1.  Chú ngú Babilonia la Grande

2.  ¿Pu dzú narecaa Mesías?

3.  Mod raquiin doctor runy

4.  Órni toib labúu guisian saʼ

5.  Lanii né costumbres

6.  Galguitz ni radudy

7.  Negosy né stipnés cós

 1. Chú ngú Babilonia la Grande

¿Xigony ranino que «Babilonia la Grande» rony representarni guirá religión falz? (Apocalipsis 17:5). Guisuidyno tzón razón.

• Noʼni ló guidopynac Gudxlio. La Biblia ná que sobni lad «xidalguixo buñ» né ló «gudxrop», né rony «mandaryni reyes ni noʼ ló Gudxlio» (Apocalipsis 17:15, 18).

• Diti labúu gacni toib potencia política nili toib negosy ni noʼ ló Gudxlio. Mod ná la Biblia, «reyes ni noʼ ló Gudxlio» né buñ ni rony negosy» nabanysayibu órni guinitló Babilonia la Grande (Apocalipsis 18:9, 15).

• Rony buidyni laa Dios. Laani toib «gonaʼ yox» portín ronyni dxiin né gobiernos ni raguiix né rony stipnés favor layibu (Apocalipsis 17:1, 2). Rascúni guiránac buñ ni noʼ ló guidopynac Gudxlio né napni dool de xidal buñ ni raity (Apocalipsis 18:23, 24).

Golno stoib lesiony 13 número 6

 2. ¿Pu dzú narecaa Mesías?

La Biblia bisetlaa que antes ni narecaa Mesías non naclani 69 xomal (bíil Daniel 9:25).

• ¿Pu dzú gosaló 69 xomal? Ló íz 455 antes de xtzúno. Ízcu, gobernador Nehemías bidxinbu gudx Jerusalén par «ñony copybu» né nasaʼbu gudxcu stoib (Daniel 9:25; Nehemías 2:1, 5-8).

• ¿Balac gocla 69 xomal? Ló tipnés profecías ni sieed ló la Biblia tipdzú radudyni diitz tobiz (Números 14:34; Ezequiel 4:6). Por ngú, tixomal radudyni diitz 7 íz. Ló profecía reʼ, 69 xomal napni 483 íz (69 rac multiplicarni por 7).

• ¿Pu dzú bilox 69 xomal? Pal ragabno 483 íz desde íz 455 antes de xtzúno, radxinno ló íz 29 ló xtzúno. a Ló ízcu goyonis Jesús né bidxin gócbu Mesías (Lucas 3:1, 2, 21, 22).

Golno stoib lesiony 15 número 5

 3. Mod raquiin doctor runy

Noʼ tipnés mod ro raquiin doctor xirunyca buñ ni caxoʼ, per diti guiráni labúu guicacuent toib cristiano. Por ejemplo, diti rascadno xirunyno nili radudyno lagary coʼtzayibu láani par guiquiinyibu órni gony operaryibu lóono después (Deuteronomio 15:23).

Noʼ tipnés remeidy ni labúu guicacuentno xomod órni ronyibu análisis de runy, hemodiálisis, hemodilución o máquina ni ratoplóo runy o máquina de circulación extracorpórea. Tigaaga cristiano non guiniʼ ximod guiquiin xiruny órni gac operar, o órni gacbu toib análisis o órni gacbu remeidy. Tigaaga doctor gadzé mod raquiinyibu runy. Por ngú antes de gac operar buñ o gac toib análisis o guicaʼbu remeidy, toib cristiano non gan xipa mod guiquiin doctor xirunybu. Gonabdiitz ndeʼ looy:

• Pal doctor nabeʼ xiruni por tidxósi tiemp né nayopybu mod par ma diti naxonyni, ¿nadudy xcalrriena lagary naʼ que runycu nacsani xiruni né por ngú diti raquiin guixúni layoo la? (Deuteronomio 12:23, 24).

• Né pal ló ro cayaca remeidy nabeʼyibu xiruni par nasiáyibu láani né nagoʼyibu runycu ladi stoib, ¿ñonynudy xcalrriena naʼ ni ma naana xi ná la Biblia o nacacuenta remeidycu la?

Golno stoib lesiony 39 número 3

 4. Órni toib labúu guisian saʼ

Xtiitz Dios diti rasetlani pal guisian buñ saʼ né nayadit rabexani que buñ ni rasian saʼ diti labúu gonyibu galtzeʼel stoib (1 Corintios 7:10, 11). Per tipnés cristianos ronyibu pensary que labúu guisianyibu saʼyibu órni racalóyibu tipnés galnagan xomod ndeʼ.

• Órni diti nábu guiyaʼanbu xfamilbu: Buñguieeu diti ná gony dxiin par guiyaʼan xfamil, dada radxin midid diti radudybu xitcal xfamilbu (1 Timoteo 5:8).

• Radudy midid ronynabu tzeelbu: Noʼ buñ ni nadoxgoluʼ né noʼ riesga gonynabu o dada guigaitybu tzeelbu (Gálatas 5:19-21).

• Noʼ xiroʼ riesga galsitbu de Jehová: Noʼ buñ diti radudy lagary tzeʼel gony ni ná Jehová hasta rony lafuersbu tzeelbu diti guisob ni ná la Biblia (Hechos 5:29).

Golno stoib lesiony 42 número 3

  5. Lanii né costumbres

Lóodo ni nacdo cristianos diti rioʼdo lanii ni diti racacuent Jehová. Per tigaaga cristiano ni nan ni ná la Biblia xcalrriembu guisanés láabu xi láani gonybu órni tzoʼ toib lanii. Cuá cuidad ló ejemplos reʼ.

