Lesiony 6

¿Xí ngú Gobierno xtuny Dios?

¿Pu lagary noʼ Gobierno xtuny Dios? (1)

¿Chú ngú ni gony mandary Gobierno reʼ? (2)

¿Noʼ stipnés ni gony mandary né láabu la? Pal scú láani, ¿balacyibu? (3)

¿Xí raduidy diitz que ma rabésno ló dzú ni ma guidubylagá? (4)

¿Xí gony Gobierno xtuny Dios dzú ni sietra por guirá buñ? (5-7)

1. Órni Jesús goyobu ló Gudxlio, bisuidybu guirá xpiimbu guinab guieed Gobierno xtuny Dios. Gobierno xtuny Dios diti noʼ stoib xomod láani. Ma nóoni lainy guibá né gony mandary ló Gudxlio reʼ. Gonyni que laa Jehová gac nayaa. Né Gobierno reʼ gony par gac ni ná Jehová ló Gudxlio xomod lainy guibá (Mateo 6:9, 10).

2. Dios goní, Jesús gony Mandary lainy Gobierno Xtunybu (Lucas 1:30-33). Órni Jesús goyobu ló Gudxlio, biduidybu diitz que xomandarybu gac natzaay né láabu diti gap galkié. Órni bibiguetbu lainy guibá, diti gosalobu buny Mandarybu ni maca (Hebreos 10:12, 13). Íz 1914 Jesús gosaló buny mandary mod ni Jehová goní gonybu. Né dzúcu gosaló Jesús cayony Mandary lainy guibá portín Jehová golú láabu (Daniel 7:13, 14).

3. Jehová ma golúbu stipnés buñguieeu né buñgonaʼ ni rony ni nábu ló Gudxlio reʼ, par guiebu lainy guibá. Guiráyibu gony mandaryibu né Jesús a guirá buñ (Lucas 22:28-30; Revelación 5:9, 10). Jesús goní laa ni tzó né láabu ngú «tidxo buñ ni gony mandary lainy guibá». Né nacyibu 144,000 (Lucas 12:32; Revelación 14:1-3).

4. Órni Jesús gosaló buny Mandary, golébu Buñdzab né guirá demony xtuny lainy guibá, né bilitbu Buñdzab ló Gudxlio. Né de goloʼ 1914 noʼ más xiroʼ cós mal ló Gudxlio (Revelación 12:9, 12). Guerr, galrralán, xidal galguitz ni ragaitygulú buñ, xiroʼ cós mal..., guirá ndeʼ «raduidy  diitz» que Jesús ma cayony mandary, né gobierno xtuny Buñdzab mápa mer guinitlo (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Mápa mer Jesús cuébu tiplad guirá buñ mal de buñ tzaay, xomod toib ni ran nimal ragobu tiplad xilieen né chiv stoib lagary. Jesús raniʼ «xilieen» ni rony ni nábu par scú guibanyibu tipzó ló Gudxlio. Guirá ni nac xomod «chiv» ngú ni diti rioladx guisob ni ná Gobierno xtuny Dios (Mateo 25:31-34, 46). Dzú ni sietra, Jesús guinitlobu guirá buñ mal ni nac xomod chiv (2 Tesalonicenses 1:6-9). Pal nainy looy gaclo «xilieen» xtuny Jesús guicadiaglo ni ná Gobierno xtuny Dios né gonylo ni casuidylo (Mateo 24:14).

6. Ló Gudxlio noʼ xidal gudx né cada toib nap buñchiin xtuny. Gudxrop radiilbu né saʼyibu. Gobierno xtuny Dios sioʼ xolagary guirá buñchiin ni noʼ ló Gudxlio reʼ. Nosi Gobierno xtuny Dios sioʼ ló Gudxlio (Daniel 2:44). Ór cú ma diti sioʼ guerr, né ma diti sioʼ cós mal. Guirá buñ sabany sacró né sioʼ toibsi (Miqueas 4:3, 4).

7. Jesús gony Mandary tipmil íz, né guirá buñ ni guisob ni ná Jehová sacbu buñ ni diti nap galkié, né Gudxlio reʼ sadxin sac toib lagary móz. Órni ma goduidy tipmil íz cú, Jesús ma buny guirá ni Jehová góoch láabu ñonybu. Ór cú Jesús gony cuent Gobierno cú Bixios (1 Corintios 15:24). ¿Xigony diti raibylo ximiglo guirá cós ni gony Gobierno xtuny Dios?

[Dibuj ni sieed ló página 13]

Órni Jesús gony mandary, ma diti sioʼ galrrianladx