XIGONY RASACNI: Buñ ni rasuidy ni ná la Biblia par labúu gapyibu xcalnasác Jehová raquiin gac dedicaryibu Dios né raquiin tzonisyibu (1Pe 3:21). Buñ ni rony cumplir dedicación xtuny, racaʼ xcalnasác Jehová (Sl 91:1, 2). Lóono rac dedicarno Jehová, diti a toib buñgudxlio, toib dxiin o toib grupo. Por ngú, buñ ni casuidy la Biblia non guisuidyibu gonladxyibu né gony respetaryibu Jehová (Ro 14:7, 8).

XIMOD GONYNO LÁANI:

• Laʼga casuidylo buñ, bisuidy layibu xí clas Dios nac Jehová. Góoch layibu que nigolú rasac goʼolyibu la Biblia guirá dzú né diti guisian guinabyibu lóo Jehová (1Te 5:17; Snt 4:8).

• Gocné buñ ni casuidylo coʼyibu guicyibu gac dedicaryibu né tzonisyibu. Láaca gocné layibu par tzágalyibu más metas, xomod guilísyibu ñayibu par guiniʼyibu chop tzón roʼ ló reunión. Láaca gocné layibu guisuidyibu xtiitz Dios xfamilyibu, buñ ni rabés gahx ro rabésyibu né buñ ni ronynéyibu dxiin. Bisetnaladx que Jehová diti rony lafuers ni toib buñ par gony xchiimbu né buñ non guiniʼ pal gac dedicar a Dios o yaca (Dt 30:19, 20).

• Gocné buñ ni casuidylo guitzaʼ mod nabany par tzoʼ nakit Jehová né par labúu tzonisyibu (Pr 27:11). Nantzayno que noʼ buñ rasac nagan guisian mod ronyibu o costumbre ni napyibu, por ngú raquiin diti guireʼganlo né gacnélo layibu par guitzaʼyibu mod nabanyibu (Ef 4:22-24). Bilooy tipnés artículos layibu ni laa «La Biblia les cambió la vida», ni sieed ló revista La Atalaya.

• Góoch buñ ni casuidylo balaati goxt nabanylo portín cayonylo xchiin Jehová (Isa 48:17, 18).