Lesiony 13

Ximod labúu guidzel lo religión ni rasuidy xinésni

¿Rioladx Dios guirá religión ni noʼ o nosi toib la? (1) ¿Xigony noʼ xidal religión ni raniʼ racanal Jesús? (2) ¿Ximod labúu guimbulo ni racanal Jesús? (3-7)

1. Jesús gosaló né bisian toibsi religión ni rasuidy xinésni. Por ngú, ló xtzúno non tzó toibsi religión ni guieen Jehová (Juan 4:23, 24; Efesios 4:4, 5). Biblia rasuidy guxé buñ casaa ló néz nabé ni riné lóono guibanyno tipzó (Mateo 7:13, 14).

2. Biblia goní órni guirá xpiin Jesús gaity, lad guirá ni cuanal Jesús, sioʼ buñ ladyibu ni guisuidy pór garascu né cós ni diti sieed lo Biblia. Láaca sioʼ buñ ni guisuidy ni diti xinés par tzó ni diti guicanal Jesús (Mateo 7:15, 21-23; Hechos 20:29, 30). Por ngú nigoreʼ rabino xidal religión ni raniʼ racanal Jesús. ¿Ximod labúu guimbuno guirá ni racanal Jesús né ni cayony xinésni?

3. Ni más rien ni rony ni racanal Jesús ngú, ni noʼ galnadxi ladyibu (Juan 13:34, 35). Diti rasuidybu que más rasacbú que stipnés family o xcolorbu. Né láaca diti rasuidybu guianladxbu stipnés buñ de stoib gudxrop (Hechos 10:34, 35). Né por ngú diti rieb guerr. Né guirá ni racanal Jesús raniyibu saʼyibu herman (1 Juan 4:20, 21).

4. Né stoib mod ni raduidyno cuent xí religión casuidy xinésni, ngú que guiráyibu nap xiroʼ respet Biblia. Racábu láani xomod Xtiitz Dios né raluladxbu ni raníni (Juan 17:17; 2 Timoteo 3:16, 17). Par guiráyibu, Xtiitz Dios más rasac, que ni rony toib gudx ni diti rioladx Dios, né ni buñ rony pensary (Mateo 15:1-3, 7-9). Ronybu por láani, par gonybu xinésni guirá ór. Diti rasuidybu toib cós né ronybu stoib cós (Tito 1:15, 16).

 5. Religión ni rony xinésni láaca non gonyxiroʼ laa Dios (Mateo 6:9). Jesús bisuidy laa Dios, Jehová, né guirá ni racanal Jesús raquiin gonybu scúca (Juan 17:6, 26; Romanos 10:13, 14). ¿Chú layibu ngú ni rasuidy laa Dios ro rabéslo?

6. Guirá ni racanal Jesús non guiniʼ de Gobierno xtuny Dios. Jesús buny láani. Láabu guirá ór goníbu de Gobierno xtuny Dios (Lucas 8:1). Láaca, bixelbu xpiimbu guiniʼ ngúca lo guidopy Gudxlio (Mateo 24:14; 28:19, 20). Ni racanal Jesús raluladx que nosi Gobierno xtuny Dios sony par guibanyno goxt né sacró ló Gudxlio (Salmo 146:3-5).

7. Xpiin Jesús diti ronybu mod ni rony gudxliogoxreʼ (Juan 17:16). Diti rióyibu lad partid né diti radiilbu. Rareʼyibu tiplad de guirá cós yox, né diti ronybu mod ni rony buñ ni noʼ ló gudxliogoxreʼ (Santiago 1:27; 4:4). ¿Rimbulo toib religión ro rabéslo ni rasuidy xinésni né nap guirá ni ma bisetlano la?

[Dibuj ni sieed ló página 27]

Ni nigolú racanal Jesús rony nadxi saʼ, rony ni ná Biblia né ranibu de Gobierno xtuny Dios