Lesiony 15

Gacnéno buñ par gony ni ná Dios

¿Xigony guinilo ni cayenlo? (1)

¿Chú layibu labúu guisuidylo xtiitz Dios? (2)

¿Órni buñ guibí mod ni ronylo, xí gonyibu pensary de looy? (2)

¿Po ór nga ma labúu tzélo né xhermanlo par guinilo ni ná Dios? (3)

1. Looy ma bienlo xidal cós ni Biblia rasuidy. Ni ma nanlo labúu gacné looy guitzálo xpensarylo né scú labúu gonylo ni ná Jesús (Efesios 4:22-24). Né ni ma nanlo siné looy par guibanylo tipzó (Juan 17:3). Stipnés buñ láaca non gann xí ná xtiitz Dios par guilábu. Guirá ni racanal Jesús non guinibu xtiitz Jehová. Dios ngú ni raniʼ láani (Romanos 10:10; 1 Corintios 9:16; 1 Timoteo 4:16).

2. Labúu guisalolo guinilo cós tzaay ni cayenlo né buñ ni noʼ gahxca looy. Goní de láani xhomilo, ximiglo, né ni rielo scuel toibsi, né ni ronylo dxiin toibsi. Biyopy mod buny láani né paseinys (2 Timoteo 2:24, 25). Bisednaladx, buñ rabí mod ni rony toib buñ, diti mod ni ranibu. Por ngú, non gonylo cós tzaay par gacné stipnés guicadiag ni ná Dios (Mateo 5:16; 1 Pedro 3:1, 2, 16).

3. Órni ma bunyloʼ guirá ni canabni looy gonylo, ór cú labúu saalo yoʼ por yoʼ né testigos xtuny Jehová ro radoplo. Ndeʼ raduidy diitz que ni ma nanlo ma cayonylo láani (Mateo 24:14). ¡Xí sacroyen ngú labúu gacnélo toib buñ par gony xchiin Jehová né guidxin guibany tipzó! (1 Tesalonicenses 2:19, 20.)