Galtzeʼel ni nabany sacró ronyxiroʼni Jehová né nabanyibu goxt (Mr 10:9). Pal toib herman nainy láabu cuesnébu tzeelbu sacró por tipzó, non guisobdiitzbu consej ni sieed ló la Biblia órni guiyopybu ni gac tzeelbu.

Diti guiyopylo xinobylo órni «nacsalo mbioxhlasien», portín órcu nigolú raniiny buñ gatné saʼ né láani labúu gonyni que diti guiyopytzaylo ni gac tzeʼelo (1Co 7:36). Laʼga diti noʼ tzeʼelo bidzaktzay Dios né buny por gaclo toib galán buñ. Modreʼ sabesnélo tzeʼelo sacró.

Antes de gonylo galtzeʼel, goleʼ tiemp par guimbulo ximod «nac xcalnabanybu» (1Pe 3:4). Pal ni rasanélo rony cós ni diti galán nac, góoch láani láabu. Xomodca órni radzakno toib buñ, scúca nacni lainy toib galtzeʼel, non tzoʼlo galrrasaʼ ximod gacnélo láabu diti ximod gacnébu looy (Flp 2:3, 4). Pal rasoblo consej ni sieed ló la Biblia órni diti noʼ tzeʼelo, labúu sonylo láani órni ma noʼ tzeʼelo né sabanyto sacró.

ÓRNI MA BIBIʼLO VIDEO NI LAA, ¿XIMOD LABÚU TZOʼLO PUEXT PAR GALTZEʼEL? MIDID 3: «BIBIʼ PAL RIGAʼLNI LOOY», CUAPY GUIRÁ GALRRANABDIITZ NI SIEED REʼ:

• Primer, ¿ximod gosané hermana reʼ Shane?

• ¿Xí bidudy cuent hermana reʼ laʼga bimbubu más Shane?

• ¿Ximod gocné bixiosbu né xinaʼbu láabu, né xí cós galán goloʼbu guicbu gonybu?