Bunysi pensary que rabéslo lainy gudx Galilea, ló xtzú Jesús. Bidxinlo dada gudx Jerusalén par gonylo Lanii lainy Ramad. Xidal buñ ni láaca rony lanii reʼ ma bieedyibu de xidal gudxrop, né bidza buñ lainy gudxcú. Nainy guiduidylo toib galrrascad a Jehová. Por ngú ranáslo néz rieelo ronoʼ templo, noʼoylo toib chiv. Órni radxinlo lainy templo nigolú bidzatipni; xidalguixo buñ láaca ná guiduidy toib galrrascad. Radxin ór ni ma gonycuentlo chivien ni noʼoylo a sacerdotes. Per órni mápa mer gonycuentlo láamu, rasetnaladxlo que toibtica xhermanlo, ni sigory noʼ lad guirá buñcu o noʼ lainy gudxcú, cadzuitz né looy. Jesús rabexa xí láani non gonylo ór cú (biil Mateo 5:24). ¿Ximod labúu guisobto ni goniʼ Jesús né modcu guiguaʼto sacró? Ló lista ni sieed reʼ buny subrayar xí láani más rasac gonyto.

NI NON GONYLO

• Guininélo hermancu nosi pal nanlo que noʼ razón guidzuitzbu.

• Gaibylo láabu que napbu dool né que nigolú nadaabu.

• Guicadiaglo láabu né paseins órni caniʼbu, né ná diti rienlo xigony cadzuitzbu, guinablo guituidybu scásiʼ galkié ni diti nompa bunylo.

NI NON GONY HERMANCU

• Gaibybu stipnés herman xí bunylo láabu, par gacné herman láabu.

• Gaibybu looy guiráxadit ni bunylo, né gonybu gan guiniʼlo que looy naplo dool.

• Guiduidybu cuent que naclo buñdxo né naplo balory por ngú goyeelo goninélo láabu, né guituidybu scásiʼ ni bunylo.

Ná ló naareʼ diti rascadno toib nimalien par gony adorarno Dios, ¿ximod bislooy Jesús que mod ragobiono xhermanno raslooyni pal racacuent Dios mod rony adorarno láabu?