Waigu Kpoto Yesu Adu?
Gu Karagapai nga ga Baibiri
Boro ho nzunzu ini wai Yesu aangera te, mbiko i afuranga tipa wai kpotoko adu rogo Baibiri te. Gipai re nayugo gupai nga pa wai kpoto Yesu adu watadu wai ko aangera na nyanyakipaha te. Ono tie Baibiri ima fu wiri berãpai furani nibipa wai ko adu.
Wai ko adu: Yesu angia Yudo na si nawira wa ko aima dia gu kura asino aYudo ti nako. (AEbere 7:14) Ani arengbanga ka ya kpotoko adu ni kparakparaha kia ti ga aYudo te. Kura regbo adu kinaho ko aguari Gariraya yo ni gbuko ka ndu ku Yerusarema yo zanga aboro iniko. (Yoane 7:10, 11) Na si nawira gupai nga kpotoko aadunga kia ti ga mbembedi abakureako nangia amokedi te. Mo ini gupai nga si aidi gupai nga Yuda nduandu ka yugo bara Yesu fu gu rimbasa aboro zuu naye ka zio ko.—Matayo 26:47-49.
Gbanga mangerii: Si awiranga gupai gbe nga mangerii Yesu adu ni gbangaha te, mbiko Baibiri naya “ka kumba du na gbanga mangerini, si nga wasiro fu ni”—1 AKorindo 11:14.
Maingbase: Yesu anaambu maingbako ambu. Ko anaapekafuo agu arugute nangia ga aYudo, nga gu nafu zahe fu kuru akumba nga ka i ‘yere nga mburu maingbayo ya.’ (Pa Amotumo 19:27; AGaratio 4:4) Berewe a, Baibiri ima fura tipa maingba Yesu rogo gu sangbanebi yo nadu tipa agu arungosi ko nika gbiaha.—Yesaya 50:6.
Kpoto: Goapai dunduko nayugo gupai nga kpoto Yesu adu ngiangia. Ti regbo gako sunge tungusapai, ko anaandu anunguro tipa dungu amairo. (Matayo 9:35) Ko agirisi ga aYudo yekaru bara ue, ki vagadi ga abaundaamarã ambisa na kura regbo ko ki kusi zogozogo anya kusayo yekaru ni kpudu. (Ruka 19:45, 46; Yoane 2:14, 15) Gu Cyclopedia nga McClintock and Strong’s nape gupai nga: “Agu apai naabaha du rogo agu akitabu nga wene pangbanga nayugo gupai nga [Yesu’] adu na kpotoko ngiangia zanga na wiripai ti ni.”—Volume IV, kpewaraga 884.
Wai bibi kpakpuko yo ani du: Yesu angia gu boro nadu zaaza na kidu na nunga tiko, na zanga kapa, gipai re anaayugo tihe ayugo nibipa wai kpakpuko yo ani du ti aregbo dũ. (Matayo 11:28, 29) Ngbatunga aboro dunduko nanaaida na undo gbiati wasa beko. (Ruka 5:12, 13; 7:37, 38) Zavura rukutu agude anaagundenga ho i a nidu ni na ko te.—Matayo 19:13-15; Marako 9:35-37.
Iraira berãpai tipa wai Yesu adu
Iraira berãpai: Gu kura aboro nabihe nga kpoto Yesu adu wa ga aboro Afirika mbiko gu buku nga yugoti naringbisa mangeriko kuti mange kandoro na nduko kuti “taataa sirigi.”—Yugoti 1:14, 15, The New Jerusalem Bible.
Rengo: Gu buku nga Yugoti na agu apai rogoho nga ‘yuguyugu’ apai. watadu agu apai i aino apai ti ni. (Yugoti 1:1) I mangisunge na agu apai i aino apai ti ni ho i afura ni tipa mangerii Yesu gbiati nduko tipa ka sakapai tipa agu sino nika du tiko tingbafuo zingako be kpio. Ho i afura ni tipa rii Yesu nga “mangeriko ki du ni vuvuru he wa pusi mange kandoro,” Yugoti 1:14 namangasunge ane na rangi ka ringbisapai kuti ni angianga wai du he be boroyo ho ni azadaha ni ya. Gipai re narukuba gako tatamana ringbisihe kuti garãko. (Yugoti 3:14) Gi veresi re aringbisanga mangerii Yesu kuti ga kandoro nibipa wai ka boro zadihe si kidu beni yo te kina wo a duhe ho si aringbisa mangeriko ni kuti gu morogumba du kpau.
Ndu Yesu adu “wa taataa sirigi, i ambakadi he gbigiwi yo.” (Yugoti 1:15) Berewe a, “ngbanyako ki du wa uru nahasa rago bebere uru.” (Yugoti 1:16) Wa du he nga boro ho du na rangi kpotoni wagu i nasakipai tipaha re te, gi yuguyugupai re narukuba kurapai kia, si nayugo Yesu nga guko nika zingabekpio ko nasungu “rogo gu imarago ka boro ambeda nga na ni ya.”—1 Timoteo 6:16.
Iraira berãpai: Yesu adu rurungbura watadu kpokorokpokoro.
Rengo: Yesu angia gu kumba naima du ngangarã rogo asinoko yo. Ni kpiapai, ko adu na wingbaduse ki yugu tiko fugu rimbasa aboro zuu naye ka zioko. (Yoane 18:4-8) Yesu aima du ngangarã ti kpotoko a mbiko ko anaamangasunge kpengua na agu aũsunge naida na ome tipa ka mangasunge na ni.—Marako 6:3.
Tipagine tie si aaida ti ni boro undo Yesu ti tinda gako ngbunduru ngua-rungosi? Na tipagine kina ko akpi ti ni mbata fu agu akumba nadu na ko ti ngua? (Ruka 23:26; Yoane 19:31-33) Mbata fu i saringbanga Yesu sa kpio, kpotoko aima du ni rurungburaha gbe. Ko asungu rogo gu yuru re sasa mbiko gu fuda berãse yo ko adu rogoho. (Ruka 22:42-44) Rogo gu yuru re, aYudo aima manga fuko gbegberẽ, na rogo gu wiso nangbefuo ho, aRomo aima rungosi ko ni kere he. (Matayo 26:67, 68; Yoane 19:1-3) Ngbatunga agu apai re si awiraha wa si nasa gupai nga ko kpi niipo.
Iraira berãpai: Yesu ani du ti aregbo dunduko rogo kere gberãrago, na gipai re adu na maapai kurii asinoko.
Rengo: Yesu na kina boro agu sino tiko teketeke du ti gu Bako du ngbangbaturũ yo, nga Yekova, nga guko Baibiri aya tipa ko wẽ ko nga “betedi Mbori” watadu Mbori ngbarago. (1 Timoteo 1:11; Yoane 14:9) Ka pe rengo, Yesu du nayugu gupai fu aboro si aida i mangihe kadu na ngbarago. (Matayo 5:3-9; Ruka 11:28) Gi memeapai re nayugo gupai nga gu ngbarago Yesu adu rogoho anaayugo tihe kpakpuko yo ti aregbo dũ.
Gere Ima Rengba a ka Ngba Tiro
ESSENTIAL BIBLE TEACHINGS
Wai du Rengbe Ani ka Ino Singia Baibiri Nga Rengo?
Ka si du nga Mbori du nga Baenge ke Baibiri, si naida si du kia ti gu kura abuku dunduko aboro akehe.
AGU APAI DU TIPA RANI
Mo Sanahe Tipa Wirika Baibiri
Mo gbia gu wirikapai nga ga Baibiri ti gu regbo na rogo gu ba ngba tiro.