Lesiony 14

Ximod rony testigos xtuny Jehová dxiin

¿Pu dzú gosaló historia de testigos xtuny Jehová? (1) ¿Xi ni ronyibu órni radopbu guirá xomal? (2)

¿Ximod riax guirá gaxt ni ronyibu? (3)

¿Chú ngú ni rasanir lad xiermanbu? (4)

¿Noʼ stoib ór ló íz radopyibu más xidalyibu la? (5)

¿Xí dxiin ronybu Nueva York né stipnés gudxrop ro ronyibu dxiin? (6)

1. Historia xtuny testigos xtuny Jehová gosaloni íz 1870. Nír góc layibu Ni Rasuidy Biblia, né goloo íz 1931 gosaló góc layibu testigos xtuny Jehová, né diitzreʼ sieed ló Biblia (Isaías 43:10). Dzú gosaló xchiin testigos xtuny Jehová guxeeyibu, nigoreʼ ma xidal Testigos noʼ ni casaa cáni xtiitz Dios ló más de chopgayó treint gudxrop.

2. Testigos xtuny Jehová radopyibu tzón buelt lainy xomal. Looy labúu tzélo par guidoplo toibsi né layibu (Hebreos 10:24, 25). Guirá ni rasuidyibu caani ló Biblia. Ór rasaló né ralox xi reuniónyibu, ranabbu ló Dios gacné layibu, né roʼlbu «cántico ni raniʼ de Dios» lainy xcalnabanyibu (Efesios 5:18, 19). Labúu tzólo scásiʼ né diti quixlo (Mateo 10:8).

3. Guirá Testigos reʼ radopyibu toib lagary par ronyibu xi reuniónyibu. Né Lagary reʼ toib yoʼ sencill láani né pór Testigos rasaʼ láani, né diti racábu bidxiich. Lainy cú diti sabiʼlo dioxh né crois ni stipnés cós. Gaxt ni ronyibu riaxni por ni ná guiduidy bidxiich scásiʼ. Né ni ná guiduidy tidxo  bidxiich labúu rony láani, ragobu láani lainy toib cajien ni noʼ par láani (2 Corintios 9:7).

4. Lagary ro radopyibu noʼ herman ni nac anciano ni rasanir par guisuidy (1 Timoteo 3:1-7; 5:17). Láaca noʼ ministerial ni racné anciano (1 Timoteo 3:8-10, 12, 13). Layibu diti más rasacbú que stipnés herman (2 Corintios 1:24). Diti racábu toib laa par guisacbu más que stipnés (Mateo 23:8-10). Diti noʼ toib clas de lairy ni rocyibu. Diti racábu bidxiich por dxiin ni ronyibu. Anciano rioladx gacné guirá xherman par guisuidy Xtiitz Dios. Racnébu né raduidybu litz órni toib caduidy ló galnagan (Santiago 5:14-16; 1 Pedro 5:2, 3).

5. Testigos xtuny Jehová láaca ronybu samblia guirá íz. Ló dzú ni rac samblia, radop Testigos de xidal lagary par guisuidyibu né guicadiagyibu ni ná Biblia. Toib cós ni rac ló samblia reʼ, láani ngú ni xidal buñ rionis né radxiin racanal Jesús (Mateo 3:13-17; 28:19, 20).

6. Toib lagary xiroʼ ro rony testigos xtuny Jehová dxiin ngú Nueva York. Lagary reʼ noʼ Tidxo Buñ ni nap xiroʼ Galnann ni Rasanir ló guirá dxiin ni rony testigos xtuny Jehová, guiráyibu nac anciano ni racá cuidad ximod cayony guirá xiermanbu dxiin ni noʼ guidopynac ló gudxlio. Ló gudxlio noʼ más de tigayoʼ lagary ro rony testigos xtuny Jehová dxiin. Guirá ni rony dxiin cú racnébu par tzá más libro né Biblia né raxelbu láani. Lagary cú raniyibu ximod ngú saano yoʼ por yoʼ. ¿Xigony diti ronylo por láani par tzélo lagary ro ronyibu dxiin ni noʼ más gax ro rabéslo?