Libro ni laa, What Can the Bible Teach Us? nacni xomod libro ni laa, ¿Xí ni merpa rasuidy la Biblia? Guiropca libro reʼ rabexa ni rasuidy la Biblia toibsi midid. Libros reʼ sareʼni ló xidal diitz. Per libro copyreʼ caani más nayadit par guieen buñ láani. Goyaʼni par buñ ni rasac nagan guieen libro ni laa, ¿Xí ni merpa rasuidy la Biblia? Ro ralox libro reʼ diti sieed toib apéndice xalagary ngú ló chop tzónsi diitz rabexani tipnés cós ni rasacnaganno ló toib capítulo. Ló tigaaga capítulo diti sitnéni galrranabdiitz ro rasalóni láaca diti sinéni toib cuadriyen de repas. Xalagary ngú, ló chop tzónsi diitz rabexani chop tzón textos ni bisuidyno ló capítulo cú. Labúu guikiʼsno libro reʼ nitisi ór xomodca ronyno né libro ni laa, ¿Xí ni merpa rasuidy la Biblia? ná ló beʼo cú cakiʼsno stipnés guiich. ¿Ximod labúu guiquintzayno libro copyreʼ órni guisuidyno buñ?

LÓ CHOP TZÓNSI DIITZ. Labúu guisuidyno buñ xomodca ronyno láani nigoreʼ, golno párrafo ni sitnéni né maca gonyno galrranabdiitz ni napni. Per ¿né pal buñ ni casuidyno diti nantzay diitz ni caani ló o diti labúu roʼoltzaybu láani ga? Pal scú láani herman labúu guiquiin libro ni caa más nayaa. Labúu guiquimbu ro ná ló chop tzónsi diitz par guisuidybu buñ cú né labúu gaibybu buñ ni casuidybu que ma stipláacabu goʼolbu guidopyca capítulo cú. Casi guirá ór labúu cuéxano ni ná la Biblia ló quins minutsi. Lagary ro ná ló chop tzónsi diitz dopienni diti sioʼlni xomod toib capítulo. Pal herman gony ndeʼ non guisuidytzaybu xquiichbu né non ganbu pu labúu gacnébu buñ ni casuidybu. Né pal rasuidybu párrafo ni sieed ló toib capítulo herman labúu guiquiin ro ná ló chop tzónsi diitz par gonybu repas.

NOTAS NI RABEXA LÁANI. Conforma casuidyno toib capítulo sadzelno tipnés notas ni saxel lóono ro ralox libro reʼ. Ma lóono ganno pal gaibyno guiquiinno notas órni casuidyno buñ o yaca.