Disciplina radzakni né xcalrrasuidy Jehová, láaca radzakni né corrección né castig. Jehová rony disciplinarbu lóono par labúu gony adorarno láabu xomodpa nainy láabu (Ro 12:1; Heb 12:10, 11). Disciplina labúu guisioʼobni lóono. Per pal racacuentno láani, sonyno xinésni né Dios sadudy galnasác lóono (Pr 10:7). ¿Xí non guisetnaladx buñ ni radudy disciplina né buñ ni racacuent láani?

Ni radudy disciplina. Ancianos, buñ ni ma noʼ xiin né stipnés ronyibu xtem par gony disciplinaryibu né galnadxiʼ, xomodca rony Jehová láani (Jer 46:28). Ná pal nadipien disciplina, non gacni né galnadxiʼ né gacni né mod (Tit 1:13).

Ni racacuent disciplina. Nac nitisi nac disciplina ni guicaʼno, non guicacuentno láani né nimaca guisobno (Pr 3:11, 12). Guiráno nacno buñ galkié, por ngú raquiin tzoʼ ni gony disciplinar lóono. Ni rolno ló la Biblia o ni racadiagno ló reunión láaca labúu gony disciplinarni lóono. O rioʼ ór raquiinno que toib comité judicial gony disciplinar lóono. Pal racacuentno disciplina né ratzaʼno mod nacno labúu sabanyno tipzó (Pr 10:17).

ÓRNI MA BIBIʼLO VIDEO NI LAA, JEHOVÁ RONY CORREGIRBU BUÑ NI NADXIʼBU, CUAPY GUIRÁ GALRRANABDIITZ REʼ:

• ¿Ximod bibany Canon dzú gócbu mbioxien, né xí gosaclobu después?

• ¿Ximod buny corregir Jehová láabu?

• ¿Xí labúu guisuidyno né ni gosaclóo Canon?