Lesiony 12

Diti gonyno mal lóocano né guibino runy xomod Dios rabí laani

¿Ximod guibino guirá ni nabany? (1) ¿Né ni ratuidy xiin? (1)

¿Ximod raduidy diitz guirá ni racanal Jesús que nobu galrasaʼ par diti guisaclobu cós mal? (2)

¿Mal guigaityno nimal la? (3)

¿Xí cós raduidy diitz que diti napnó respet por guirá ni nabany? (4)

¿Xí raniʼ xtiitz Dios de runy? (5)

¿Láaca raníni pal labúu guicaʼno runy la? (6)

1. Jehová ngú ni Bisaʼ lóono. Guirá ni nabany nasaibybu Dios, portín Jehová bisaʼ láabu (Salmo 36:9). Guirá ni nabany rasacbú nisló Dios. Né toib badayen ni yása gál rasac nisló Dios. Dios diti rioladx nompa gonyno par guigaityno toib badayen ni yása gál (Éxodo 21:22, 23; Salmo 127:3).

2. Guirá ni racanal Jesús rióbu galrasaʼ par diti guisaclobu cós mal. Ronybu que xcamiónbu né lidxbu tzóni galán (Deuteronomio 22:8). Guirá ni rony ni ná Dios diti ronybu rries por nitisi cós par guisacbu sacró. Por ngú, diti raguitbu ro labúu gonynabu stipnés. Rarebu tiplad de guirá galnakit ni labúu gony mal saʼyibu (Salmo 11:5; Juan 13:35).

3. Ni Bisaʼ lóono, guirá nimal rasac par láabu. Ni racanal Jesús  labúu guigaitybu nimal par guabu, par guiquimbu guidlaidy nimal cú, par diti guituidymu galguitz lóono, par diti gonymu lóono xitcal (Génesis 3:21; 9:3; Éxodo 21:28). Mal láani gonynano né guigaityno nimal por galraguit o por ninásini lóono (Proverbios 12:10).

4. Ni cobno gues, mariguan, né stipnés guix par guisacno sacró, mal láani par ni racanal Jesús. Cós reʼ mal láani portín 1) rastopyni buñ, 2) ronyni mal lóono né 3) nisló Dios mal láani (Romanos 6:19; 12:1; 2 Corintios 7:1). Par guisianno guirá ndeʼ naganni, pal nainy lóono guibaladx Jehová non gonyno láani.

5. Runy láaca rasac nisló Dios. Láabu nábu que alma nóoni lo runy. Por ngú pal roono runy mal láani. Láaca pal guaano xpeel toib nimal ni diti bixútzaay xiruny mal láani. Pal toib nimal diti bixú runy o goity lo tramp diti labúu guaano láamu. Pal bigaityno láamu né guip, cuéno xirunymu sacró né órcuca, par labúu guaano láamu (Génesis 9:3, 4; Levítico 17:13, 14; Hechos 15:28, 29).

6. ¿Mal láani guicaʼno runy la? Bisednaladx Jehová ranab lóono diti guicaʼno runy. Ndeʼ raduidy diitz diti coono runy laidyno por ni toib mod, más pal nacní xiruny stoib buñ o xirunycano ni bireʼ laidyno ni notzaay (Hechos 21:25). Ni nigulú cayony né canal Jesús diti sacá runy. Labúu guicábu stipnés remeidy ni doctor raduidy láabu ni diti nap runy. Ni ná nainy guibanyibu, diti por ngú ma diti rasobbu Dios par guilábu (Mateo 16:25).

[Dibuj ni sieed ló página 25]

Par guibaladx Dios diti guicaʼno runy, diti gonyno cós yohx o gonyno rries nitisi cós ni nainy gonyno