Lesiony 7

Ximod guibigno Dios órni guininéno láabu

¿Xigony raquingulú guininéno láabu guirá ór? (1)

¿Chú láabu non guinapno par gacné lóono, né ximod gonyno láani? (2, 3)

¿Xí labúu guinino ór guininéno Dios? (4)

¿Po ór labúu guininéno Dios? (5, 6)

¿Racadiag Dios guirá ni ranapno láabu la? (7)

1. Órni guininéno Dios gonyno láani né respet. Guininéno Dios guirá ór. Pal ronyno láani, Jehová sadxin sac ximigno. Ni ná Jehová nap xiroʼ galnadip, láabu racadiag ór raninéno láabu. ¿Raninélo Dios guirá ór la? (Salmo 65:2; 1 Tesalonicenses 5:17.)

2. Órni raninéno Dios láani toib mod par guienno láabu. Por ngú, non guininéno nosi Jehová. Órni Jesús goyobu ló Gudxlio, guirá ór goninébu Bixiosbu diti goyoʼ stoib. Lóono  láaca gonyno scúca (Mateo 4:10; 6:9). Órni guininéno Dios guinino laa Jesús. Scá saduidyno diitz que rony respetarno lagary ni nap Jesús, né raluladxno ni bunybu al goitybu por lóono (Juan 14:6; 1 Juan 2:1, 2).

3. Órni guininéno Dios, guinino ni noʼ lainy xcalnabanyno. Diti guininéno Dios de memory né diti gólno láani de toib guiich ni gaiby lóono ximod gonyno láani (Mateo 6:7, 8). Labúu guininéno Dios nitisi mod né respet, guirá ór né guirá lagary. Dios racadiag ór raninéno láabu dzudiguié, lainy xcalnabanyno (1 Samuel 1:12, 13). Galán láani que guininéno Dios toib lagary ro diti noʼ ruid, né  ro diti noʼ buñ (Marcos 1:35).

4. ¿Xí labúu guinilo ór guininélo Dios? Labúu guinilo xidal cós ni gacné looy par guibiglo Dios (Filipenses 4:6, 7). Mod ni bisuidy Jesús xpiin, rasuidyni lóono órni guininéno Dios gony xiroʼno laabu né guinapno ni gonybu dzú ni sietra. Láaca labúu guinapno par gacnébu lóono tuidyno dzú, láaca par guituidybu xcalkiéno scásiʼ né par diti guiabno ló cós mal (Mateo 6:9-13). Órni guininéno Dios diti guinino de lóosino. Guinapno cós ni láabu rioladx par labúu gonyno ni nábu (1 Juan 5:14).

5. Labúu guinilo né Dios ór xcalnabanylo rachiinni looy gonylo láani, né par gony xiroʼlo laa Dios (1 Crónicas 29:10-13). Diti guisianlo guininélo Dios órni caduidylo ló galnagan o órni rasacloʼ nagann par gonylo ni ná Dios (Salmo 55:22; 120:1). Láaca galán guininéno Dios órni ma guan guet (Mateo 14:19). Jehová raiby lóono guininéno láabu «guirá ór» (Efesios 6:18).

6. Pal bunyno toib galkié roʼ, guininéno Dios ni maca né guinabno Dios xcalronladxbu. Dios nobu «puext par guituidybu xcalkiéno scásiʼ» pal rasetno xcalkiéno né diti gonyno láani stoib (Salmo 86:5; Proverbios 28:13).

7. Jehová racadiag guirá ni raniné láabu, né ni cayony xinésni. Pal nainy looy guicadiag Dios guirá ni ranilo né láabu, gonylo por guibanylo mod ni láabu rioladx (Proverbios 15:29; 28:9). Órni guininélo Dios gonylo láani né respet (Lucas 18:9-14). Guirá ni guinaplo órni guininélo Dios buny por gonylo láani. Scá guiduidyloʼ diitz que raluladxlo ni ná Dios né raninélo láabu guidopy xcalnabanylo. Né scú Jehová guicapy looy, órni raninélo né láabu (Hebreos 11:6).