Guiráno rayopyno xi clas lairy guacno né ximod gactzayno. Labúu gactzayno sacró né coʼ nakitno xcalnabany Jehová pal rasobno tipnés principios ni sieed ló la Biblia ni diti nagan. Guisuidyno tipnésni.

1. ¿Xí principios labúu gacné lóono órni gactzayno?

Toib cristiano non guiyopybu «xi lairy guacbu né ximod gactzaybu né midid né coʼbu xcalrriembu». Láaca non guislooybu que ractzaybu sacró xomod toib buñ ni «rony adorar a Dios» (1 Timoteo 2:9, 10). Cuá cuidad tap principios ni rasuidyno de texto reʼ. 1) Xhapno non guienni sacró. Lainy xcudx Jehová noʼ xidal mod par gactzay buñ xomod ma bibiʼlo ló reunión ni rac lainy congregación, per xhapno né mod ragoʼnyno guicno raslooyno que napno respet Dios ni rony adorarno. 2) «Gactzay buñ né midid» ndeʼ radudy diitz que xhapno ni guacno diti gonyni que buñ gony pensary ló galyoxh, né diti guacno lairy ro guisanadx buñ lóono. 3) Raslooyno que «noʼ xcalrrienno» órni diti rocno nitisi lairy ni careʼga. 4) Mod ractzayno guirá ór non guislooyni que rony «adorarno Dios», portín modreʼ raslooyno a stipnés buñ que rony adorarno Dios ni nigolú (1 Corintios 10:31).

2. ¿Ximod labúu guibiʼ tipnés cristianos mod ractzayno?

Guiráno napno permís par guiyopyno xi lairy guacno per non gonyno pensary que mod ractzayno labúu coʼni galnagan ronoʼ stipnés. Ronyno rutirigaʼlni lóono par diti tudy stipnés buñ ló galnatoy. Rasobno consej reʼ: «Tigaagano raquiin gonyno ni guioladx saʼno par gacnéno láabu guisagaʼdxichbu» (bíil Romanos 15:1, 2).

3. ¿Ximod labúu gacné mod ractzayno a stipnés buñ par guimbuyibu Jehová?

Rocno lairy ni rien sacró guirá ór. Per rapno cuidad xi lairy rocno órni rioʼno reunión né órni ranino xtiitz Dios. Diti nainy lóono que mod ractzayno gonyni que guiniʼ buñ mal de mensaj ni sanéno. Xalagary ngú nainy lóono que gacnéni stipnés buñ guimbu galnigolú «né modreʼ xcalrrasuidy Dios ni Ralaa guienni mózdiguieʼ» (Tito 2:10).

 NANOY GUISUIDYNO LÁANI

4. Órni ractzayno sacró raslooyno que napno respet Jehová

¿Xí razón ni más rasac noʼ par tzoʼno galrrasaʼ por mod rienno? Colgoʼol Salmo 47:2 né colgooy xtiitzni:

• Mod ractzayno, ¿ximod labúu guislooyni que rony representarno Jehová?

• Xpensarylo, ¿láani ngú guicaano cuidad ximod ractzayno órni rioʼno reunión o órni ranino xtiitz Dios la? ¿Xigony ronylo pensary scá?

 5. ¿Ximod cutzayno xí lairy guacno né ximod gactzayno?

Colguibiʼ VIDEO reʼ.

Ná pal rasac xhapno o yaca, ni más rasac láani ngú que gac nayaani né guienni sacró guirá ór. Colgoʼol 1 Corintios 10:24 né 1 Timoteo 2:9, 10. De ngú colguiniʼ xigony diti non guacno lairy ni...

• ... diti rien sacró.

• ... nabédxich, ni radudy binii o ni labúu gony que stipnés gony pensary ló galyoxh.

Ná lóono ni nacno cristianos ma diti non guisobno Ley ni cuaʼ Moisés, ley reʼ rasienni lóono xi láani rony pensary Jehová. Colgoʼol Deuteronomio 22:5 né colgooy xtiitzni:

• ¿Xigony toib buñgonaʼ diti non gactzaybu xomod ractzay toib buñguieeu nili toib buñguieeu diti non gactzay xomod toib buñgonaʼ?

Colgoʼol 1 Corintios 10:32, 33 né 1 Juan 2:15, 16, né colgooy xtiitzni:

• Pal mod ractzayno ñonyni que buñ ni rabés lagary ro rabésno diti nasac sacró né herman ni noʼ lainy congregación, ¿non coʼno cuent láani la? ¿Xigony?

• ¿Xí clas lairy né ximod ractzay buñ lagary ro rabéslo?

• ¿Ronylo pensary que mod ractzayibu né mod rocyibu lairy diti nacni par toib cristiano la? ¿Xigony ronylo pensary scá?

 ¿XÍ BISUIDYLO?

Órni rayopyno xi clas lairy guacno o ximod gactzayno raslooyno que rapno respet Jehová né stipnés buñ.

Repas

• ¿Xigony rioʼ Dios galrrasaʼ por mod ractzayno?

• ¿Xí principios labúu gacné lóono mod gactzayno?

• Mod ractzayno, ¿labúu gacnéni buñ par guibigaxyibu Jehová la? ¿Xigony racapylo modca?