Lesiony 10

Cós mal ni Dios rianladx

¿Ximod guibino guirá cós ni Jehová diti rioladx? (1)

¿Xí clas galyoxh diti rioladx Jehová? (2)

¿Ximod guibí guirá ni racanal Jesús galrrascú? (3)

¿Ni raguit né bidxiich? (3) ¿Galgobaʼn? (3) ¿Buñxiblo? (4) ¿Galchiser né galbruj? (5)

¿Galrrasoch? (6)

¿Ximod labúu cuéno cós mal ni diti rioladx Dios tiplad? (7)

1. Ni rony ni ná Dios ronladx cós tzaay né láaca raquiin guisuidybu guianladxbu cós mal (Salmo 97:10). Nga raduidy diitz que diti gonyno cós mal ni Dios rianladx. ¿Xí láani ngú cós ni diti non gonyno?

2. Galyoxh: Ór toib buñ ratné ni yása gac tzeʼel, órni toib ni ma noʼ tzeʼel ratné stoib, ni ratné nimal, buñ ni ratné xhomilca ni diti nac tzeʼel, ni ratné sabuñguieeu, galkié rodant láani nisló Dios (Levítico 18:6; Romanos 1:26, 27; 1 Corintios 6:9, 10). Pal toib buñguieeu né toib buñgonaʼ rabesné saʼ né diti ronyibu galtzeʼel, non guisian saʼyibu o gonybu galtzeʼel nisló buñchiin (Hebreos 13:4).

3. Galrrascú, ni raguit por bidxiich, galgobaʼn: Jehová diti rascú (Tito 1:2). Por ngú buñ ni ná guicaʼ galnasác xtuny Dios diti non guiscú (Proverbios 6:16-19; Colosenses 3:9, 10). Guirá galraguit por bidxiich ronyni buñ guisobladx más. Por ngú guirá ni racanal  Jesús diti raguit loteria (Efesios 5:3-5). Láaca diti rabambu, rasíbu cós ni nambu ni sieed de toib galgobaʼn o racábu cós nagach (Éxodo 20:15; Efesios 4:28).

4. Galradzuitz huaity, buñxiblo: Galradzuitz huaity rinéni lóono gonyno cós mal (Génesis 4:5-8). Ni radzuitzgulu diti labúu gac ximig Dios (Salmo 11:5; Proverbios 22:24, 25). Órni toib ronynaa lóono diti gonyno láabu scúca (Proverbios 24:29; Romanos 12:17-21).

5. Galchiser né galbruj: Stipnés buñ ranab que espíritu reʼ gacné láabu par labúu guisialbu galguitz. Stipnés rony bruj xi enemig par guixoʼ né par guigaitybu ngú. Guirá cós mal reʼ Buñdzab rony láani. Guirá ni racanal Jesús diti non gonybu nga (Deuteronomio 18:9-13). Ni labúu guilaa lóono de galchiser, láani ngú guiguano gahx Jehová (Proverbios 18:10).

6. Galrrasoch: Pal reeno tidxo cerves diti mal láani (Salmo 104:15; 1 Timoteo 5:23). Dios diti rioladx gueeno cerves goduidy midid né ni guisochno (1 Corintios 5:11-13; 1 Timoteo 3:8). Pal reʼ buñ cerves goduidy midid ronyni mal, né ragoʼni galradil lainy xhomil. Né ndeʼ gony que labúu tzaguiablo lo stipnés cós mal (Proverbios 23:20, 21, 29-35).

7. Buñ ni rony cós ni diti rioladx Jehová «diti labúu guibany lainy gobierno xtuny Dios» (Gálatas 5:19-21). Pal looy nigolú nadxilo Dios né nainy looy guibaladxbu, labúu sabélo cós mal tiplad (1 Juan 5:3). Bisuidy guianladxlo ni Dios raniʼ cós mal (Romanos 12:9). Bidzak né guirá buñ ni rony ni ranab Dios (Proverbios 13:20). Ni nigolú cayony ni ná Jesús toibsi né lóodo layibu labúu sacné lóono (Santiago 5:14). Ni nigolú sacné looy ngú Dios pal raninélo láabu guirá dzú (Filipenses 4:6, 7, 13).

[Dibuj ni sieed ló página 20]

Dios rianladx galrrasoch, galgobaʼn, ni raguit né bidxiich né ni radzuitzgulu