fuo rani a wadu ani nibasasa.”
Tatiana, nga gu wirina nazubo be vura Kyiv yo, Ukraine yo, aya: “Areme, mi ima bi wai du Yekova mbembedi na mi. Mi nabi tire wa ka i ya Yekova nadungo re na mi nabi gako nyemuse abi. Ka ani vura du kina rogo gini ba Yekova ti aregbo du na ani.”
Ani ima kpinyemu awirinarani, ani na gu kido nga gi kparakpara mbakadapai re nika tingida yo na pa Yekova “weneringise” tipa gako aboro.—Atambuahe 136:1.
