Lesiony 11

Crenys né ni rony toib gudx ni diti rioladx Dios

¿Xí clas crenys né ni rony toib gudx ni diti rioladx Dios? (1)

¿Raquiin guiluladx guirá xpiin Jesús que Jehová nac tzón buñ toibsi Dios la? (2)

¿Xigony diti rony xpiin Jesús laninin, nabaʼan né ór rasaʼ toib buñ íz? (3, 4)

¿Labúu gony gueʼet mal ni nabany la? (5) ¿Goity Jesús ló toib crois la? (6)

¿Rasac gonyno ni rioladx Dios la? (7)

1. Diti guirá crenys né ni rony toib gudx nacní mal. Dios diti rioladx ni sieed de religión ni diti rasuidy xinésni, ni raniʼ ni diti sieed lo Biblia (Mateo 15:6).

2. Tzón buñ toibsi Dios: ¿Nac Jehová tzón buñ toibsi Dios la? Yaca. Jehová ngú bixiosno «toib Dios ni rasuidy xinésni» (Juan 17:3; Marcos 12:29). Jesús ngú Xiin lagol Jehová, né láabu rasobbu Dios (1 Corintios 11:3). Jehová ngú lagol lo Jesús (Juan 14:28). Espíritu santo ditini toib buñ xomod Dios, láani toib fuers ni Dios raquiin par gonybu ni nábu (Génesis 1:2; Hechos 2:18).

3. Laninin, né nabaʼan: Jesús diti golbu 25 de diciembre, golbu entre 1 de octubre, lo naa ro guirá ni ran xiil raguáyibu fuer guidopy gueʼel (Lucas 2:8-12). Jesús diti buny mandary xpiin ñony lanii dzú ni láabu golbu. Ni Jesús góoch layibu ngú nasednaladxyibu xcalgoitybu (Lucas 22:19, 20). Laninin né ni rony toib gudx ni diti rioladx Dios, sieetni de religión ni diti rasuidy xinésni ni ma noʼ xidzú. Né scú, labúu guinino stipnés cós ni rony toib gudx ni diti rioladx Dios xomod nabaʼan ór raguiix buñ promes o diti roobu beʼel. Guirá ni cuanal Jesús lo xtzúbu diti bunybu laninin né nabaʼan, né nigoreʼ ni racanal Jesús diti non gony láani.

4. Cumpleany: Chop cumpleany ni rasetlaa Biblia nacní pór xtuny ni diti  bisob ni ná Jehová (Génesis 40:20-22; Marcos 6:21, 22, 24-27). Guirá ni góc xpiin Jesús ló xtzúbu diti buny cumpleany. Ndeʼ sieetni de religión ni diti rasuidy xinésni ni ma xidzú noʼ. Ni racanal Jesús rascadyibu cós saʼyibu nitisi ór lo toib íz par tzóyibu goxt.

5. Ni radzuiby gueʼet: Gueʼet diti labúu rony xitcal né diti rien. Lóono diti labúu gacnéno layibu, né layibu diti labúu gonybu xitcal lóono (Salmo 146:4; Eclesiastés 9:5, 10). Órni toib buñ raity ¿alma xtunybu nabany né diti raity la? Yaca, órni raityno rabiguetno racnó yoo stoib (Ezequiel 18:4). Rioʼ ór noʼ demony ni raduidy por espíritu xtuny buñ ni ma goity. Guirá ni rony toib gudx par guidzuibyno o guienno gueʼet mál láani (Isaías 8:19).

6. Crois: Jesús diti goitybu lo toib crois, goitybu lo toib yac nadop. Diitz griega ni sieed ló xidal Biblia «crois», láani nga toib yac nadop. Crenys ni guiquin buñ crois sieetni de religión ni diti rasuidy xinésni, ni ma nap xidzú íz. Guirá ni cuanal Jesús lo xtzúbu diti biquiimbu né biembu crois. ¿Raluladxlo láani ngú guiquiinno crois par guienno Dios la? (Deuteronomio 7:26; 1 Corintios 10:14.)

7. Rioʼ ór nagann guisianno crenys né ni rony toib gudx ni diti rioladx Dios. Pentzi láaca noʼ xhomilo o ximiglo ni raquiil looy par diti guitzálo crenys xtunylo. Per bisednaladx más rasac gonyno ni ná Dios que ni ná buñ (Proverbios 29:25; Mateo 10:36, 37).

[Dibuj ni sieed ló página 22]

Jehová diti nacbu tzón buñ toibsi Dios

[Dibuj ni sieed ló página 23]

Laninin, sieetni de religión ni diti rasuidy xinésni ni ma nap xidzú íz

Diti napnó xi portín guidzuibyno né guienno gueʼet