Lesiony 5

¿Xí nainy Dios gony ló Gudxlio reʼ?

¿Xigony bisaʼ Jehová Gudxlio? (1, 2)

¿Xigony Gudxlio reʼ diti nacní toib lagary móz? (3)

¿Xí guisacloʼ guirá buñ mal? (4)

¿ Xí gony Jesús dzú ni sietra por buñ ni caxoʼ?, ¿buñ ni ma biox?, ¿por buñ ni ma goity? (5, 6)

¿Xí labúu gonylo par guicálo galnasác xtuny Jehová? (7)

1. Jehová bisaʼ Gudxlio par guiguaʼ buñ goxt loni né guibany tipzó. Goniiny láabu guiguaʼ buñ sacró né buñ tzaay nabés loni (Salmo 115:16; Isaías 45:18). Gudxlio diti sanitló (Salmo 104:5; Eclesiastés 1:4).

2. Nír nasaʼ Jehová Adán, golúbu toib lagary ló Gudxlio par ñonybu láani toib lagary móz, ni góc laa «lagary sacroyen». Cú golóbu Adán né Eva. Dios goní ñoʼ xiinyibu né nadalyibu ló Gudxlio. Né ñonyibu Gudxlio reʼ toib lagary móz (Génesis 1:28; 2:8, 15).

3. Adán né Eva bichébu ná biduidyibu cuent mal bunyibu ni diti bisobbu ni ná Dios. Por ngú, Jehová goleʼ layibu lainy lagary sacroyen reʼ né lagary cú binit (Génesis 3:1-6, 23). Jehová diti ma bialadx ni gonybu ló Gudxlio reʼ. Láabu goní gonybu Gudxlio toib lagary móz par guiguano tipzó. ¿Ximod gonybu láani? (Salmo 37:29.)

4. Nír guinitlo buñ mal, par Gudxlio reʼ guidxin gac toib lagary móz (Salmo 37:38). Né ndeʼ gacni ló Xtzú rodann Jehová, toib guerr ni Dios guitné, par cuébu cós mal. Ór cú Buñdzab guicadóbu tipmil íz, ndeʼ raduidy diitz que diti sioʼ ni toib ni gony mal ló Gudxlio. Nosi xcudx Jehová guilaa (Revelación 16:14, 16; 20:1-3).

 5. Ór cú Jesús gony mandary ló Gudxlio reʼ por tipmil íz (Revelación 20:6). Né diti xidzú guinitlo guirá galkié ni napnó. Né ór cú sacno xomod góc Adán né Eva dzú yása guichébu. Má diti sioʼ galguitz, ma diti sioʼx buñ né diti sioʼ galgoity. Buñ ni caxoʼ sial, né buñ ni ma biox sadxin sac mbioxhlas stoib (Job 33:25; Isaías 33:24; Revelación 21:3, 4).

6. Lo dzú gony mandary Jesús por tipmil íz, guirá buñ tzaay gony dxiin par labúu Gudxlio reʼ gacni toib lagary móz (Lucas 23:43). Láaca, xidal guixoʼ buñ ni ma goity sabany ló Gudxlio stoib (Hechos 24:15). Pal ronyibu ni ranab Dios, labúu guibanyibu tipzó ló Gudxlio. Pal diti ronyibu láani saityibu (Juan 5:28, 29; Revelación 20:11-15).

7. Né scá sac guirá ni goní Jehová ñony órni bisaʼbu Gudxlio. ¿Nainy looy guicaló galnasác xtuny Dios ni guiedra la? Pal scú láani raquiin guisuidylo xtiitz Jehová né guisoblo ni ranabbu lóono. Ni labúu gacné looy láani ngú tzélo Lagary ro radop testigos xtuny Jehová ni noʼ gahx ro rabéslo (Isaías 11:9; Hebreos 10:24, 25).

[Dibuj ni sieed ló página 10]

Lagary sacroyen ni ma binitlo

[Dibuj ni sieed ló página 11]

Gudxlio gacni toib lagary móz órni ma goduidy Xtzú rodann Jehová