• Toib buñ raiby looy goyoʼ nakit ló lanii. Sigory labúu guiniʼlo «guixquix looy». Pal buñcu ná gan más, labúu gaibylo láabu xigony diti ronylo laniicu.

• Pal tzeʼelo ni diti nac testigo xtuny Jehová, raiby looy tzeelo par guálo né xfamilbu dzú ni ronyibu toib lanii. Pal xcalrrienlo radudy lagary looy tzeelo, labúu gaibylo láabu que pal ló laniicu noʼ costumbres pagan diti sonylo láani.

• Xpatronlo radudy bidxiich o raguiixbu looy órni rac toib lanii. ¿Non guicacuentlo láani la? Yaca. ¿Xpatronlo rony pensary que bidxiichcu radzakni né laniicu la? ¿O nosi cadudybu láani looy ro caslooybu que cadudybu guixquix looy por dxiin galán ni ronylo la?

• Toib buñ radudy galrrascad looy órni rac toib lanii. Pentzi buñcu raiby looy: «Ma naana que diti ronylo lanii reʼ, per nainy naʼ guidudi ndeʼ looy». Sigory nosi nainy láabu gacbu buñtzay né looy. Per ¿noʼ razón par gonylo pensary que nainy láabu coʼbu prueby fe xtunylo o par guisaguelo tzeelo toib lanii la? Órni ma bunylo pensary, looy ganlo pal guisaguelo guicacuentlo galrrascadcu o yaca. Órni ma goloʼno guicno gonyno nitisi cós, raniiny lóono que xcalrrienno diti gonynudyni lóono né dipa guisianno Jehová (Hechos 23:1).

Golno stoib lesiony 44 número 1

 6. Galguitz ni radudy

Nadxiʼno saʼno, por ngú rapno cuidad lóono par diti guitudyno galguitz ni radudy. Ronyno scú órni nanno que napno toib galguitz ni ratudy a stipnés o pal rasacno que napno láani. Né ronyno ndeʼ par guisobno ni ná la Biblia: «Gondxiʼ saʼlo xomod nadxiʼlo looyca» (Romanos 13:8-10).

¿Xí radudy diitz guisobno texto reʼ? Buñ ni nap toib galguitz ni radudy diti non canyibu stipnés, ndeʼ raguiña diti guidudybu bixit, cudxbu o guinásbu ña buñ. Né diti non guidzuitzbu pal diti noʼ ni raruʼ láabu lidx. Antes de tzonisbu, non gaibybu coordinador de ancianos que napbu toib galguitz ni radudy, modreʼ labúu tzonisbu par diti coʼbu ló riesga stipnés. Né pal toib buñ ma goyoʼ né toib buñ ni nap galguitz ni radudy, non guisaguelbu gonybu toib análisis de runy antes de tzoʼ xinobybu. Órni ronyno guirá ndeʼ, raslooyno que rioʼno galrrasaʼ por saʼno né diti nosi rioʼno galrrasaʼ por lóosino (Filipenses 2:4).

Golno stoib lesiony 56 número 2

 7. Negosy né stipnés cós

Diti rioʼno ló galnagan pal racaʼno ló guiich nitisi acuerdo ni ronyno né bidxiich, ná pal racni né toib cristiano (Jeremías 32:9-12). Ná scú, rioʼ ór cristianos diti rioʼyibu de acuerdo né stoib cristiano xtol bidxiich o por stipnés cós. Pal ñacni scú, diti noʼ xi portín tudy xiroʼ tiemp par gony reglaryibu láani, né guiyopyibu mod guininéyibu saʼyibu láasiyibu.

Per ¿ximod gac reglar galnagan órni noʼ ni ragotz falz o rabann xpidxiich saʼ? (Bíil Mateo 18:15-17). Jesús goniʼ que raquiin gony buñ tzón cós ni ritlaa reʼ.

1. Ni cadíil non gony reglaryibu láani stipláacayibu (bibiʼ versículo 15).

2. Pal diti rac reglarni labúu guinabyibu xcalrracné toib o chop herman ni nadip xfe par tzoʼ né layibu (bibiʼ versículo 16).

3. Pal ma bunyto guirá ndeʼ né diti rac reglar galnagancu, non guininéto ancianos (bibiʼ versículo 17).

Casi guirá galnagan ni racalóno né xhermanno, diti non tzanéno layibu nisló buñchiin, portín ñony buidyni laa Jehová né congregación (1 Corintios 6:1-8). Per noʼ tipnés galnagan ni labúu tzeeni nisló buñchiin xomod órni rabíl galtzeʼel, órni toib buñ gap derech par gan xiin, par guiyaʼan tzeelbu layibu, quiix seguro, gan buñ que ma diti napbu negosy né ma caquiimbu galrracné o cueʼbu testamento. Pal toib cristiano naguiix toib demand par ñony reglar galrradíil de clas reʼ, ndeʼ diti naslooy que diti casobbu ni rony mandary la Biblia.

Scúca, órni toib herman rigudx o raguiʼx toib demand nisló buñchiin portín goyoʼ ni buny toib galkié rodann xomod bixinbu toib mbioxien, bunynaabu, bigaitybu o golanbu xiroʼ bidxiich, ndeʼ diti naslooy que diti casobbu ni rony mandary la Biblia.

Golno stoib lesiony 56 número 3