Jacob gon que nosi Jehová non gony adorarno, ná dzúcu diti goyoʼ toib ley ro bitlaa que diti non gony adorarno dioxh falz (Éx 20:3-5). Por ngú, órni Jehová gonab láabu nabiguetbu Betel, Jacob gochbu xfamilbu né guirá buñ ni goyoʼ né láabu nabeʼyibu dioxh falz ladyibu. Ór cú Jacob bicachbu guirá dioxhcu, láaca bicachbu guipdiag ni sigory biquiinyibu par gapni layibu (Gé 35:1-4). Jehová bioladx ni buny Jacob.

Né ló naareʼ, ¿ximod gony adorarno nosi Jehová? Primer, non cueʼno tiplad nitisi cós ni radzak né dioxh falz, galbruj o stipnés clas galchiser. Ndeʼ radudy diitz guinitlóno nitisi cós ni radzak né galchiser né láaca guicaano cuidad xi cós rabiʼno o raguitno. Por ejemplo, gonabdiitz ndeʼ looy: «¿Roola libros o rabiʼya películas ro rareʼ vampiros, zombis o demony la? ¿Rioladxi cós ni ralooypa diti mal per radzakni magia, galchiser o ro buñ rony mal a stipnés la?». Non galsitno de guirá ni Jehová rianladx (Sl 97:10).

ÓRNI MA BIBIʼLO VIDEO NI LAA, «COLGUICALÓ BUÑDZAB», CUAPY GALRRANABDIITZ REʼ:

• ¿Xí galnagan racaló toib buñ ni casuidy la Biblia ni laa Palesa?

• ¿Xigony rasac guiyopyno xcalrracné ancianos pal cacalóno galchiser o galbruj?

• Pal nainy guilaa Jehová lóono, ¿xí cós non guinitlóno?

• ¿Xí buny Palesa?

• Lagary ro rabéslo, ¿xí raquiin gonylo par diti guiablo ladxña demony?