Lesiony 2

¿Chú láabu ngú Dios?

¿Chú ngú Dios ni rasuidy xinésni, né ximod laabu? (1, 2)

¿Xigony diti labúu rabino Dios? (3)

¿Ximod ná Biblia nac Dios? (4)

¿Láani ngú guiquiinno crois né dioxh par guienno Dios la? (5)

¿Xí chop mod rasuidy Dios lóono ximod nacbu? (6)

1. Buñ rien xidal cós. Biblia raby lóono, noʼ toibsi Dios NI RASUIDY XINÉSNl. Láabu ngú ni bisaʼ guirá ni noʼ lainy guibá né ni noʼ ló Gudxlio, por láabu nabanyno, né por ngú nosi láabu guienno (1 Corintios 8:5, 6; Revelación [Apocalipsis] 4:11).

2. Laa Dios ngú: JEHOVÁ. Ló xidal Biblia ma diti sieed laa Jehová nosi sieed Señor o Dios. Dzú cuá Biblia, laa Jehová ma sieed loni más de gatzmil buelt (Éxodo 3:15; Salmo 83:18).

3. Jehová, diti labúu rabino láabu. «Dios toib Espíritu», scú ná Biblia (Juan 4:24). Toib espíritu diti nacní xomod nacno. Ni toib buñ ma bibiʼ Dios. Jehová rabésbu lainy guibá né  rabíbu guirá ni ronyno (Salmo 11:4, 5; Juan 1:18). ¿Né xí ngú espíritu santo? Ditini toib buñ xomod Dios, láani toib fuers ni Dios raquiin par gonybu ni nábu (Salmo 104:30).

4. Biblia rabexa ximod nac Jehová. Raniʼ que láabu nadxibu, ronybu xinésni, napbu xiroʼ galnann, né galnadip (Deuteronomio 32:4; Job 12:13; Isaías 40:26; 1 Juan 4:8). Láaca raniʼ que Jehová ronladxbu lóono, né Dios tzaay nacbu, né ratuidybu xcalkiéno scásiʼ, raduidybu guirá cós ni caquiinno, né paseinys láabu. Lóono ni rasobno ni ná Dios, raquiin gonyno mod ronybu (Efesios 5:1, 2).

5. ¿Láani ngú guiquiinno crois, dioxh né retrat par guienno Dios la? Yaca (Éxodo 20:4, 5). Jehová ná nosi láabu guienno. Diti raduidybu lagary que guienno stoib, né diti guienno láabu. Né nánno que guirá stipnés dioxh cú diti labúu sacné lóono (Salmo 115:4-8; Isaías 42:8).

6. ¿Ximod labúu guimbuno Dios? Láani ngú guibino guirá cós ni ma bunybu por lóono né xi raniʼ ndeʼ de láabu. Guirá ni ma bunybu raduidy diitz que nigolú napbu galnadip né napbu xiroʼ galnann. Guirá ni ma bunybu rienni que nadxibu guirácano (Salmo 19:1-6; Romanos 1:20). Né stoib mod ni labúu guimbuno Dios, láani ngú pal rasuidyno ni ná Biblia. Loni rabyni lóono xí clas Dios láabu. Láaca raníni ni gonybu dzú ni sietra né xí ranabbu lóono (Amós 3:7; 2 Timoteo 3:16, 17).

[Dibuj ni sieed ló página 5]

Pal rabino guirá ni ma bisaʼ Dios né rolno Biblia sasuidyno más de láabu