Jesús diti gopbu galkié, por ngú diti cualóbu galnagan nili goyoʼbu ló galrrasaʼ xomod lóono. Per goyoʼbu galrrasaʼ por buñ, né bunybu xtem par gocnébu buñ. Jesús nigolú gocnébu buñ. Galrronladx ngú bichiin láabu par gocnébu stipnés. Labúu guibiʼno tipnés ejemplos ló capítulos 32, 37, 57 né 99.

Buñ de guirá clas íz, mbioxhlas, buñgol, bibigaxyibu ronoʼ Jesús portín godabiobu buñ né diti biatzbu nisló stipnés. Órni bibiʼyibu ximod godabioo Jesús layibu, sacró gosacyibu. Guibiʼno ximod buny Jesús guirá ndeʼ ló capítulos 25, 27 né 95.

Jesús guirá ór bunybu oración né guidopy xcalnabanybu, órni goyoʼbu toibbu, né nisló buñ ni buny adorar a Dios. Guirá ór bunybu oración, diti nosi antes ni guábu. Ló oración ni bunybu bidudybu guixquix né bunyxiroʼbu Bixiosbu, né gonabbu xcalrracné Jehová antes de gonybu toib cós. Guibiʼno ximod labúu gonyno láani, ló capítulos 24, 34, 91, 122 né 123.

Ná goniiny Jesús nasaladx, diti bunybu láani par labúu gocnébu stipnés. Diti nosi goyoʼbu galrrasaʼ por láasibu. Bidudybu toib ejemplo sacróyen lóono par gonyno láani. Guienno ximod bislooybu cualidad reʼ ló capítulos 19, 41 né 52.

Jesús diti nosi bisetla que gony perdonarno saʼno, láaca bidudybu toib galán ejemplo mod godabiobu xpiimbu né stipnés buñ. Guienno ximod bunybu láani ló capítulos 26, 40, 64, 85 né 131.

Profecías bisetlaa que xidal judíos non nabeʼyibu Mesías tiplad né que xi enemigbu non nagaity láabu. Jesús labúu ñoʼbu conforme ñonybu tipnés cosien. Per xalagary ngú, bunybu rutigoygaʼlni láabu par nimbu stipnés buñ ni nigolú. Modreʼ bidudybu toib ejemplo galán lóono ni labúu guisuʼno órni cacalóno tipnés galnagandaʼ. Gonyno pensary ni rasetlaa capítulos 16, 72 né 103.

Jesús bireʼ loguiaʼbu ló xidal cós nisló buñ galkié, por ejemplo gopbu conocimiento né sabiduría. Diti gopbu galkié, por ngú diti noʼ chú labúu goygaʼl xpensarybu né mod gócbu. Per gócbu buñdxo né gocnébu stipnés. Labúu guisuidyno más de láabu ló capítulos 10, 62, 66, 94 né 116.

Órni xpiimbu né stipnés buñ diti bisuʼ ejemplo xtuny Jesús o diti bisobyibu ni goniʼbu, guirá ór gopbu paseins buñreʼ. Xidal buelt góoch Jesús layibu xi raquiin gonyibu par guibigaxyibu más Jehová né bunybu láani né paseins. Guienno ximod bislooy Jesús paseins ló capítulos 74, 98, 118 né 135.