Nabanyno ló toib Gudxlio ni rasuidy que cós tzaay nacni cós mal né cós mal nacni cós tzaay (Is 5:20). Nabanni, per xidal buñ rony cós ni rianladx Jehová, né ndeʼ dada raguiñani cós yox ni rony buñ né sabuñguieeuca né sabuñgonaʼca. Mbiox scuel né stipnés buñ labúu guikíilyibu xiinto par guisuʼ layibu. Lóoto ni ma noʼ xiinto, ¿ximod labúu gacnéto xiinto par diti guiabyibu ló cós mal?

Colguisuidy layibu ni ná Jehová (Le 18:3). Conforma caniʼsyibu, colguisuidy layibu xi rasetlaa la Biblia de sexo (Dt 6:7). Colguinabdiitz ndeʼ lóoto: «¿Ma bisudi ximbioxa gapyibu cuidad par diti cuenunysi can buñ layibu la? ¿Nanyibu que non gapyibu cuidad xí lairy guacyibu la? ¿Rienyibu que stipnés buñ non gap respet layibu la? Né ¿nanyibu xí láani ñonyibu pal ñoʼ ni ná naslooy pornografía layibu o pal ñoʼ ni nanab layibu ñonyibu cós mal la?». Pal maca nanyibu xi láani gonyibu, diti siabyibu ló cós mal (Pr 27:12; Ec 7:12). Órni rasuidyno xiinno, raslooyno que rasac herencia ni ma bidudy Jehová lóono (Sl 127:3).

ÓRNI MA BIBIʼLO VIDEO NI LAA, GUISAʼNO TOIB YOʼ NI GONY GUANTARY: GAPNO XIMBIOXNO PAR DITI GUIABYIBU LÓ CÓS MAL, CUAPY GUIRÁ GALRRANABDIITZ REʼ:

• ¿Xigony rasac nagan tipnés buñ guiniʼ de sexo né xiin?

• ¿Xigony non guisniʼs buñ xiin «xomod ná Jehová né xomod ná xilitzbu»? (Ef 6:4).

• ¿Xí herramientas ma bidudy xcudx Jehová a buñ ni ma noʼ xiin? (w19.05-S pág. 12).

• ¿Xigony rasac gooy buñ diitz né xiin antes de tzoʼ galnagan?