Oó, Kpotosende ho i nika gbarasaha, ka zoho na we watadu ka kusa kuraha te. Baibiri nayugo gupai nga Mbori akusi kpotosende aboro raki rogoho nyeanye kindi.

•   “Ruru aboro adía kumbo ringara, ki nye anye kindi.”​—Atambuahe 37:29.

•   “[Mbori] namoi amburu kpotosende ka i agbisa nga ha waragoagira ya.”​—Atambuahe 104:5.

•   “Kpotosende nye anye kindi.”​—Batungusipai 1:4.

•   Gu Ko “nambakadi kpotosende ki mangi he (ko anyakasi he, ko amanga nga ha ni kungba he te, ko ambakadi he aboro niraki rogo ho!”​—Yesaya 45:18.

 Mbori ambunga gene fu aboro i gbarasi kpotosende ni kerehe na agu ahe nabirikosi ime, wege, nabirikosi sende, avura, watadu gu kura ahe te. Kuba gure, ko nika “gbarasa agu yo nagbarasa kpotosende.” (Yugoti 11:18) Waigu ko nika manga gipai re?

 Mbori nika dia gu zogarago nga ga wiri aboro kusayo nga gu abandanga kpotosende ya, ki ye na gu wene zogarago nga ga Kindo du ngbangbaturũ yo kubaha. (Daniere 2:44; Matayo 6:9, 10) Gu Kindo re, Wiri Mbori nga Yesu Kristo ni kangia bazogoho. (Yesaya 9:6, 7) Ho Yesu adu ni auru kpotosende, ko adu na iiriwo pagbia kurii agu aome nga ga zegino. (Marako 4:35-41) Nidu Yesu ni Bakindo ga Mbori Kindo, ko nika du na pagbia beko kurii zegino na agu ahe dunduko du rogoho. Ko nika kusa kura vovo apai berewe auru kpotosende, si ki sa apai si du teketeke wakina gu si adu ati Edene yo.​—Matayo 19:28; Ruka 23:43.

 Oó, si ayugongo ho wo te. Gu ngbatunga iraira gia rogo pai yo re naye dedede ti zanga rugatise na gupai du rogo 2 Petero 3:7, nga gu naya: “Agu angbangbaturũ du ho awere na kpotosende si du ni igiigi he be kina gu pai re tipa we.” Mo bingo banguapai ue nga gu naundo rani ani rugutirani na rogo agu afugo re yo:

1.   Baibiri namangasunge na gu fugo nga “angbangbaturũ,” “kpotosende,” na “we” si rukuba dungu apai angianga bangisapai ya. Ni kpiapai, Atambuahe 33:8 naya: “Kpotosende dunduko gúnde be Yekova.” Ane, “kpotosende” narukuba agu aboro naraka rogoho.

2.   Agu apai du mbata fu 2 Petero 3:7 nayugopa gupai ngbangbaturũ, kpotosende, gbiati we nga gu i nafura tipaha ane aru kubaha. Veresi 5 na 6 nafura tipa gu wiratise du dagba gupai re na Ime Akangbii nga gu nadu ti regbo Noa. Ti gu regbo nangiaha re, i agbarasi gu kuru zegino nadu mbata, wa si avura duwo, he ho namangi gaani kpotosende te. Kuba gure, Ime Akangbii agbarasipa agu aboro zuu kusayo naaraka ti gu regbo re watadu “kpotosende.” (Bambata Pai 6:11) Si agbarasipa agu aboro a nadu wa “angbangbaturũ”​—nga agu aboro naazogarago kurii agu aboro nadu auru kpotosende tigu regbo re. Rogo gi gene re, gbegberẽ aboro i agbarasi yo angianga gaani kpotosende ya. Noa gbiati gako aborokporo aima bata ti gu regbo nangia ga gu gbarasahe re na i ki tona ka raka auru kpotosende berewe tingbafuo Ime Akangbii.​—Bambata Pai 8:15-18.

 Wakina Ime Akangbii, gu gbarasahe watadu “we,” i nafura tipaha rogo 2 Petero 3:7 nika nyasa riipa gbegberẽ aboro dunduko kusayo, angianga gaani Kpotosende ya. Mbori kidopa “vovo angbangbaturũ na vovo kpotosende, nga gu ruru apai nikanye rogo ho.” (2 Petero 3:13) “Vovo angbangbaturu,” watadu vovo zogarago​—du nga ga Mbori Kindo, nika zogorago kurii “vovo kpotosende,” watadu vovo rikaaboro. Tii vurube gu zogarago nga ga gu Kindo re, kpotosende nika da ni gu paradizo nga ga zereda.​—Yugoti 21:1-4.