Baibiri nayamba Yesu dedede nga “Wiri Mbori.” (Yoane 1:49) Gu fugo nga “Wiri Mbori” si nayugo gupai nga Mbori nga Bakusiahe, watadu Baenge unga ahe dunduko kodihe na gu unga nga ga Yesu. (Atambuahe 36:9; Yugoti 4:11) Baibiri ayugongo gupai nga Mbori navunga agude teketeke kina wai wiri aboro avunga agude areme te.

 Baibiri nayamba amaraika a nga “awiri Mbori.” (Eyobo 1:6) Na Baibiri naya gu bambata boro nangia Adamu, angia “wiri Mbori.” (Ruka 3:38) Ono tie, mbiko gupai nga Yesu nangia gu bambata kusikusihe Mbori akusi ko nitiko zanga kura boro ho, Baibiri nayamba Yesu nga bambata Wiri Mbori.

•  Ya mo Yesu araki ngbangbaturũ yo mbata fu i vunguko auru kpotosende ane?

•  Ginipai Yesu aamangaha mbata fu ko ye ku auru kpotosende no?

 Ii. Yesu angia kusikusihe ni toro ngbangbaturũ yo mbata fu ko ye ku auru kpotosende ane. Yesu nitiko aya: ‘Mi aye ngbangbaturũ yo.’—Yoane 6:38; 8:23.

 Mbori akusi Yesu mbata fu ko kusi ai he. Nibipa Yesu, Baibiri naya:

•   “Ko nga bambata vungu fu agu ahe dũ i afu.”—AKorosaio 1:15.

•   Ko “nga enge gu mangimangi ahe nga ga Mbori.”—Yugoti 3:14.

 Yesu aima digiso gu sangbanebi nadu tipa gu ko “naadu ho bakuru yo, ti tonatona arame.”—Mika 5:2; Matayo 2:4-6.

 Ko adu na kikiipa bangiriba beko ngbangbaturũ yo. Yesu afura tipa gi bangiriba re ho ko akpari ni ki ya: “Ako Buba, mo táasi rimorani na mo awere ni gu taarimo ani adu na ni na mo mbata zegino nikadu.”—Yoane 17:5.

 Ko aundo Bako i kusi kura ahe dunduko. Yesu aamangasunge na Mbori “wa bangbasia boro sunge.” (Asanza 8:30) Baibiri naya tipa Yesu wẽ: “Bambiko i afu ahe dũ rogo ko yo; watadu ku ngbangbaturũ yo na auru kpotosende.”—AKorosaio 1:16.

 Mbori amangisunge na Yesu tipa ka kusa gu kura ahe dunduko. Gi kusikusiahe re nakoda gu kura kusikusiahe dunduko nga atoro, kodihe na haurago dunduko. (Yugoti 5:11) Rogo kura bangiriba, gi kodatise ka mangasunge nadu dagba Mbori na Yesu re adu wakina gu ka bakeke kpia abambu amangasunge na bame bambu. Bakeke kpia abambu nake kpia wai si aida gu bambu re ningere; bame bambu kini me gu bambu re ringbisihe kuti kpiaha.

 Rimoko angia Pai. Ho Baibiri afura ni tipa ga Yesu raka mbata fu ko da ni boro, si nayamba ko na gu rimo nga “Pai.” (Yoane 1:1) Wa gopai ayugoho, gipai re nayugo gupai nga Mbori amangisunge na Wiriko ko ni pe gako arugapai fu gu kura kusikusiahe ni atoro.

 Ho Yesu adu ni auru kpotosende ane, si nawira wa ko Anaafura kuba Mbori fu agu aboro nadu auru kpotosende ane. Si nawira wa Mbori amangisunge na Yesu ni Pai ho ko aafu arugapai ni fu aAdamu na Eva. (Bambata Pai 2:16, 17) Si nangera wa Yesu du nangia gu maraika naangbe kumbatayo fu agu aYisaraere nadu bakuru kusayo ngbakungbo yo, na si nawira wa fugoko du si adunga i gisangba ha.—Gate 23:20-23. *