De goló íz reʼ sapno más tiemp par tzoʼno puext ló Memorial de xcalgoity Cristo. Órni Memorial guiabni lainy xomal, ma diti sapno reunión Mod nabanyno né mod ronyno Xchiin Dios né, órni guiabni guic xomal ma diti sioʼ discurso público né ma diti sasuidyno Guiich ni caniʼ. ¿Xí labúu gonyno par guiquiinno xtiempno galán? Ló naareʼ xomodca góc ló primer siglo, raquiin gonyno puext par labúu guidxinno ló Memorial (Lu 22:7-13; km 3/15 pág. 1). Per láaca, guiráno napno xi de coʼno puext xcalnabanyno. ¿Ximod labúu gonyno láani?

• Gonyno pensary xigony rasac guidopno dzúcu (1Co 11:23-26).

• Guinabno lóo Jehová né gonyno pensary ximod cadzakno láabu (1Co 11:27-29; 2Co 13:5).

• Golno información ni sieed ló la Biblia ni raniʼ de xcalgoity Jesús né gonyno pensary loni (Jn 3:16; 15:13).

Tipnés herman roʼolyibu versículos xtuny la Biblia par Memorial ni sieed ló follet Examinando las Escrituras diariamente né ronyibu pensary loni. Stipnés herman roʼolyibu versículos ni sieed ló cuadro ni rasetlaa de Jesús. Láaca noʼ stipnés herman ni rasuidy artículos ni sieed ló Guiich ni caniʼ ni rasetlaa de Memorial né ximod gondxiʼdot Jehová né Jesús lóono. Nitisi ni guiniiny looy gonylo, sacnéni looy par guibigaxlo más Jehová né Xiimbu.