Par xhermando ni nadxiʼgoludo:

De goloʼ chop mil xhoopgayoʼ íz, profeta Ezequiel gopbu toib visión ni bidziguiaʼbu, ro bibiʼbu toib camión xiroʼ xtuny Jehová, Dios ni rony mandary guibá né Gudxlio. Ni radziguiaʼno de camióncu mod radzaʼni de lagary. Raxonyni naguel xomod guisioʼo dadaʼ órni radzaʼni de lagary diti rachocbu ló galnaguel ni sitnébu (Ezeq. 1:4, 9, 12, 14, 16-27).

Visión reʼ rasetnaladxni lóono que Jehová ragonés guirá ni noʼ lainy guibá né diti rasagadzuni. ¿Né xí labúu guinino ni cayac ló Gudxlio reʼ? Guirá ni góc ló íz de servicio de godobís raslooyni que Jehová casanés xcudx ló Gudxlio reʼ par saani naguel.

Lainy gudxrop de Estados Unidos, xidal herman ni noʼ Betel nogoluʼ xchiin portín careʼyibu de Brooklyn né seeyibu stoib lagary ni laa Warwick (Nueva York), ndeʼ nac central mundial copy ni noʼ lagarycu. Láaca noʼ stipnés herman ni see stoib lagary ni nac xtunyca Betel. Láaca goyoʼ stipnés herman ni cuá stoib asignación. Ló stipnés gudxrop, betelitas cayonyibu dxiin nadip ro riaʼ sucursal, roʼ cayactzayni, láaca noʼ herman ni cayonyibu dxiin ló tipnés sucursales par gacni más mitien, né tipnés herman seeyibu stoib lagary par gonyibu dxiin. Ná xidal de lóoto diti cadzaʼto de lagary per riodieʼto ló xchiin Jehová.

Tidxó Buñ ni nap xiroʼ Galnann radziguiaʼyibu ximod herman ni noʼ ló guidopynac Gudxlio riodieʼyibu más ló xchiin Jehová, né modreʼ raduidyni diitz que dxiin ni cayac ló Gudxlio racni suusi cayacni lainy guibá. Tipnés herman see stoib lagary ro raquiin más herman par guiniʼ xtiitz Dios. Né stipnés see stoib gudx roʼ raniʼyibu gadzé diitz né rayopyibu stoib mod copy par guiniʼyibu xtiitz Dios. Né xidal herman biyopy stoib mod par gonyibu más xchiin Dios. Láaca noʼ tipnés herman ni dipa ma bisian Dios ná nacyibu buñgol o caxoʼyibu. Layibu cayonysayibu xchiin Jehová, diti rareʼganyibu. Modreʼ raslooyibu que Buñdzab toib moxter láabu (1 Cor. 9:24).

Nandxichto que Jehová rabiʼ guirá xtem ni ronyto ló xchiimbu (Heb. 6:10). Lóoto nacto suusi góc Abrahán né Sara. Órni láabu gopbu más de 70 íz, Abrahán bisiambu de buen gan xcudxbu ni góc laa Ur né seebu né xfamilbu stoib gudx ni goyoʼ más sit ni góc laa Canaán. Né cú golésyibu lainy yoʼ lairy, ló tigayoʼ íz dada goityibu. ¡Ni buny Abrahán né tzeʼel bislooyibu que bunyibu xtem órni bienyibu Jehová! (Gén. 11:31; Hech. 7:2, 3).

 Non guinabdiitzno lóocano, ¿nacno suusi layibu la? Guirá ni dipa rasian Jehová ló dzú ni ma guidubylagaʼ ronyibu ni gonab Jesús layibu. Láabu goniʼbu: «Coltzé né colgony más xpiina guidopynac gudxlio, colconis layibu ló laa Bixios, laa Xiin, né ló laa espíritu santo» (Mat. 28:19).

Órni goniʼbu «coltzé», Jesús biduidybu diitz que raquiin tzodieʼno ló dxiinreʼ. ¡Né nigolú rabaladxno por guirá ni buny xpiin Cristo godobís! Xchiin Jehová ni cayac ló naareʼ ni canino diitz sacró de Gobierno xtuny Dios ló guidopynac Gudxlio radudyni diitz que napni xcalnasácbu portín láabu nanásbu dxiinreʼ (Mar. 13:10).

Xidal buñ cacacuent xtiitz Dios. Godobís goyoʼ 8.340.847 ni goniʼ xtiitz Dios né buny informaryibu midid 10.115.264 cursos ló tibeʼo. Nandxichno que xcamión Jehová diti rasagadzuni. ¡Lóoto láaca scúca! Por ngú, diti guisian de gonyto xchiin Jehová portín cayatz tidxósi tiemp par guisieg Jehová puert ro buñ labúu guilaa.

¡Texto de íz reʼ 2017 nigolú radzakni né ni cayonyno ló naareʼ! Texto reʼ náni: «Gop confianz lóo Jehová né buny cós tzaay» (Sal. 37:3). Órni rasobdiitzno diitzreʼ né ronyno ni ná Jehová, raslooyno que napno confianz láabu. Por ngú coʼno guicno que diti noʼno toibno. Jesús biduidy xtiitz: «¡Colguibiʼ!, noʼya né lóoto guirá dzú dada dzú ma guidubylagaʼ gudxliogoxreʼ» (Mat. 28:20).

Guisetnaladxno que Jehová sasiabbu xcalnasácbu ló dxiin ni cayonyno, ná cayonyno xiroʼ dxiin o tidxósi, ni más rasac par láabu ngú que cayonyno láani dada rutirigaʼlni lóono. Órni ronyno ndeʼ rabaladx xcalnabany Jehová né rioʼbu nakit por ni ronyno (2 Cor. 9:6, 7). Por ngú guibigaxno láabu, guininéno Bixiosno Jehová guirá dzú, golno la Biblia, tzoʼno reunión guirá xomal né guinino xtiitzbu yoʼ por yo né gan.

Buñdzab nan que ma «tidxósi tiemp napbu», né rayopybu mod par galsitno de Jehová (Rev. 12:12). Diti galsitno de Jehová, modreʼ Buñdzab diti sony xitcal (Sal. 16:8). Diti guialadxto que lóodo nigolú ronladxdo lóoto né raduidydo guixquix lóoto por ni cayacnéto lóodo cayanto guirá ni nac de Gobierno xtuny Dios ló dzureʼ ni ma guidubylagaʼ.

Xhermanto,

Tidxó Buñ ni nap xiroʼ Galnann ni Rasanir nisló testigos xtuny Jehová