LESIONY 01
¿Ximod labúu gacné la Biblia looy?
Xidalno ranabdiitzno de galnabany, galrrioʼob, galgoity né ni gac ló dzú ni sietra. Láaca rioʼno galrrasaʼ ximod tudyno dzú né ximod guibanyno goxtiguie né xfamilno. Xidal buñ radudy cuent que la Biblia racapy guirá galrranabdiitz reʼ né láaca radzelyibu consej galán loni ni labúu gacné layibu. ¿Nálo que la Biblia labúu gacnéni toibtica buñ ni rimbulo la?
1. ¿Xí galrranabdiitz racapy la Biblia?
La Biblia racapy galrranabdiitz ni rasac xomod ndeʼ: ¿ximod gosaló galnabany?, ¿xigony noʼno reʼ?, ¿xigony radudy buñtzay ló galrrioʼob?, ¿xí rac buñ órni raity?, ¿xigony nogoluʼ galrradíil janlo guirá buñ ná guiguaʼ sacró la? né ¿xí gac né Gudxlio ro rabésno? La Biblia raiby lóono guiyopyno loni ximod rarexa galrranabdiitz reʼ né xidalguixo buñ rasacyibu sacró por guirá ni ma bisuidyibu.
2. ¿Ximod racné la Biblia lóono guibanyno goxtiguie dzú ná dzú?
La Biblia radudy consej lóono. Por ejemplo, rasuidyni famil ximod guiguaʼ sacró. Láaca raibyni lóono xi labúu gonyno pal nigolú noʼno ló galrrasaʼ né ximod guioladxno xchiinno. Laʼga casuidyno guiich reʼ, sasuidylo ximod rabexa la Biblia ndeʼ né stipnés temas. Sadudylo cuent que «guidopynac la Biblia racnéni lóono» (2 Timoteo 3:16).
Guiich reʼ diti rioʼni xalagary la Biblia. Xalagary ngú sacnéni looy guienlo ni náni. Por ngú ranabdo looy goʼolo guirá textos ni sieed ló tigaaga lesiony né guitzaklo láani né ni casuidylo.
NANOY GUISUIDYNO LÁANI
Guisuidyno ximod ma gocné la Biblia stipnés buñ, xi labúu gonyno par guioladxno golno láani né xigony galán tzoʼ ni gacné lóono guienno ni náni.
3. La Biblia ragonés lóono
La Biblia nacni xomod toib lámpara ni rasanídxich ló xinésno. Labúu gacnéni lóono ganno xi láani gonyno né láaca raibyni lóono xi gac ló dzú ni sietra.
Colgoʼol Salmo 119:105 né colgooy xtiitzni:
-
Buñ ni bicaʼ salmo reʼ, ¿ximod bibiʼbu la Biblia?
-
Looyga, ¿ximod rabiʼlo la Biblia?
4. La Biblia racapy ni ranabdiitzno
Toib buñgonaʼ bidudy cuent que la Biblia racapy galrranabdiitz ni goniiny ñanbu por xidal íz. Colguibiʼ VIDEO reʼ né colgooy xtiitzni:
-
¿Xí goniiny ñan buñgonaʼ ni bibiʼno ló video reʼ?
-
¿Ximod gocné la Biblia láabu órni bisuidybu láani?
La Biblia raiby lóono guiyopyno ni raniiny ganno. Colgoʼol Mateo 7:7 né colgooy xtiitzni:
-
¿Nálo que la Biblia labúu nacapy tipnés galrranabdiitz ni ronylo la? Por ejemplo, ¿xí clas galrranabdiitz?
5. Labúu guioladxno golno la Biblia
Xidal buñ rioladx goʼol la Biblia né cayacnéni layibu. Colguibiʼ VIDEO reʼ né colgooy xtiitzni:
-
¿Xigony gosac nagan guirá mbioxhlas reʼ ñoʼol?
-
¿Xigony rioladxyibu goʼolyibu la Biblia ná diti rioladxyibu goʼolyibu stipnés guiich?
Xcalrrasuidy la Biblia rasialdóni xcalnabanyno né radudyni esperanza lóono. Colgoʼol Romanos 15:4 né colgooy xtiitzni:
-
¿Nainy looy ganlo más ximod rasialdó la Biblia xcalnabanyno né xí esperanza radudyni lóono la?
6. Labúu guienno ni ná la Biblia né xcalrracné stoib buñ
Noʼ buñ rioladx goʼol la Biblia toib, per láaca rioladxyibu tzoʼ ni gacné layibu guienyibu ni náni. Colgoʼol Hechos 8:26-31 né colgooy xtiitzni:
-
¿Ximod labúu guienno ni ná la Biblia? (Colguibiʼ ni ná versículos 30 né 31).
Buñguieeu de gudx Etiopía biquiimbu que ñoʼ ni ñacné láabu ñembu ni ná la Biblia. Ló naareʼ xidal buñ racnéni layibu guisuidyibu la Biblia né xcalrracné stoib buñ.
TIPNÉS BUÑ NÁ: «Nagan par guieen buñ la Biblia».
-
Looyga, ¿xí nálo? ¿Xigony?
¿XÍ BISUIDYLO?
La Biblia sitnéni consej galán ni labúu gacné lóono, racapyni galrranabdiitz ni rasac, rasialdóni xcalnabanyno né radudyni esperanza lóono.
Repas
-
¿Xí clas consej radzelno ló la Biblia?
-
¿Xí galrranabdiitz racapy la Biblia?
-
¿Xí naniiny looy nasuidylo ló la Biblia?
PAR GANLO MÁS
Gon xigony consej ni sieed ló la Biblia nigolú racnéni lóono ló naareʼ.
«Xcalnan la Biblia dipa radudy xtzúni» (Guiich ni caniʼ, núm. 1 íz 2018)
Gon ximod gocné la Biblia a toib buñguieeu ni goniʼ que desde dzú gócbu mbioxien nac nacsi bibanybu.
Gon xi galán consej sieed ló la Biblia par guibanylo goxtiguie né xfamilo.
«12 cós ni gacné famil guibany goxt» (¡Despertad!, núm. 2 íz 2018)
Bibiʼ ximod rabexa la Biblia chú ngú ni merpa rony mandary gudxliogoxreʼ.
Sigory láaca sioladxlo ndeʼ
NI MÁS RANABDIITZ BUÑ
¿Ximod rasuidy testigos xtuny Jehová buñ?
Órni guisuidylo né testigos xtuny Jehová labúu guiquiinlo nitisi traducción xtuny la Biblia. Labúu guiruʼlo guirá xfamilo né ximiglo par gony compañer looy.
